İQTİSADİYYAT
Mayın 12-də Koroğlu Nəqliyyat Mübadilə Mərkəzi fəaliyyət göstərməyəcək
Bakı, 11 may, Elvin Camalov, AZƏRTAC
IV İslam Həmrəyliyi Oyunlarının açılış mərasimi ilə əlaqədar mayın 12-də Koroğlu Nəqliyyat Mübadilə Mərkəzi fəaliyyət göstərməyəcək.
AZƏRTAC xəbər verir ki, bu barədə Bakı Nəqliyyat Agentliyinin (BNA) ictimaiyyətlə əlaqələr və maarifləndirmə şöbəsinin müdiri Mais Ağayev deyib.
O bildirib ki, bununla əlaqədar, həmin gün səhər saat 06:00-dan Bakıətrafı kənd və qəsəbələrdən Koroğlu Nəqliyyatı Mübadilə Mərkəzinə gələn marşrut xətti üzrə avtobusların hərəkət trayektoriyası müəyyən olunmuş istiqamətlər - metronun “Qara Qarayev”, “Neftçilər” və “Həzi Aslanov” stansiyalarına doğru dəyişdiriləcək. Belə ki, 54, 62, 107, 131, 172, 173 nömrəli marşrut xətti üzrə hərəkət edən avtobuslar Bakıxanov dəmiryol stansiyasından keçməklə “Neftçilər” metro stansiyasına istiqamətləndiriləcək. 139, 148, 163, 166, 184, 198, 204, 216, 214, 217 nömrəli marşrut xətti üzrə hərəkət edən avtobuslar Bakıxanov dəmiryol stansiyasından keçməklə “Qara Qarayev” metro stansiyasına, 101, 136, 150, 160, 171, 187 nömrəli marşrut xətti üzrə hərəkət edən avtobuslar isə Hava Limanı-Zığ beton yolundan keçməklə “Həzi Aslanov” metro stansiyasına yönləndiriləcək.
M.Ağayevin sözlərinə görə, dəyişikliyə əsasən, mayın 12-də 1 və 13 nömrəli marşrut xətti üzrə hərəkət edən avtobuslar saat 16:00-dan etibarən müvəqqəti olaraq fəaliyyətini dayandıracaqlar.
“Bundan əlavə 2 nömrəli marşrut xətti üzrə hərəkət edən avtobuslar saat 16:00-dan etibarən Bakı Beynəlxalq Avtovağzal Kompleksindən son dayanacağı Səməd Vurğun bağı olmaqla, 4 nömrəli marşrut xətti üzrə fəaliyyət göstərən avtobuslar İ.Hidayətzadə küçəsindən “28 May” metro stansiyasına qədər fəaliyyət göstərəcək. 5 nömrəli marşrut xətti ilə hərəkətdə olan avtobuslar saat 16:00-dan etibarən “Nəriman Nərimanov” – “28 May” metro stansiyasına qədər, 21 nömrəli marşrut xətti saat 16:00-dan etibarən “Əhmədli” metro stansiyasından son dayanacağı “Xətai” metro stansiyasına qədər, 32 nömrəli marşrut xətti isə E.Süleymanov küçəsindən “Xətai” metro stansiyasına qədər fəaliyyət göstərəcək”, - deyə M.Ağayev vurğulayıb.
BNA rəsmisi qeyd edib ki, 46 nömrəli marşrut xətti başlanğıc dayanacağı İ.İsmayılov küçəsi (Günəşli) olmaqla son dayanacağı “Xətai” metro stansiyasına qədər, 88 nömrəli marşrut xətti başlanğıc dayanacağı 7-ci mikrorayon olmaqla Hökumət evi – Z.Əliyeva – R.Behbudov küçələri istiqamətində, 125 nömrəli marşrut xətti isə saat 16:00-dan etibarən Lökbatan NMM-dən Azneft dairəsinə qədər hərəkət edəcək.
M.Ağayev bildirib ki, H1 nömrəli marşrut xətti 28 May küçəsi – R.Behbudov – S.Rəhimov – Xətai prospekti – Babək prospekti – N.Rəfiyev – A.Cəlilov – Nobel prospekti – Zığ beton yolu – Heydər Əliyev Beynəlxalq Aeroportu, əks istiqamətdə isə Heydər Əliyev Beynəlxalq Aeroportu – Zığ beton yolu – Nobel prospekti – A.Cəlilov – K.Səfərəliyeva – 28 May küçəsi – “28 May” metro stansiyasına qədər fəaliyyət göstərəcək.