İQTİSADİYYAT
MƏHSUL İSTEHSALINI VƏ İŞÇİLƏRİN SAYINI ARTIRMAĞA İMKAN VAR
Tovuz şəhərindəki “Qalib-A” şirkəti nar şirəsi istehsalına başlamışdır. 2003-cü ildə 0,5 litrlik butulkalarda 150 min ədəd şirə istehsal edən şirkətin litrlik qablarda 100 min ədəd məhsul buraxmaq üçün xammalı var.
Şirkətin direktoru Əlixan Ədilov AZƏRTAC-ın müxbirinə demişdir ki, 1998-ci ildən fəaliyyət göstərən şirkət ilk vaxtlar Rusiyadan buğda toxumu və taxıl məhsulları alıb gətirməklə və rayonda kənd təsərrüfatı məhsulları istehsal etməklə məşğul olurdu. Hazırda şirkətdə 50 nəfərdən artıq rayon sakini çalışır. İstehsal etdiyimiz nar şirəsinin Tolyatti, Moskva və Minsk şəhərlərində alıcıları var. Əsas çətinliyimiz maliyyə mənbəyinin olmamasıdır. Bizə kredit verilərsə, gilas, albalı şirələri və mürəbbələri də istehsal edərik. Bu isə 100-dək adamın işlə təmin olunmasına imkan yaradar.