İDMAN


Luis Hamilton Macarıstan Qran-prisinin qalibi olub

A+ A

Bakı, 25 iyul, AZƏRTAC 

Formula-1 üzrə dünya çempionatının iyulun 22-24-də keçirilən on birinci yarışında – Macarıstan Qran-prisində qalib gələn “Mercedes”in britaniyalı pilotu, hazırkı çempion Luis Hamilton cari mövsümdə beşinci qələbəsini qazanıb.

AZƏRTAC xəbər verir ki, on birinci yarışda pilotlar “Hunqarorinq” avtodromunda uzunluğu 4381 metr olan trekdə mübarizə aparıblar.

Luis Hamilton yarışı 1 saat 40 dəqiqə 30,115 saniyəlik nəticə ilə 25 xal toplayaraq başa vurub. Liderdən 1,977 saniyə geridə qalan Niko Rosberq (Mercedes) yarışı 18 xalla ikinci pillədə yekunlaşdırıb. İlk üçlüyü liderdən 16,911 saniyə sonra finişə çatan Daniel Rikkardo (Red Bull Racing, 15 xal) tamamlayıb.

On birinci Qran-pridən sonra “Mercedes”in pilotu Luis Hamilton 192 xalla liderliyi ələ keçirib. Cari mövsümdə beşinci qələbəsini qazanan L.Hamilton bu mərhələdən sonra ikinci pillədə qərarlaşan komanda yoldaşı N.Rosberq ilə xal fərqi 6-ya bərabərdir. N.Rosberqin hesabında 186 xal var. O, indiyədək keçirilən on mərhələdən beşində (Avstraliya, Bəhreyn, Çin, Rusiya, Azərbaycan) qalib gəlib.

Aktivində 115 xal olan Daniel Rikkardo (Red Bul Racing) üçüncü, Kimi Raikkonen (Ferrari) 114 xalla dördüncü və 110 xala sahib olan Sebastian Vettel (Ferrari) isə beşincidir.

Çempionatın növbəti – on ikinci yarışı iyulun 29-31-də Almaniyada keçiriləcək.

Yarışın səkkizinci mərhələsi – Avropa Qran-prisi iyunun 17-19-da Bakıda keçirilmişdi. Mərhələnin qalibi “Mercedes”in pilotu Niko Rosberq olmuşdu.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.