REGİONLAR
Masallıda turizm şəhərciyi salınacaq
Masallı, 9 fevral, Bağır Əliyev, AZƏRTAC
Masallı rayonunda turizmin inkişafı üçün əlverişli şərait var. Turizm şəbəkəsinin ilboyu fəaliyyətini təmin etmək məqsədilə rayonda turizm şəhərciyi salınacaq. Bu məqsədlə layihə işlərinə başlanılıb.
AZƏRTAC xəbər verir ki, bu barədə fevralın 9-da Masallı Mədəniyyət Mərkəzində ötən ilin yekunlarına və qarşıda duran vəzifələrə həsr olunmuş hesabat yığıncağında məlumat verilib.
Tədbirdə Masallı Rayon İcra Hakimiyyətinin başçısı Rafil Hüseynovun hesabat məruzəsi dinlənilib. Qeyd edilib ki, 2016-cı il Masallı rayonu üçün yaddaqalan hadisələrlə zəngin olub. Sentyabrın 3-də Prezident İlham Əliyevin Masallıya növbəti səfərini rayon sakinləri böyük sevinclə qarşılayıblar. Dövlətimizin başçısının iştirakı ilə Masallıda “ASAN həyat” kompleksi, Bayraq Meydanı, Dövlət Rəmzləri və Tarix-Diyarşünaslıq muzeyləri, Uşaq İncəsənət Məktəbi istifadəyə verilib.
Həmin səfərin nəticəsi olaraq Prezident İlham Əliyevin Sərəncamı ilə Masallı şəhərində çoxmərtəbəli yaşayış binalarının əsaslı təmiri məqsədi ilə 3 milyon manat vəsaitin ayrıldığını vurğulayan R.Hüseynov göstərilən diqqət və qayğıya görə rayon sakinləri adından dövlətimizin başçısına minnətdarlığını bildirib.
Masallının yeni inkişaf dövrünü yaşadığını bildirən R.Hüseynov regionların sosial-iqtisadi inkişafına dair üçüncü Dövlət Proqramında rayon üzrə nəzərdə tutulan tədbirlərin uğurla icra edildiyini diqqətə çatdırıb.
Masallı şəhərinin içməli su təchizatının və kanalizasiya sisteminin yenidən qurulması işlərinin aparıldığını qeyd edən icra hakimiyyətinin başçısı bu məqsədlə “Viləşçay” su anbarının aşağı hissəsində sutəmizləyici qurğunun, 5000 kubmetr həcmində su anbarının inşa edildiyini, Muğan zonası və Qızılağac istiqamətində kəndlərə içməli su xəttinin çəkilməsinə başlanıldığını bildirib.
Qeyd olunub ki, Masallı şəhərində böyük bir layihənin - Viləş Park Bulvar Kompleksinin tikintisinə də başlanılıb. Burada müxtəlif istirahət mərkəzləri, idman meydançalarının inşası və uşaq əyləncə qurğularının quraşdırılması planlaşdırılır.
Hesabat ilində 140 şagird yerlik Çayqıraq, 140 şagird yerlik Dəlləkoba, 120 şagird yerlik Köhnə Zuvand və 180 şagird yerlik Şatıroba kənd ümumi orta məktəbləri, Xıl, Səmidxan, Gəyəçöl, Yeyənkənd və Babaser kənd həkim məntəqələri tikilərək istifadəyə verilib. Hazırda Lürən, Məmmədoba həkim məntəqələrinin tikintisi davam etdirilir. Rayon mərkəzi xəstəxanasının əsaslı təmiri başa çatdırılaraq istifadəyə hazır vəziyyətə gətirilib.
Dövlət Proqramı əsasında qaz xəttinin çəkilişi davam etdirilib, Sirəbil, Qızılağac, Hüseynhacılı, Məmmədoba, Öncəqala, Xıl və Sığıncaq kəndləri təbii qazla təchiz olunub. Sığdaş, Xanalyan, Qodman, Babaküçə, Qasımlı, II Yeddioymaq, Bala Təklə və Şıxlar kəndlərində isə daşıyıcı orta təzyiqli qaz kəmərlərinin çəkilişi başa çatdırılıb. Hazırda 5 yaşayış məntəqəsində qaz xətlərinin çəkilişi işləri aparılır. Rayonda 103 yaşayış məntəqəsindən 92-si qazla təmin olunub.
Bildirilib ki, hesabat dövründə rayon üzrə məhsul istehsalı və göstərilən xidmətlərin həcmi 1,6 faiz artaraq 571,3 milyon manat olub. Bu dövrdə sənaye məhsullarının həcmi 2,1, kənd təsərrüfatı məhsullarının həcmi 2,8, əhaliyə göstərilən pullu xidmətlərin həcmi 3,3 faiz artıb. Ötən il rayonda 3027 yeni iş yeri açılıb, onlardan 2599-u daimi iş yerləridir.
Hesabat məruzəsi ətrafında müzakirələrdə Milli Məclisin üzvləri Elmira Axundova, Nəriman Əliyev, Musa Qasımlı, rayon kənd təsərrüfatı idarəsinin rəisi Seymur Nuriyev, Masallı regional “ASAN xidmət” Mərkəzinin rəhbəri Vidadi Muxtarov, rayon mərkəzi xəstəxanasinin baş həkimi Cəlil Nəzərov, Dini Qurumlarla İş üzrə Dövlət Komitəsinin Masallı rayonu üzrə nümayəndəsi Miryəhya Bədirov və başqaları çıxış ediblər.
Sonra yığıncaqda çıxış edən Prezident Administrasiyasının məsul işçisi Habil Əzənmədov ötən il ölkəmizdə, o cümlədən Masallı rayonunda sosial-iqtisadi inkişaf sahəsində qazanılmış uğurlardan danışaraq, qarşıda duran vəzifələri diqqətə çatdırıb.
Yığıncaq iştirakçıları adından Prezident İlham Əliyevə müraciət qəbul edilib.
Sonda rayonun ictimai-siyasi həyatında fərqlənən bir qrup şəxsə fəxri fərmanlar və qiymətli hədiyyələr verilib.