REGİONLAR
Mədəniyyət və turizm naziri: Siyəzən rayonunda turizmin inkişaf etdirilməsi üçün bir sıra işlər görüləcək VİDEO
Siyəzən, 28 yanvar, Elxan Yusifli, AZƏRTAC
Yanvarın 28-də mədəniyyət və turizm naziri Əbülfəs Qarayev Siyəzən şəhərindəki mədəniyyət evində rayon ictimaiyyətinin nümayəndələri, ziyalılar, mədəniyyət və turizm sahəsində çalışan insanlarla görüşüb.
AZƏRTAC xəbər verir ki, görüşdə çıxış edən Əbülfəs Qarayev ölkəmizin 25 illik müstəqillik tarixində keçdiyi inkişaf yolundan, bu yolda qarşıya çıxan çətinliklərdən danışıb. Bildirilib ki, ulu öndər Heydər Əliyevin 1993-cü ildə hakimiyyətə gəlməsi ilə Azərbaycanın strateji inkişaf xətti müəyyən edilib və respublikamız müstəqilliyin ilk illərinin ağır böhranından çıxmağa nail olub. Ümummilli Liderin siyasi kursunu layiqincə davam etdirən Prezident İlham Əliyevin rəhbərliyi ilə ölkəmiz yeni inkişaf yoluna qədəm qoyub. Dinamik iqtisadi tərəqqi, bütün sahələrdə əldə edilən nailiyyətlər Azərbaycanın dünyada nüfuzunun artmasına, o cümlədən tarixi-mədəni irsimizin, zəngin incəsənətimizin daha geniş miqyasda tanıdılması və təbliğinə də zəmin yaradıb. Bu gün ölkəmiz regionun lider dövlətinə çevrilib. Azərbaycan "Eurovision 2012" mahnı müsabiqəsi, I Avropa Oyunları, Ümumdünya Mədəniyyətlərarası Dialoq Forumu və digər böyük beynəlxalq tədbirlərə, festival, müsabiqə və sərgilərə ev sahibliyi edir.
Əbülfəs Qarayev vurğulayıb ki, ölkəmiz bütün xalqların sülh, qardaşlıq və mehriban şəraitdə yaşaması ilə dünyaya tolerantlıq nümunəsidir. Son illər ölkəmizdə bu istiqamətdə mühüm layihələr, mötəbər tədbirlər gerçəkləşib. Bu baxımdan Prezident İlham Əliyev tərəfindən 2016-cı ilin Azərbaycanda “Multikulturalizm ili” elan edilməsi təsadüfü deyil.
Nazir son dövrlər dünyada yaşanan qlobal iqtisadi böhranın, dünya bazarında neftin qiymətinin kəskin şəkildə aşağı düşməsinin ölkəmizə də təsirindən danışıb. Qeyd edilib ki, milli valyutanın devalvasiyaya uğraması nəticəsində yaşanan proseslər əhalidə müəyyən narahatlıq yaradır. Amma biz inanırıq ki, bu müvəqqəti çətinliklərdən də layiqincə çıxacağıq. Prezident İlham Əliyev tərəfindən bütün əlaqədar qurumlara bu çətinliklərin aradan qaldırılması, süni qiymət artımına son qoyulması barədə tapşırıqlar verilib. Eyni zamanda, iqtisadiyyatın qeyri-neft sektorunun daha da inkişaf etdirilməsi ilə bağlı mühüm addımlar atılır.
Əbülfəs Qarayev turizm sahəsinin inkişafına daha böyük diqqət ayrıldığını da diqqətə çatdırdı. Bildirdi ki, ölkəmizin şimal bölgəsinin geniş turizm imkanları var. Siyəzən rayonunda da turizmin inkişaf etdirilməsi üçün bir sıra işlər görüləcək.
Sonda nazir ictimaiyyət nümayəndələrini maraqlandıran sualları cavablandırıb.