Bakı, 2 may, AZƏRTAC

Mayın 2-də Əmlak Məsələləri Dövlət Komitəsi (ƏMDK) tərəfindən növbəti hərrac keçirilib.

Komitədən AZƏRTAC-a bildiriblər ki, hərracda özəlləşdirilən əmlaklardan 5-i kiçik dövlət müəssisəsi, 11-i istifadəsiz qeyri-yaşayış sahəsidir. Bakı şəhəri üzrə 2 kiçik dövlət müəssisəsi, 3 istifadəsiz qeyri-yaşayış sahəsi, respublikanın digər şəhər və rayonları üzrə 3 kiçik dövlət müəssisəsi və 8 istifadəsiz qeyri-yaşayış sahəsi özəlləşdirilib.

Budəfəki hərracda ən yüksək qiymətə özəlləşdirilən əmlak Sabunçu rayonunda yerləşən ictimai iaşə obyekti olub. Belə ki, həmin əmlak 220 min manata özəlləşdirilib. Bundan başqa, paytaxtın Xəzər rayonunda yerləşən tibb məntəqəsi də qiyməti ilə fərqlənir: 190 min manat. Özəlləşdirilən kiçik dövlət müəssisələrindən ikisi paytaxtın Sabunçu və Xəzər rayonlarında, biri Gəncədə, biri Cəlilabadda, digəri isə Mingəçevirdə yerləşir.

Hərracda özəlləşdirilmiş istifadəsiz qeyri-yaşayış sahələrindən 3-ü paytaxtın Suraxanı, Yasamal, Nizami rayonlarında, 3-ü Qubada, digərləri isə Sumqayıt, Sabirabad, Lənkəran və Ağdaşdadır. İstifadəsiz qeyri-yaşayış sahələrindən ən yüksək qiymətə özəlləşdirilən əmlak 60 min manat olub. Budəfəki hərracda özəlləşdirilən belə əmlakların ümumi faydalı sahəsi 9 kvadratmetrlə 110 kvadratmetr, qiymətləri isə 1500 manatla 60 min manat arasında dəyişib.

Hərrac vasitəsilə özəlləşdirməyə açıq elan edilən dövlət əmlakına investisiya cəlb olunur, onların fəaliyyəti bərpa edilir. İnvestorlar baxımından isə hərraclar sərmayəçilərin müəssisələrə sahib olmaqla bağlı əlçatanlığını artırır. Vətəndaşlar da öz büdcəsinə uyğun kiçik obyektləri özəlləşdirməklə biznesini qura bilirlər. Bu isə iqtisadi sahədə aktivliyin artmasına gətirib çıxarır. Başqa sözlə, proses daşınmaz əmlak bazarında dinamikaya, müəssisələrin fəaliyyətinin genişlənməsinə, istehsal həcminin atmasına, kadr potensialının formalaşmasına, yeni iş yerlərinin açılmasına şərait yaradır. Mühüm üstünlük isə belə daşınmaz əmlakların hərracda özəlləşdirilməsindən qısa müddət sonra mülkiyyət hüquqlarının dövlət qeydiyyatı barədə reyestrdən çıxarış sənədi ilə təmin olunmasıdır.

Prosedurun sadəliyi investorların marağını cəlb edən əsas amillərdən biridir. Hərraca qatılmaq üçün Özəlləşdirmə portalı üzərindən əmlakı seçib sifariş vermək kifayət edir. Portalda hər bir əmlakın mövqeyi, yerləşməsi, mövcud vəziyyəti barədə fotoşəkillər və məlumatları var. Hərracların elanı, gedişatı və nəticələri barədə komitənin saytı, Özəlləşdirmə portalı, eləcə də facebook sosial şəbəkəsindəki rəsmi səhifə və “Privatization.az” səhifəsi vasitəsilə əhaliyə mütəmadi məlumatlar verilir.

Əmlak Məsələləri Dövlət Komitəsi tərəfindən keçirilən hərraclar, əmlak sahibi olmaq istəyən hər bir vətəndaş üçün böyük imkandır. Belə hərraclara qatılaraq istənilən şəxs əmlak sahibi ola bilər.

Komitə tərəfindən növbəti hərrac 10 may tarixində keçiriləcək. Hərraca çıxarılan əmlaklar barədə məlumatı aşağıdakı linkdən almaq olar:

http://privatization.az/index.php/az/component/content/article?layout=edit&id=1517