İQTİSADİYYAT


Maliyyə Bazarlarına Nəzarət Palatası qanunu pozan sığorta agentlərinin lisenziyalarını ləğv edib

A+ A

Bakı, 23 sentyabr, AZƏRTAC

Azərbaycan Respublikası Maliyyə Bazarlarına Nəzarət Palatasının (MBNP) Direktorlar Şurasının 23 sentyabr 2016-cı il tarixli qərarına əsasən, 2 hüquqi şəxs və 86 nəfər fiziki şəxs sığorta vasitəçisi fəaliyyəti üçün verilmiş lisenziyalar ləğv edilib.

Maliyyə Bazarlarına Nəzarət Palatasının mətbuat xidmətindən AZƏRTAC-a bildiriblər ki, “Lider Sığorta Agentliyi” MMC-nin lisenziyasının ləğv olunmasına səbəb “Sığorta fəaliyyəti haqqında” Azərbaycan Respublikasının Qanununun 6-cı maddəsinin tələblərinə riayət etməyərək sığorta sirri hesab edilən məlumatların yayılmasına şərait yaratması və qanunun 84.1.2.3-cü maddəsinin tələblərini pozaraq cəmiyyətə lisenziya verilməsi üçün əsas götürülmüş rəhbər vəzifəyə təyin ediləcək şəxs barədə yanlış məlumatlar verməsidir.

“Lider Sığorta Agentliyi” MMC-də aparılmış yoxlama zamanı hesabatların təqdim edilməməsi və hesabatların natamam tərtib edilməsi ilə yanaşı, onların təhrif edilməsi, sığorta sirri ilə bağlı müqavilələrin rəsmiləşdirilməsi zamanı sığorta qanunvericiliyinin tələblərinə riayət edilməməsi, lisenziya verilməsi üçün əsas götürülmüş sənədlərdə əks olunmuş səhv və yanlış məlumatlarla bağlı faktlar aşkar edilib. Yoxlama zamanı müəyyən edilib ki, “Lider Sığorta Agentliyi” MMC fəaliyyət dövrü ərzində 526 762 sığorta müqaviləsi üzrə ümumilikdə 93 418 418 manat sığorta haqqı toplayıb və bunun müqabilində komisyon muzd əldə edib.

Qeyd olunanlarla yanaşı, yoxlama zamanı “Lider Sığorta Agentliyi” MMC-nin hesabatlarında məlumatların təhrif edilməsi faktı aşkar edilib. Belə ki, 2014-cü il ərzində sığorta müqavilələrinin bağlanmadığı açıqlansa da, yoxlama zamanı cəmiyyət tərəfindən 2014-cü ilin 9 ayı ərzində 157 783 müqavilə bağlandığı, 32 350 476 manat sığorta haqqının toplandığı aşkar olunub.

Direktorlar Şurasının qərarı ilə, həmçinin sığorta agenti fəaliyyəti ilə məşğul olan daha 1 hüquqi şəxs ilə yanaşı 85 nəfər fiziki şəxsin lisenziyaları ləğv edilib. Qeyd olunan şəxslərin lisenziyalarının ləğvi 9 halda könüllü, 78 halda isə məcburi qaydada olub.

Lisenziyalarının məcburi ləğvinə səbəb sığorta vasitəçilərinin Maliyyə Bazarlarına Nəzarət Palatası tərəfindən edilən rəsmi xəbərdarlıqlara baxmayaraq “Sığorta fəaliyyəti haqqında” Azərbaycan Respublikasının Qanununun tələblərin pozulması ilə əlaqədardır.

MBNP-nin Direktorlar Şurasının digər qərarına əsasən isə rüblük hesabatlarını maliyyə bazarlarına nəzarət orqanının müəyyən etdiyi formada palataya təqdim etmədiklərinə görə sığorta agentləri fəaliyyətinə lisenziya almış 78 nəfər fiziki şəxsin lisenziyalarının qüvvəsi 3 ay müddətinə dayandırılıb.

Lisenziyaları ləğv olunan sığorta agentlərinin SİYAHISI

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.