REGİONLAR
Maarifləndirici tur-aksiyanın bir qrup iştirakçısı cənub bölgəsi ilə tanış olub
Masallı-Astara-Lənkəran, 14 noyabr, Bağır Əliyev, AZƏRTAC
“Ölkəmizi tanıyaq” maarifləndirici tur-aksiyasının iştirakçısı olan Gəncə şəhərinin, Ağstafa, Samux, Kəlbəcər, Daşkəsən və Bakının Nəsimi, Yasamal, Binəqədi rayonlarının məktəbliləri noyabrın 14-də Masallı və Astaraya səfər ediblər.
AZƏRTAC xəbər verir ki, Masallıda tur-aksiya iştirakçılarını rayon icra hakimiyyətinin məsul işçiləri, müəllimlər və ictimaiyyət nümayəndələri qarşılayıblar.
Masallı şəhərindəki Heydər Əliyev Parkında məktəblilər qarşısında çıxış edən rayon icra hakimiyyəti başçısının müavini Aybəniz Qafarova “Ölkəmizi tanıyaq” layihəsi çərçivəsində təşkil olunmuş tur-aksiyaların əhəmiyyətindən danışıb, səyahət edən məktəblilərə xoş arzularını bildirib.
Məktəblilər Heydər Əliyev Parkında Ümummilli Liderin abidəsi önünə gül dəstələri düzərək xatirəsini ehtiramla yad edib, Heydər Əliyev Mərkəzində Ulu Öndərin zəngin və mənalı ömür yolunu əks etdirən eksponatlar və fotoşəkillərlə tanış olublar.
Maarifləndirici aksiyanın iştirakçıları parkın konsert meydançasında Mərkəzin məktəbli oğlanlardan ibarət rəqs qrupu və "Halay" folklor kollektivinin çıxışlarını böyük maraqla izləyiblər.
Sonra məktəblilər Uşaq-İncəsənət Məktəbinə gəliblər. Məlumat verilib ki, Uşaq-İncəsənət Məktəbi bu il sentyabrın 3-də Prezident İlham Əliyevin iştirakı ilə istifadəyə verilib.
Qeyd olunub ki, Masallı Uşaq İncəsənət məktəbi 1979-cu ildən fəaliyyət göstərir. 1994-cü ildən məktəbdənkənar tədris üçün uyğunlaşdırılmış binada fəaliyyət göstərən məktəbin zamanın tələbinə uyğun daha müasir və geniş binada yerləşdirilməsi yüksək səviyyədə həyata keçirilib. Ümumi sahəsi 2743 kvadratmetr olan ikimərtəbəli binada 33 sinif otağı var. Sinif otaqlarının hamısı müasir avadanlıqla, təlim-tədris ləvazimatları ilə təchiz olunub. 150 yerlik akt zalında müxtəlif tədbirlərin keçirilməsi üçün hər cür şərait yaradılıb. Kitabxana, rəsm otağı və heykəltəraşlıq emalatxanasında dərslərin keçirilməsi üçün bütün imkanlar nəzərə alınıb. Məktəbdə hazırda 305 şagird təhsil alır və 70 müəllim çalışır.
Şagirdlər bu il sentyabrın 3-də istifadəyə verilmiş Tarix-Diyarşünaslıq Muzeyi ilə də tanış olublar. Muzeyin direktoru Əntiqə Tağıyeva bildirib ki, Prezident İlham Əliyev Masallıya səfəri çərçivəsində Tarix-Diyarşünaslıq Muzeyinin açılışında iştirak edib.
Məlumat verilib ki, Masallı Rayon Tarix-Diyarşünaslıq Muzeyi 1950-ci ildə yaradılıb və şəhər mərkəzindən 16 kilometr məsafədə yerləşən keçmiş məktəb binasında fəaliyyət göstərirdi. Ölkəmizdə muzey işinin yüksək səviyyədə təşkil olunması, bu sahədə daha modern layihələrin tətbiq edilməsi, əhali, xüsusilə də gənclər arasında tariximizə marağın artırılması ilə bağlı həyata keçirilən tədbirlərin geniş vüsət alması Masallı Rayon Tarix-Diyarşünaslıq Muzeyinin də fəaliyyətinin yenidən təşkili, muzeyin təyinatına uyğun yeni binada yerləşdirilməsi zərurətini yaratmışdı. 2014-cü ildə tikintisinə başlanan muzey binasında inşaat işləri bu ilin iyulunda başa çatdırılıb.
Ümumi sahəsi 1861 kvadratmetr olan muzeydə 5 ekspozisiya zalı yaradılıb. Ekspozisiyalarda Masallının tarixi, bu ərazidə tapılan qədim əşyalar, ümumiyyətlə, rayonun həyatı ilə bağlı məlumatlar toplanıb. Muzeydə 7 mindən çox eksponat var. Onlardan 2 mini ekspozisiya zallarında nümayiş etdirilir.
Sonra məktəblilər "ASAN həyat" kompleksinə gələrək buradakı İntellektual Mərkəzdə keçirilən Masallı məktəblilərinin "Breyn-Rinq" yarışmasını izləyiblər.
Məktəblilər, həmçinin Masallı Olimpiya İdman Kompleksi, Bayraq Meydanı və Azərbaycan Dövlət Rəmzləri Muzeyi ilə də yaxından tanış olublar.
Tur-aksiya iştirakçıları Masallı rayonu ilə tanışlıqdan sonra Astara rayonuna gəliblər.
Onları burada Astara Rayon İcra Hakimiyyətinin məsul işçiləri, müəllimlər, gənclər və ictimaiyyət nümayəndələri qarşılayıblar.
Məktəblilər Heydər Əliyev Muzeyində Ümummilli Liderin həyat və fəaliyyətini, böyük rəhbərin Astara rayonuna səfərlərini əks etdirən eksponatlar və fotoşəkillərlə tanış olublar.
Sonra tur-aksiya iştirakçıları Astara şəhərində, Xəzər dənizi sahilində salınmış park-bulvar kompleksinə səfər ediblər. Rayon mədəniyyət və turizm şöbəsinin müdiri Şadoğlan Bayramov Astaranın qədim tarixi, mədəniyyəti, adət-ənənələri, turizm potensialı, əhalinin məşğulluğu və sosial-iqtisadi inkişafı barədə məktəblilərə məlumat verib. Qeyd olunub ki, zəngin təbiətə və qədim tarixə malik Astarada el sənətkarlığı, adət-ənənələrimiz və folklorumuz qorunub saxlanılır.
Park-bulvar kompleksi ilə tanışlıqdan sonra tur-aksiya iştirakçıları rayonun Ərçivan kəndindəki “Yanar bulaq”da suyun alovlanmasını böyük maraqla izləyiblər.
Məktəblillər “Astaraçay” MMC-nin çay fabrikində emal prosesi ilə tanış olub, buradakı “Çay muzeyi”ndə nümayiş etdirilən eksponatlara baxıblar.
Tur-aksiya iştirakçıları şəhərin mərkəzində Bayraq meydanında və Gənclər Evində də olublar.
Masallı və Astara rayonları ilə tanışlıqdan sonra məktəblilər Lənkəran rayonuna qayıdıblar.
X X X
Noyabrın 14-də tur-aksiyanın Qazax, Şəmkir və Gədəbəy rayonlarından olan iştirakçıları Lənkəran rayonuna ekskursiya ediblər.
Məktəblilər Lənkəran şəhərindəki Heydər Əliyev Mərkəzində, Gənclər Mərkəzində, Tarix-Diyarşünaslıq Muzeyində, “Qoşa qala qapıları” meydanında, “Mayak” binasında, Hirkan Milli Parkında, Bayraq Meydanında, çay plantasiyalarında, sitrus bağlarında, general Həzi Aslanovun ev-muzeyində olublar.
Tur-aksiya iştirakçıları IDEA İctimai Birliyinin təşəbbüsü ilə “Hərəmiz bir ağac əkək” devizi ilə keçirilən aksiyaya qoşularaq Lənkəranın Sütəmurdov kəndinə gedən yolda 200-ə yaxın ağac əkiblər.