REGİONLAR
Məhəmməd Tağı Sidqinin anadan olmasının 160 illiyinə həsr edilmiş oxucu konfransı
AZƏRTAC xəbər verir ki, tədbiri Naxçıvan Muxtar Respublika Kitabxanasının direktoru, tarix üzrə fəlsəfə doktoru Aytəkin Qəhrəmanova açaraq görkəmli maarifçi, böyük mütəfəkkir Məhəmməd Tağı Sidqinin xalqımızın maariflənməsi uğrunda mübarizə aparan ilk maarif fədailərindən olduğunu bildirib.
Kitabxananın kütləvi iş şöbəsinin müdiri Yeganə Rüstəmova M.T.Sidqinin həyat və yaradıcılığı barədə məruzə edib. Bildirilib ki, 1854-cü ildə Ordubad şəhərində anadan olan Məhəmməd Tağı Sidqi ilk təhsilini buradakı mədrəsədə alıb, klassik Şərq poeziyasını və fəlsəfəsini öyrənib. Azərbaycanda milli və dünyəvi məktəbin, maarifçilik hərəkatının inkişafına mühüm töhfələr verən, xalq müəllimi kimi böyük şöhrət qazanan Məhəmməd Tağı Sidqi 1892-ci ildə Ordubadda yeni tipli “Əxtər” məktəbi yaradıb, 1894-cü ildə Naxçıvanda “Tərbiyə” məktəbinin əsasını qoyub. Bu məktəblər xalqın maariflənməsində mühüm əhəmiyyət kəsb edib, Naxçıvanın bütöv bir ziyalı nəslini yetişdirib.
M.T.Sidqinin lirikasında Vətənimizin füsunkar təbiətinin təsvir və tərənnümünə həsr olunmuş peyzaj lirikası xüsusi yer tutur. Lirikanın bu növü Sidqinin yalnız qəzəllərində deyil, digər poetik formalarda qələmə aldığı şeirlərində də özünü göstərir.
Konfransda Naxçıvan Dövlət Universitetinin müəllimi, filologiya elmləri doktoru Əsgər Qədimov, Naxçıvan Özəl Universitetinin müəllimi, filologiya üzrə fəlsəfə doktoru Nurlana Əliyeva, Naxçıvan Dövlət Texniki Kollecinin müəllimi Səadət Qocayeva da çıxış edərək görkəmli maarifçinin həyat və yaradıcılığından söhbət açıblar.
Sonda tədbir iştirakçıları “Məhəmməd Tağı Sidqi-160” mövzusunda sərgiyə baxıblar.