Dekabrın 27-də MOK-un inzibati binasında Azərbaycan Milli Olimpiya Komitəsi İcraiyyə Komitəsinin geniş iclası keçirilmişdir. Gündəliyə idmançı və məşqçilərin ilin yekunlarına görə təltif edilməsi, Milli Olimpiya Komitəsinin 10 illik yubileyi münasibətilə keçirilmiş “Olimpiya, idman, incəsənət-2002” müsabiqəsi qaliblərinin təltif olunması, MOK-un 2002-ci ildəki fəaliyyəti haqqında, Afina-2004 Olimpiya oyunlarına hazırlığın gedişi barədə məsələlər və cari məsələ daxil idi. 

MOK-un prezidenti, Milli Məclisin deputatı İlham Əliyev iclası açaraq, rəhbərlik etdiyi qurumun fəaliyyətinə daim dəstək verən olimpiya idman növləri üzrə Federasiyaların başçılarının da dəvət edildiyini, ilin yekunları haqqında müzakirələr aparılacağını bildirdi. O, dedi ki, əldə edilən nəticələr haqqında il ərzində mütəmadi qaydada fikir mübadiləsi aparılmış, problemlərin həlli ilə məşğul olunmuşdur. Amma bu gün daha geniş müzakirə getməlidir.

2004-cü ildə keçiriləcək Yay Olimpiya Oyunlarına hazırlıqla bağlı məsələlərin müzakirəsinə ehtiyac olduğunu söyləyən İlham Əliyev vurğuladı ki, 2003-cü il həlledici ildir, ona görə də həmin ildə görüləcək işlər haqqında daha geniş söhbət aparacağıq. Həmçinin bu gün idmançıları, məşqçiləri, idman mütəxəssislərini hədiyyələrlə təltif etmək istəyirik. Bilirsiniz ki, il ərzində beynəlxalq yarışlarda qələbə qazanmış idmançılarla elə bu binada mütəmadi qaydada keçirilən görüşlərdə onlar Milli Olimpiya Komitəsi tərəfindən mükafatlandırılmışlar. Eyni zamanda, hesab etdik ki, ilin sonunda, yeni il ərəfəsində biz idmançılara daha dəyərli mükafatlar verməliyik.

Ötən il ərzində MOK-un ünvanına çoxlu müraciət olduğunu nəzərə çarpdıran İlham Əliyev dedi ki, bunların hamısını təmin etmişik. Müraciətlər idmançıların, məşqçilərin, mütəxəssislərin yaşayış şəraitinin yaxşılaşdırılması barədə idi. Milli Olimpiya Komitəsi və Gənclər, İdman və Turizm Nazirliyi birlikdə Bakı Şəhəri İcra Hakimiyyətinə müraciət etmişdik. Bu iclası xoş missiya ilə başlayaq, mükafatları verək, təltif olunanları təbrik edək.

MOK-un prezidenti İlham Əliyev sərbəst güləşçi, Atlanta Olimpiadasının gümüş mükafatçısı və Sidney Olimpiya Oyunlarının çempionu, dünya çempionatının gümüş mükafatçısı Namiq Abdullayevə, güllə atıçılığı üzrə dünya çempionatının gümüş mükafatçısı, dünya kubokunun final mərhələsinin bürünc mükafatçısı, Afina Yay Olimpiya oyunlarına lisenziya qazanmış İradə Haşımovaya, sərbəst güləş üzrə Avropa çempionatının gümüş mükafatçısı, Atlanta və Sidney olimpiadalarının iştirakçısı Arif Abdullayevə, sərbəst güləş üzrə Avropa çempionu Nazim Əlicanova, əməkdar məşqçi Əli Əliyevə, sərbəst güləş üzrə Avropa çempionatının gümüş mükafatçısı Elman Əsgərova, əməkdar məşqçi Elman Əzimzadəyə, cüdo üzrə gənclərdən və yeniyetmələrdən ibarət yığma komandanın baş məşqçisi, əməkdar məşqçi Hacıağa Hacıəhmədova, güləş üzrə beynəlxalq dərəcəli hakim, Sidney Olimpiadasının hakimi Oqtay Hüseynova, MOK-un vitse-prezidenti, sərbəst güləş üzrə dünya və Avropa çempionu Xəzər İsayevə, cüdo üzrə Avropa çempionatının qalibi və mükafatçısı Elçin İsmayılova, voleybol üzrə qadınlardan ibarət yığma komandanın baş məşqçisi, əməkdar məşqçi Faiq Qarayevə, respublikamızda keçirilən idman tədbirlərinin aparıcısı, voleybol üzrə məşqçi-müəllim Ramiz Qafarova, sərbəst güləş üzrə yığma komandanın baş məşqçisi, əməkdar məşqçi Yaqub Məmmədova, ağırlıqqaldırma üzrə Avropa və dünya çempionu Nizami Paşayevə mənzillərin orderlərini təqdim etdi.

Sonra olimpiya idman növləri üzrə dünya və Avropa çempionatlarında, turnirlərdə, kubok yarışlarında mükafata layiq görülmüş idmançılara və Milli Olimpiya Komitəsinin 10 illik yubileyi münasibətilə keçirilmiş “Olimpiya, idman, incəsənət-2002” müsabiqəsinin qaliblərinə mükafatlar verildi.

MOK-un birinci vitse-prezidenti Çingiz Hüseynzadənin “Milli Olimpiya Komitəsinin 2002-ci ildəki fəaliyyəti haqqında” məruzəsi dinlənildi. O, Prezident Heydər Əliyevin Sərəncamı ilə MOK-un 10 illik yubileyinin dövlət səviyyəsində keçirildiyini, son illərdə komitənin gördüyü işlərin həm ölkə daxilində, həm də xaricdə böyük əks-səda doğurduğunu, dövlətimizin başçısının idmana daim yüksək qayğı göstərdiyini, idmançıları orden və medallarla təltif etdiyini bildirdi, tanınmış idmançılara Prezident təqaüdünün verildiyini vurğuladı.

Məruzəçi dedi ki, yola saldığımız ildə nailiyyətlərimiz daha çox olmuşdur. Ölkəmiz komanda idman növləri üzrə beynəlxalq yarışların təşkili və keçirilməsi sınağından uğurla çıxmışdır. Voleybolçu qızlarımız Avropa “Top komanda” kubokunu qazanmış, hazırda Avropa çempionlar liqasında mübarizə aparırlar. Qadınlardan ibarət yığma həndbol komandamız Avropa Həndbol Federasiyasının “Çağırış kuboku” yarışının qalibi olmuşdur.

Ümumiyyətlə, bu il 175 medal qazanılmışdır. Onlardan 63-ü Olimpiya idman növlərinin payına düşür. MOK yüksək ustalıq göstərmiş idmançılara, onların məşqçilərinə, eləcə də tanınmış veteran idmançılarımıza öz vəsaiti hesabına təqaüd vermişdir. İlboyu hər ay 46 idmançıya və onların məşqçilərinə, 11 idman veteranına təqaüd verilmişdir.

Məruzədə deyildi ki, son illər respublikamızda idmanın maddi-texniki bazasının möhkəmləndirilməsi sahəsində müqayisə olunmaz dərəcədə böyük işlər görülmüşdür. Bu işlərin təşəbbüskarı Milli Olimpiya Komtəsinin prezidenti İlham Əliyev olmuşdur. 2000-2002-ci illər ərzində Bakıda iki böyük idman kompleksi, MOK-un inzibati binası, Naxçıvanda, Gəncədə və Şəkidə müasir standartlara cavab verən olimpiya idman kompleksləri istifadəyə verilmişdir. Ötən illərdə Bakı İdman Sarayı, respublika İdman-Konsert kompleksi dünya standartları səviyyəsində bərpa olunmuşdur. Hazırda Bərdədə yeni idman kompleksinin tikintisi başa çatdırılmışdır. Lənkəran, Şamaxı və Quba rayonlarında olimpiya imdan komplekslərinin inşasına başlanmışdır. MOK-un təşəbbüsü ilə idmanın müxtəlif növlərinin inkişafı üçün xüsusi meydançalar tikilir.

Ç. Hüseynzadə dedi ki, 1952-ci ildən bəri idmançılarımızın müxtəlif olimpiya oyunlarında çıxışlarına aid videolentlər MOK-un səyləri nəticəsində axtarılıb tapılmış, onların bir qisminin respublikamıza gətirilməsi üçün müqavilə bağlanmışdır.

MOK-un İcraiyyə Komitəsinin üzvü Asif Əsgərov “Afina-2004 oyunlarına hazırlığın gedişi haqqında” məruzəsində qeyd etdi ki, 2003-cü ildə respublikamızın bütün idman yönümlü təşkilatları qarşısında duran ən ali məqsəd – Afina Yay Olimpiya Oyunlarına səmərəli hazırlığı təmin etmək və lisenziyalar qazanılmasına nail olmaqdır. Qarşıda duran vəzifələri müəyyənləşdirmək üçün Milli Olimpiya Komitəsi Gənclər, İdman və Turizm Nazirliyi, idman Federasiyaları ilə birlikdə hazırlıq konsepsiyası tərtib edilmişdir. XXVIII Yay Olimpiya Oyunlarında iştirak etmək hüququ verən əsas beynəlxalq yarışların əksəriyyəti 2003 və 2004-cü illərdə nəzərdə tutulmuşdur. Məhz bu yarışlarda lisenziyaların əldə olunması üçün idman növləri müəyyənləşdirilmişdir.

Məruzəçi qarşıdakı olimpiya oyunlarında yüksək nəticələr göstərmək üçün idmançılarımıza hər cür şəraitin yaradıldığını söylədi. O, Sidneydə qazanılmış nailiyyətləri nümunə gətirərək, əmin olduğunu bildirdi ki, 2002-ci ili layiqli nəticələrlə başa vuran idmançılarımız və məşqçilərimiz Azərbaycan idmanının şərəfini və nüfuzunu yüksəltmək üçün bundan sonra da var qüvvə ilə çalışacaqlar.

Sonra Atçılıq Federasiyasının Prezidenti İsa Nəcəfov, Taekvondo Federasiyasının prezidenti Kəmaləddin Heydərov, Stolüstü Tennis Federasiyasının prezidenti Sədiyar Əliyev, MOK-un İcraiyyə Komitəsinin üzvləri Vaqif Əliyev, Zemfira Meftahəddinova təmsil etdikləri sahələr üzrə görülən işlər və gələcək planlar barədə danışdılar. Onlar ilin nəticələrini yüksək qiymətləndirərək, qazanılmış nailiyyətlərin Azərbaycan Prezidenti Heydər Əliyevin idmana göstərdiyi diqqət və qayğının nəticəsi olduğunu söylədilər. Bildirildi ki, beynəlxalq yarışlarda yüksək yerlər tutmuş idmançılarımız MOK-un Prezidenti İlham Əliyev tərəfindən daim mükafatlandırılır və onları gələcəkdə daha uğurla çıxış etməyə ruhlandırır.

Ağırlıqqaldırma üzrə dünya çempionu Nizami Paşayev və yunan-Roma güləşi üzrə əməkdar məşqçi Əli Əliyev onların xidmətini yüksək qiymətləndirdiyinə və mənzil şəraitlərini yaxşılaşdırdığına görə MOK-un prezidenti İlham Əliyevə dərin minnətdarlıqlarını bildirdilər.

Milli Olimpiya Komitəsinin prezidenti İLHAM ƏLİYEV iclasa yekun vuraraq dedi ki, bayramlar ərəfəsində idmançılara, veteranlara və məşqçilərə göstərdikləri xidmətlərə layiq olan mükafatlar verildi. Bu onu göstərir ki, Azərbaycanda idman potensialı getdikcə güclənir, idmana layiqli qiymət verilir. Əgər bu qarşılıqlı anlaşma olmasaydı, yəqin ki, qələbələrdən danışmaq çətin olardı. İdman elə bir sahədir ki, mütləq idmançının fəaliyyəti layiqincə qiymətləndirilməlidir. Hesab edirəm, idmançılarda olan vətənpərvərlik ruhu, iradə, öz doğma xalqına, millətinə məhəbbət onları yarışlarda daha da iradəli edir.

Bütün federasiyalarda idmançılara diqqət və qayğının yüksək səviyyədə olduğunu, bu barədə Milli Olimpiya Komitəsinin siyasətinin onlar tərəfindən uğurla həyata keçirildiyini vurğulayan İlham Əliyev ayrı-ayrı federasiyaların işindən, idmançıların beynəlxalq yarışlarda çıxışlarının təmin edilməsindən, problemlərin həlli istiqamətində görülən tədbirlərdən də danışdı, idman qurumlarının rəhbərlərinə tövsiyə və tapşırıqlarını verdi. MOK-un prezidenti iclasda səslənən təkliflərə baxılacağını, bir çox idman obyektlərindən qeyri-məqsədlər üçün istifadənin qarşısının alınacağını nəzərə çarpdırdı. O, təsis olunmuş təqaüdlərin bir hissəsinin məşqçilərə verildiyini bildirərək dedi ki, onların işi çox çətindir. Bəzi hallarda idmançıdan da çox işləyir, çalışır, bu barədə daim fikirləşirlər. Amma qələbə qazanılanda, adətən, idmançını təbrik və tərif edirlər. Məğlubiyyət olanda isə məşqçi tənqid olunur. Ona görə məşqçilik, doğrudan da, çətin işdir.

Beynəlxalq Olimpiya Komitəsinin Azərbaycan idmanına verdiyi yüksək qiyməti xatırladan İlham Əliyev qadınların bəzi idman növləri üzrə fəaliyyət göstərməsini məqsədəuyğun saymadığını bildirərək dedi ki, məsələn, bizdə ağırlıqqaldırma üzrə lisenziya qazanmış Təranə Abbasova var idi. Amma hesab edirəm, bu idman növü qadın üçün o qədər də uyğun deyildir. Belə idman növləri xüsusilə qadınlara yaraşmır. Əlbəttə, idman idmançıdan fədakarlıq tələb edir. Çox hallarda idmançı zədə də alır, sağlamlığını da itirir. Amma ümumiyyətlə, idman sağlamlıq üçün çox xeyirlidir. Gərək qadınlar onlara yaraşan idman növləri ilə məşğul olsunlar. Üzgüçülük, gimnastika, voleybol, həndbol, basketbol, futbol, şahmat, otüstü xokkey və stolüstü oyun növlərində çıxış etmək daha məqsədəuyğun olardı. Bu növlərdə beynəlxalq yarışlarda ölkəmizi ləyaqətlə təmsil edən idmançılarımız var. Biz bunun üçün lazımi şəraiti yaradırıq. Qadınların idmanda böyük rolu vardır.

Mən bir daha bildirirəm ki, biz Azərbaycanda komanda oyun növlərinin inkişaf etməsini istəyirik. Fərdi oyun növlərində uğurlarımız vardır və Afina Olimpiya Oyunları bunu bir daha təsdiq edəcəkdir. Düşünürəm ki, bizim nəticələrimiz daha da yüksək olacaqdır. Ümumiyyətlə, təkcə olimpiya oyunlarında yox, dünya, Avropa çempionatlarında qazanılan uğurlar da elə-belə, asanlıqla başa gəlmir. Amma qazanılanları gərək həmişə qiymətləndirək və qiymətləndiririk. İdmanın komanda növləri tamaşaçı auditoriyasını daha da cəlb edir. Çox istərdim ki, Azərbaycanda bu sahədə yüksək nəticələr olsun. Bizim voleybol komandamızın nailiyyəti var, Avropa Top komanda kubokunun qalibi olmuşdur.

Bir sözlə, Azərbaycanda idman inkişaf edir, gözəl nəticələrimiz var. Mən İcraiyyə Komitəsinin fəaliyyətini yüksək qiymətləndirirəm. Burada görkəmli idman xadimləri, idmançılar, məşqçilər, ziyalılar təmsil olunurlar. İcraiyyə Komitəsinin hər bir üzvü böyük iş görür, Azərbaycanı ləyaqətlə təmsil edir və böyük şəxsi nüfuza malikdir. Mən onlara öz minnətdarlığımı bildirirəm. Hesab edirəm ki, bu, gələcəkdə də belə davam edəcəkdir.

Biz idmanı daha da qaldırmaq üçün, idmançılara lazımi şərait yaratmaq üçün gərək federasiyaları gücləndirək. Çox şadam ki, federasiyaların rəhbərliyinə seçilən insanlar idmanı sevirlər və onların arasında sağlam rəqabət gedir. Bu da çox yaxşıdır. Bütün bunlar onu göstərir ki, biz düz yoldayıq. Dəvət etdiyimiz mütəxəssislər çox böyük həvəslə, maraqla və peşəkarlıqla işləyirlər. Əgər biz gələcəkdə də bu istiqamətdə davam etsək, Milli Olimpiya Komitəsi, Gənclər, İdman və Turizm Nazirliyi, federasiyalar, klublar, bütün idman ictimaiyyəti bundan da böyük qələbələrin, uğurların şahidi olacaqdır. Sizə bir daha öz təşəkkürümü bildirir, hamınızı qarşıdan gələn Dünya azərbaycanlılarının həmrəyliyi günü və Yeni İl bayramı münasibətilə təbrik edirəm. Növbəti ildə sizə fəaliyyətinizdə uğurlar, şəxsi həyatınızda xoşbəxtlik, səadət diləyirəm.

AZƏRTAC

Foto Namiq Məmmədovundur