Lerik, 2 oktyabr (AZƏRTAC, Bağır Əliyev). Oktyabrın 2-də Lerik şəhərindəki Heydər Əliyev meydanında gənclərin hərbi xidmətə yola salınması ilə bağlı mərasim keçirildi.

AZƏRTAC xəbər verir ki, çağırışçı gənclər əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad etdilər.

Çağırışçı gənclərlə yanaşı, rayon rəhbərliyinin, müharibə veteranlarının, valideynlərin, ictimaiyyətin nümayəndələrinin də iştirak etdikləri mərasimdə Səfərbərlik və Hərbi Xidmətə Çağırış üzrə Dövlət Xidmətinin Lerik rayon şöbəsinin rəisi, mayor Elməddin Cəfərov son illər ölkəmizdə ordu quruculuğu sahəsində görülən işlərdən danışdı, Prezident İlham Əliyevin həyata keçirdiyi siyasət nəticəsində respublikamızın regionda ən güclü orduya malik ölkəyə çevrildiyini diqqətə çatdırdı.

E.Cəfərov gənclərə uğurlar arzuladı və onların ordu sıralarında Vətənə ləyaqətlə xidmət edəcəklərinə ümidvar olduğunu bildirdi.

Böyük Vətən müharibəsinin veteranı Daşdəmir Paşayev, rayon gənlər və idman idarəsinin rəisi Rövşən Rüstəmov, valideynlər adından Aqil Nəcəfov gənclərə xeyir-dua verdilər, onların hərbi vəzifələrə vicdanla və məsuliyyətlə yanaşmalarını tövsiyə etdilər.

Çağırışçı gənclər adından çıxış edən Nəzarət Şəfiyev Azərbaycan Respublikasının Silahlı Qüvvələrində xidmət etməyi özlərinə borc və şərəf bildiklərini, vəzifələrinin öhdəsindən layiqincə gələcəklərini, Prezident, Ali Baş Komandan İlham Əliyevin əmri ilə torpaqlarımızı düşmən işğalından azad etməyə hər an hazır olacaqlarını bildirdi.

Mərasimdə çıxış edən Lerik Rayon İcra Hakimiyyətinin başçısı Rövşən Bağırov hərbi xidmətin hər bir vətəndaş üçün müqəddəs borc olduğunu vurğulayaraq gəncləri Vətənimizin keşiyində mətanətlə və sayıq dayanmağa çağırdı, ümummili lider Heydər Əliyevin nizami ordu quruculuğu sahəsində və ölkəmizin müdafiə qabiliyyətinin gücləndirilməsində müstəsna xidmətlərindən danışdı.

Qeyd olundu ki, Prezident İlham Əliyevin rəhbərliyi ilə Azərbaycan Silahlı Qüvvələri regionun ən güclü ordusuna çevrilib və o, hazırda qarşıya qoyulan bütün vəzifələrin öhdəsindən gəlmək qüdrətindədir.

Mərasim konsert proqramı ilə davam etdirildi.

Çağırışçı gənclər Azərbaycan Respublikasının üçrəngli dövlət bayrağının altından keçərək hərbi hissələrə yola düşdülər.