CƏMİYYƏT


Mağaza və evlərdən oğurluq edən iki nəfər saxlanılıb

Bakı, 20 iyul, AZƏRTAC

İyulun 16-da Pirallahı Rayon Polis Şöbəsinin (RPŞ) Post-Patrul Xidmətinin əməkdaşları xidmətdə olan vaxt ərazidəki evlərdən birinin hasarından bir nəfərin tullanaraq içəri keçdiyini müşahidə ediblər.

Daxili İşlər Nazirliyinin mətbuat xidmətindən AZƏRTAC-a bildiriblər ki, onun bu hərəkəti şübhə doğurduğundan polis əməkdaşları həmin evi nəzarətə götürüblər. Az sonra həmin şəxs əlində müxtəlif əşyalar yığılmış torba ilə eyni üsulla həyəti tərk edərkən polislər onu şübhəli kimi saxlayaraq polis şöbəsinə gətiriblər.

Araşdırmalarla onun qəsəbə sakini Vadim Mironov olması müəyyən edilib.

Aparılan tədbirlərlə onun Elxan adlı şəxslə birlikdə 86 yaşlı tənha kişinin yaşadığı həmin evdən cari ilin iyun-iyul ayları ərzində 3 dəfə ayrı-ayrı vaxtlarda oğurluq etdiyi müəyyən edilib. O, öz ifadəsində həmin evdən, ümumilikdə, 2340 manat pul, sənəd, mobil telefon, pensiya kartı, məişət əşyaları, elektrik naqili, transformator, təmir-tikinti alətləri, başqa bir evdən ayrı-ayrı vaxtlarda, ümumilikdə, 510 manat pul, bir mağazadan isə ümumi dəyəri 800 manatdan yuxarı ərzaq, spirtli və sərinləşdirici içkilər, tütün məmulatları və digər məhsullar oğurladıqlarını etiraf edib.

Əməliyyat-axtarış tədbirləri ilə Bakı şəhər sakini Elxan Kəbirli müəyyən edilib, şübhəli şəxs qismində saxlanılaraq polis şöbəsinə gətirilib. O, ifadəsində V.Mironovla birlikdə oğurluqlar etdiyini etiraf edib.

Pirallahı RPŞ-də faktla əlaqədar cinayət işi başlanılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.