REGİONLAR


Maarifçilik ideyalarına sadiqlik milli mətbuatımızın əsasını təşkil edir

Samux 23 iyul, Rauf Hacıyev, AZƏRTAC

Samuxda Milli Mətbuat Günü münasibətilə jurnalistlərlə görüş keçirilib.

AZƏRTAC xəbər verir ki, görüşdə rayon icra hakimiyyətinin başçısı Alı Qocayev əlamətdar gün münasibətilə KİV nümayəndələrini təbrik edib, onlara yaradıcılıq uğurları arzulayıb.

Bildirilib ki, 1875-ci il iyulun 22-də bütün türk və müsəlman dünyasında ilk dəfə böyük ziyalı, təbiətşünas alim Həsən bəy Zərdabinin redaktorluğu ilə “Əkinçi” qəzeti nəşr edilib. H.Zərdabi bu qəzet vasitəsilə əqidə dostları Mirzə Fətəli Axundzadə, Nəcəf bəy Vəzirov, Əsgər ağa Adıgözəlov (Gorani), Seyid Əzim Şirvani və başqa şəxslərlə birgə cəhalətə qarşı mübarizə aparıb, millətin savadlanması, qadın hüquqlarının qorunması istiqamətində yazılarla çıxış edib.

Xalqın milli ruhunu ifadə edən bu qəzetin cəmi 56 nömrəsi çapdan çıxıb. “Əkinçi”nin yaydığı maarifçilik ideyaları sonrakı dövrlərdə digər qəzet və jurnallarda davam etdirilib. “Ziya”, “Ziyayi-Qafqaziyyə”, “Kəşkül”, “Açıq söz”, “Şərqi-Rus”, “Molla Nəsrəddin” kimi qəzet və jurnallarda əks olunan demokratik fikirlər, milli ideyalar, müstəmləkəçilik və Şərq istibdadı əleyhinə çıxışlar, cəhalət, xurafat və fanatizmin tənqidi, eləcə də ictimai tərəqqi və xalqın rifahının yüksəldilməsi uğrunda çıxışlar Azərbaycanda milli dövlət qurulması ideyasına gətirib çıxarıb.

Alı Qocayev ümummilli lider Heydər Əliyevin və Prezident İlham Əliyevin milli mətbuatımızın yüksəlişi və tərəqqisi naminə həyata keçirdikləri böyük işlərdən də söz açıb.

“Azərbaycan” qəzetinin bölgə müxbiri Sabir Əliyev, “Respublika” qəzetinin bölgə müxbiri Zabit Xəlilov və AZƏRTAC-ın Gəncəbasar müxbiri Rauf Hacıyev çıxış edərək ölkə və region mətbuatının hazırkı vəziyyətindən, həmçinin Samux rayonunda kənd təsərrüfatının inkişafı istiqamətində görülən işlərdən danışıblar.

Sonda jurnalistlərə rayon icra hakimiyyətinin fəxri fərmanları və qiymətli hədiyyələri təqdim olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.