Masallı, 18 aprel, Bağır Əliyev, AZƏRTAC

“Kənd təsərrüfatı ili” çərçivəsində Masallıda çayçılığın inkişaf etdirilməsi məqsədi ilə bu il 100 hektar sahədə ən yeni texnologiyaya əsaslanan çay plantasiyası salınması üçün hazırlıq işlərinə başlanılıb. Həmin ərazidə yol, suvarma suyu, enerji infrastrukturunun yenidən qurulması nəzərdə tutulur. Yaxın gələcəkdə bu gəlirli sahənin rayonda ən azı 1400 hektara çatdırılması üçün imkanlar var. Bu qədər yaşıl çay sahəsinin salınması idxaldan asılılığı azaltmaqla yanaşı, həm də 7000-dən çox iş yerinin yaradılmasına imkan verəcək.

AZƏRTAC xəbər verir ki, bu barədə Masallı Rayon İcra Hakimiyyəti başçısı yanında şuranın ilin birinci rübünün sosial-iqtisadi inkişafı və qarşıda duran vəzifələrə həsr olunan geniş iclasında məlumat verilib.

Yığıncaqda hesabat məruzəsi ilə çıxış edən rayon icra hakimiyyətinin başçısı Rafil Hüseynov bildirib ki, bu ilin üç ayında Masallıda sosial-iqtisadi inkişaf artan templə davam edib. Rayonun inkişaf

proqramında nəzərdə tutulmuş bir sıra sosial-mədəni obyektlərin tikintisi davam etdirilib. Bu dövrdə Cəlilabad şəhərində uzunluğu 3,3 kilometr olan Nizami Gəncəvi küçəsində genişləndirilmə işlərinə başlanılıb, yeni səkilərin, müasir işıqlandırma sistemlərinin qurulması və yaşıllıq zolağının salınması davam etdirilib. 2014-cü ildə Masallı şəhərində mühüm sosial layihənin - Viləş park-bulvar kompleksinin tikintisinə start verilib, çay yatağının beton məcraya salınması işlərinə başlanılıb. Uzunluğu 750 poqonmetr olması nəzərdə tutulan park-bulvar layihəsinin başa çatdırılması Masallı şəhərinə xüsusi gözəllik verəcək. Burada müxtəlif istirahət mərkəzləri, idman meydançalarının tikintisi planlaşdırılır.

Şəhərin ərazisində ümumi sahəsi 11000 kvadratmetr olan Bayraq Meydanı da salınır. Meydanın ətrafına ümumi uzunluğu 280 poqonmetr olan hasar çəkilib, 60 metr hündürlükdə bayraq dirəyi quraşdırılıb. Bayraq Muzeyində və parkda tikinti işləri davam etdirilir. Bu dövrdə, həmçinin Kənd Təsərrüfatı Nazirliyinin Masallı rayon laboratoriya binasının, Masallı rayonlararası mühafizə bölməsinin inzibati binasının tikintisinə başlanılıb, rayon məhkəməsinin və “ASAN xidmət” mərkəzinin binalarının tikintisi üçün torpaq sahəsi ayrılıb.

Azərbaycan Respublikası Prezidentinin Sərəncamı ilə ayrılmış vəsait hesabına Masallı Tarix-Diyarşünaslıq Muzeyinin və Uşaq İncəsənət Məktəbinin tikintisinə başlanılıb.

Bildirilib ki, rüb ərzində rayon üzrə məhsul istehsalı və göstərilən xidmətlərin həcmi ötən ilin müvafiq dövrü ilə müqayisədə 1,4 faiz artaraq 116,1 milyon manat olub. Bu dövrdə sənaye məhsullarının həcmi 1,3 faiz artaraq 6,8 milyon manata, kənd təsərrüfatı məhsullarının həcmi 4,9 faiz artaraq 14,7 milyon manata çatıb. Əhaliyə göstərilən pullu xidmətlərin həcmi isə 1,9 faiz artaraq 15,6 milyon manat olub.

Rayonda iribuynuzlu mal-qaranın baş sayı 73080 başa, davarların sayı 82463 başa çatıb. Üç ayda rayonda süd istehsalı 12145 tona, ət istehsalı 1524,4 tona, yumurta istehsalı 193.25.000 ədədə çatdırılıb. Bu, ötən ilin müvafiq dövrü ilə müqayisədə xeyli çoxdur.

Rayonda 11891 hektar taxıl, o cümlədən 8143,5 hektar buğda, 3747,5 hektar arpa və 1370 hektar dənlik vələmir əkini aparılıb. Bundan əlavə, 1208 hektar kartof, 66 hektar bostan və 673 hektar tərəvəz əkilib. Hazırda tərəvəz əkini davam etdirilir.

Diqqətə çatdırılıb ki, 210 mindən çox əhalisi olan Masallı rayonunda əhalinin 90 faizə yaxını kəndlərdə yaşayır və əkinçiliklə məşğuldur. Ona görə də Masallıda kənd təsərrüfatının inkişaf etdirilməsi və gəlirli sahəyə çevrilməsi qarşıda duran ən prioritet məsələdir. Faraş tərəvəz, giləmeyvə və sitrus bitkiləri əkinlərinin genişləndirilməsi rayonda ən azı 5000 ton tərəvəz, 5000 ton sitrus meyvələri saxlama gücünə malik soyuducu anbarların, topdan və pərakəndə satış-ekspozisiya bazarının, habelə bu məhsulların ilkin emalı üçün müəssisəsinin tikilməsi zərurətini yaradıb. Tərəvəz əkini sahələrinin genişləndirilməsi, saxlama, çeşidləmə, qablaşdırma və nəqletmə kompleksinin qurulması ilə Masallının faraş tərəvəzinin təkcə yerli bazarlara deyil, böyük həcmdə qonşu ölkələrin bazarlarına da çıxarılmasına imkan verər.

Hesabat yığıncağında çıxış edənlər bu ilin birinci rübündə rayonda sosial-iqtisadi inkişaf sahəsində görülmüş işlərdən və qarşıda duran vəzifələrdən danışıb, mövcud problemlərlə bağlı təkliflərini bildiriblər.

Şura iclasında müzakirə edilən məsələ ilə bağlı müvafiq qərar qəbul edilib.