Litvanın www.slaptai.lt internet-nəşrinin rəhbəri, məşhur Litva jurnalisti Gintaras Visotskas IV Bakı Beynəlxalq Humanitar Forumunun fəal iştirakçılarından biri olub. Litvaya qayıtdıqdan sonra G.Visotskas öz internet portalında humanitar forum, Azərbaycanın paytaxtı, habelə Naxçıvana səfəri barədə təəssüratları ilə bağlı məqalə yerləşdirib.

“Azərbaycan qəhrəmanlarının uyuduqları, Vintsas Kreve-Mitskyaviçyusun dərs dediyi yerlərdə” sərlövhəli məqaləsində Litva jurnalisti 1990-cı il yanvarın 20-də sovet təcavüzünə (Litvada 13 yanvar hadisələrinin analoqu) qarşı müqavimət göstərmiş və Qarabağ müharibəsində həlak olmuş yüzlərlə azərbaycanlının dəfn olunduğu Şəhidlər xiyabanından yazır.

G.Visotskas yazır ki, güman edildiyi kimi, vaxtilə Litva ədəbiyyatının klassiki, müstəqil Litva Respublikasının Azərbaycandakı ilk konsulu Vintsas Kreve-Mitskyaviçyusun dərs dediyi binanı görmək ona nəsib olub.

Gintaras Visotskas “Naxçıvana və Ordubada səyahət” sərlövhəli məqaləsində bu diyara səfərini xatırladaraq yazır: “Azərbaycanın Naxçıvan Muxtar Respublikasının oyatdığı təəssüratı ifadə etmək çox çətindir. Orada həyat fərqlidir. Naxçıvanda yaşayanların Azərbaycan ilə birbaşa əlaqəsi yoxdur. Onları hər tərəfdən əzəmətli, keçilməz dağ silsilələri əhatə edir”. Məqalənin müəllifi qeyd edir ki, Naxçıvan düşmən Ermənistanın dövrəsindədir, odur ki, belə vəziyyət Naxçıvan azərbaycanlılarının həyat tərzinə təsir göstərməyə bilməz. Jurnalist yazır: “Lakin elə düşünməyin ki, Naxçıvan azərbaycanlıları qorxu və yoxsulluq içindədirlər. Sadəcə onların həyat ahəngi Azərbaycanda olduğundan bir qədər fərqlidir. Burada qonaqları hətta daha mehriban, daha hərarətlə qarşılayırlar. Ümumiyyətlə, Azərbaycan xüsusi qonaqpərvərliyi ilə şöhrət qazanıb, mehribanlıq və qonağa hörmət həddindən artıqdır”.

G.Visotskas diqqətə çatdırıb ki, Azərbaycanın keçmiş Prezidenti, ölkənin indiki rəhbəri İlham Əliyevin atası Heydər Əliyev də Naxçıvanda doğulub boya-başa çatıb. Məhz buna görə də Naxçıvanda Heydər Əliyevin xatirəsinə ehtiramı əks etdirən yerlər çoxdur.

Litva jurnalisti yazır ki, Ordubad şəhərinin ətrafındakı dağlar da unudulmaz təəssürat yaradır – azərbaycanlılar bu dağları müqəddəs hesab edirlər. G.Visotskas öz məqaləsində bu dağlar haqqında əfsanədən yazır.

Litva jurnalisti gəzdiyi muzeylərin hər birində 1992-2014-cü illərdə ölkənin ərazi bütövlüyünün müdafiəsi zamanı həlak olmuş Naxçıvan azərbaycanlılarının portretlərinin olduğu xüsusi ekspozisiyalar yaradıldığını bildirir. G.Visotskas yazır: “Bələdçilər bu ağrılı mövzuya xüsusi diqqət yetirirlər. Bizi müşayiət edən azərbaycanlı diplomatlar isə dönə-dönə təkrarlayırdılar ki, itirilmiş torpaqlar mütləq geri qaytarılacaqdır”.

Nigar Cəfərli

AZƏRTAC-ın xüsusi müxbiri

Vilnüs