MƏDƏNİYYƏT
Meksika Senatında Novruz Bayramı təntənəli şəkildə qeyd olunub
Vaşinqton, 24 mart, AZƏRTAC
Meksika Senatının binasında Beynəlxalq Novruz Bayramı Günü təntənəli şəkildə qeyd olunub. Tədbir Meksika Senatının Xarici Əlaqələr Komissiyasının təşkilatçılığı və Azərbaycan, İran, Pakistan, Türkiyə və Gürcüstan səfirliklərinin dəstəyi ilə keçirilib.
Senatın prezidenti Ernesto Kordero tədbirdə iştirak edən çoxsaylı qonaqları salamlayaraq baharın gəlişi və torpağın oyanmasından xəbər verən, 300 milyondan artıq insan tərəfindən qeyd edilən, dünya mədəniyyətinin qeyri-maddi irsi olan Novruz bayramının Azərbaycan, İran, Pakistan, Türkiyə və Gürcüstan xalqları ilə birgə qeyd edilməsindən məmnunluğunu bildirib. O, Meksikanın bu ölkələrlə mədəniyyət sahəsində mübadiləsinin onlarla münasibətlərə, o cümlədən ticari-iqtisadi sahədə əlaqələrə yeni təkan verə biləcəyinə əminliyini vurğulayıb. Senatın prezidenti bu əlaqələri sülh, mehriban qonşuluq, tolerantlıq prinsiplərinə uyğun olaraq daha da inkişaf etdirməyə çağırıb.
Senatın Xarici Əlaqələr Komissiyasının sədri Laura Anxelika Roxas Hernandez Novruz bayramının minilliklərlə ölçülən qədim tarixə malik olduğunu, onun UNESCO tərəfindən Dünya Qeyri-Maddi Mədəni İrsi Siyahısına daxil edildiyini, BMT Baş Assambleyasının qərarı ilə beynəlxalq səviyyədə qeyd edildiyini bildirib. O, Novruz bayramının sülh, dostluq və qarşılıqlı hörmətin təcəssümü olduğunu deyib.
Senatın Asiya-Sakit Okean Ölkələri ilə Əlaqələr Komissiyasının sədri Teofilo Torres Meksikanın tədbirdə təmsil olunan ölkələrlə əlaqələrinin yüksək səviyyədə, dostluq və əməkdaşlıq ruhunda olduğunu məmnunluqla qeyd edərək bu əlaqələrin daha da genişlənəcəyinə ümidini ifadə edib.
Azərbaycanın Meksikadakı müvəqqəti işlər vəkili Məmməd Talıbov tədbirdə çıxış edərək Novruz bayramının Azərbaycanda çox qədim kökləri olduğunu, ölkəmizdə bu əziz bayramın çox geniş və təntənəli şəkildə qeyd edildiyini bildirib. Diplomat bu bayramın qonaqpərvərlik, qarşılıqlı hörmət, səmimiyyət, dostluq, mərhəmət və bərabərlik kimi dəyərlərinin xalqımızın mənəvi həyatına nüfuz etdiyini söyləyib. O, Azərbaycanda müxtəlif mədəniyyət təmsilçilərinin əsrlər boyu sülh və əmin-amanlıq şəraitində yaşadığını vurğulayıb. Müvəqqəti işlər vəkili Azərbaycanın qlobal miqyasda mədəniyyətlərarası dialoqun təşviq edilməsinə böyük töhfə verdiyini qeyd edib. M.Talıbov, eyni zamanda, qonaqları Novruz bayramı ilə bağlı Azərbaycanda mövcud olan adət-ənənələrlə tanış edib.
Tədbirdə, həmçinin İran, Pakistan və Türkiyə səfirləri, Gürcüstan səfirliyinin müşaviri çıxış edib.
Sonra səfirliklər adından Meksika Senatına hədiyyə edilən, sülh rəmzi olan zeytun ağacının əkilməsi mərasimi keçirilib.
Tədbir zamanı ölkəmizin mədəniyyəti, mətbəxi və tarixinə aid materiallar paylanılın, qonaqlar Novruz bayramı ilə bağlı ölkəmizin ənənələri ilə tanış edilib, onlara ənənəvi Novruz süfrəsinin şirniyyatları təqdim olunub. Azərbaycan masası qonaqlar tərəfindən xüsusi maraqla qarşılanıb.
Eyni zamanda, Azərbaycanda Novruz şənliklərini əks etdirən videomaterial və şəkillər nümayiş etdirilib.
Tədbir Meksika KİV-ləri tərəfindən geniş işıqlandırılıb.
Yusif Babanlı
AZƏRTAC-ın xüsusi müxbiri
Vaşinqton