İDMAN
MİLLİ OLİMPİYA KOMİTƏSİNDƏ GÖRÜŞ
Dekabrın 27-də Milli Olimpiya Komitəsinin prezidenti, Milli Məclisin deputatı İlham Əliyev Azərbaycan Boks Federasiyasının rəhbərliyini, bu il beynəlxalq yarışlarda uğurla çıxış etmiş boksçuları və onların məşqçilərini qəbul etmişdir.
MOK-un prezidenti İlham Əliyev görüş iştirakçılarını Dünya azərbaycanlılarının həmrəyliyi günü və Yeni il münasibətilə təbrik etdi, il ərzində idmanın bu növündə inkişaf əldə olunduğunu vurğulayaraq dedi ki, son illər bu sahədə müxtəlif tədbirlər keçirilir və yeniyetmələrimiz, gənclərimiz qələbələr qazanırlar. Bütün bunlar bizi çox sevindirir və deyə bilərəm ki, Azərbaycanda beynəlxalq yarışların keçirilməsində ilk addımı boksçular etmişlər. Bakıda Beynəlxalq Boks Federasiyasının prezidenti Ənvər Çoudrinin adına beynəlxalq turnirlər, kadetlər arasında Avropa və dünya çempionatları keçirilmişdir. Bütün bunlar boksda çox gözəl nəticələrin olduğunu göstərir. Ən əsası odur ki, perspektivlər var, yeni nəsil yetişir.
İlham Əliyev digər idman növlərində də buna oxşar turnirlər, çempionatlar keçirildiyini, Olimpiya oyunlarında, dünya və Avropa səviyyəli yarışlarda yaxşı nəticələr göstərildiyini bildirdi, idmançılara və məşqçilərə cansağlığı, yeni qələbələr arzuladı. MOK-un prezidenti xatırlatdı ki, qarşıdan gələn 2003-cü il Olimpiya oyunlarına hazırlıq baxımında çox vacib bir il olacaqdır. Əminəm ki, boksçularımız bunu dərk edirlər. Çox şadam ki, respublika Boks Federasiyasının gördüyü böyük işləri, onun prezidenti Ağacan Abiyevin əməyini beynəlxalq aləmdə yüksək qiymətləndirirlər. O, Beynəlxalq Boks Federasiyası İcraiyyə Komitəsinin üzvü seçilib və çox mühüm bir komissiyaya başçılıq edir. Əminəm ki, boksçularımız gələn illərdə də Azərbaycanı dünya idman meydançalarında ləyaqətlə təmsil edəcəklər.
Azərbaycan Boks Federasiyasının prezidenti Ağacan Abiyev boksçular adından MOK-un prezidentini qarşıdan gələn əlamətdar günlər münasibətilə təbrik etdi, belə görüşlərin idmançılara müsbət təsir göstərdiyini vurğuladı, eyni zamanda idmanın, o cümlədən boksun inkişafına göstərdiyi böyük diqqət və qayğıya görə Prezident Heydər Əliyevə dərin minnətdarlığını bildirdi. O, gələcək planlar barədə danışaraq dedi ki, 2005-ci ildə kişilər arasında dünya çempionatının Bakıda keçirilməsi üçün işlər gedir. Qazanılan hər bir uğur ölkəmizdə idmançılara yaradılan şərait sayəsində mümkün olur. Söz veririk ki, boksçularımıza göstərilən diqqət və qayğıya cavab olaraq, 2003-2004-cü illərdə həm Olimpiya oyunlarında, həm də Avropa və dünya çempionatlarında Azərbaycana medallar gətirəcəyik.
Sonra MOK-un prezidenti İlham Əliyev məlumat verdi ki, Olimpiya oyunları ərəfəsində lisenziya turniri Azərbaycanda keçiriləcəkdir. Bu, idman tariximizdə görünməmiş bir hadisə olacaqdır. Bilirsiniz ki, bu turnirin keçirilməsi uğrunda ölkələr mübarizə aparırlar, həmişə bir neçə namizəd olur və çox gərgin şəraitdə qərar qəbul olunur. Beynəlxalq Boks Federasiyası bizim xahişimizi nəzərə almışdır. Bu, hər bir ölkənin idman tarixi üçün boyük bir hadisədir. Bu, onu göstərir ki, Azərbaycana böyük inam var və son illər ərzində keçirilən beynəlxalq yarışlar yüksək səviyyədə olubdur. Bu, idmançılarımızın daha uğurla çıxış etməsi üçün də əlverişlidir. İdmana rəhbərlik edən qurumların vəzifəsi bunu təmin etməkdir. Digər idman növləri üzrə lisenziya turnirlərinin ölkəmizdə keçirilməsi üçün bəzi Federasiyalarla danışıqlar aparılır və inanırıq ki, bunlar müsbət olacaqdır.
Sonra MOK-un prezidenti İlahm Əliyev görüş iştirakçıları ilə xatirə şəkli çəkdirdi.
Foto Namiq Məmmədovundur