Bakı, 26 may, Məhərrəm Əlioğlu, AZƏRTAC

Məhkəmələrin qərarları ilə müsadirə olunmuş 358 kiloqramdan artıq narkotik vasitə, psixotrop maddə və onların prekursorları mayın 26-da Binəqədi rayonundakı Bünyad Sərdarov adına Maşınqayırma Zavodunda məhv edilib.

AZƏRTAC xəbər verir ki, narkotiklərin məhv olunması prosesində Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının, Daxili İşlər və Milli Təhlükəsizlik nazirliklərinin, Dövlət Gömrük Komitəsinin, Dövlət Sərhəd Xidmətinin əməkdaşları və KİV nümayəndələri iştirak ediblər.

Dövlət Komissiyasının işçi qrupunun rəhbəri Fəqan Şahverdiyev deyib ki, bu gün 199 məhkəmə hökmü ilə müsadirə edilən, barəsində məhvetmə qərarı çıxarılan 358 kiloqramdan çox müxtəlif növ narkotik vasitələr, o cümlədən 3620 ədəd çətənə bitkisi, (27 kiloqram 448,509 qram heroin, 145 kiloqram 124,55 qram marixuana, 46 kiloqram 776,867 qram həşiş qətranı, 104 kiloqram 932,806 qram tiryək, 15 kiloqram 852 qram xaş-xaş kütləsi, 200,571 qram kokain, 358,756 qram psixotrop maddələr) yandırma üsulu ilə məhv edilib. Məhv olunan müxtəlif növ narkotik vasitələrin qara bazarda ümumi dəyəri 5 milyon manat təşkil edir.

Bildirilib ki, Azərbaycan Prezidentinin 2013-cü il 24 iyun tarixli Sərəncamı ilə təsdiq edilmiş “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”ndan irəli gələn vəzifələrin yerinə yetirilməsi ilə bağlı Dövlət Komissiyasının işçi qrupu aidiyyəti nazirlik, komitə və təşkilatlarla birgə bir sıra qabaqlayıcı profilaktiki tədbirlər həyata keçirib.

Diqqətə çatdırılıb ki, cari ilin birinci rübündə narkotiklərlə mübarizə sahəsində hüquq mühafizə orqanları tərəfindən 942 fakt aşkar olunub. Onlardan 273-nü satış, 661-ni saxlama, 17-sini əkin, 6-sını digər faktlar təşkil edir. Aşkarlanmış faktlar üzrə qanunsuz dövriyyədən ümumi çəkisi 351 kiloqram 519,551 qram olan müxtəlif növ narkotik vasitələr götürülüb. Müsadirə olunan narkotik vasitələrin, psixotrop maddələrin və onların prekursorlarının 280 kiloqram 638,932 qramını marixuana, 49 kiloqram 343,755 qramını tiryək, 13 kiloqram 801,91 qramını heroin, 7 kiloqram 608,613 qramını həşiş, 126,237 qramını digərləri, 90,149 qramını isə psixotrop maddə təşkil edib.