REGİONLAR


Məktəblilər Göygöl və Şəmkir rayonlarından zəngin təəssüratlarla ayrılıblar VİDEO

A+ A

Göygöl-Şəmkir, 14 noyabr, Rauf Hacıyev, AZƏRTAC

Respublikamızın şəhər və rayonlarının IX-XI sinif şagirdləri üçün “Ölkəmizi tanıyaq” devizi ilə keçirilən maarifləndirici tur-aksiya çərçivəsində Gəncə-Göygöl-Şəmkir marşrutu üzrə ekskursiyaya çıxan Sumqayıt, Qaradağ, Xəzər, Pirallahı, Qubadlı, Masallı, Lənkəran, Astara, Lerik və Yardımlıdan olan məktəblilər noyabrın 14-də Göygöl və Şəmkir rayonları ilə tanış olublar.

AZƏRTAC xəbər verir ki, əvvəlcə tur–aksiya iştirakçıları Göygöl rayonuna gəliblər. Qonaqları şəhər mərkəzində Göygöl Rayon İcra Hakimiyyətinin, mədəniyyət və turizm şöbəsinin əməkdaşları, həmçinin şəhər ictimaiyyətinin nümayəndələri qarşılayıblar.

Şəhərlə tanışlığa tur-aksiya iştirakçıları Heydər Əliyev Mərkəzindən başlayıblar. Əvvəlcə məktəblilər burada Ümummilli Liderin həyatını, siyasi fəaliyyətinin ayrı-ayrı dövrlərini əks etdirən foto və sənədlərə baxıb, mərkəzin fəaliyyəti ilə tanış olublar. Şagirdlərə bildirilib ki, muzeydə gənclər üçün xalçaçılıq və bədii biçmə-tikmə evləri, həmçinin kinozal fəaliyyət göstərir.

Daha sonra Göygöl Rayon Tarix-Diyarşünaslıq Muzeyinə gələn məktəblilərə məlumat verilib ki, vaxtilə alman koloniyaçıları tərəfindən tikilən kilsə hazırda muzey binası kimi fəaliyyət göstərir. Burada nümayiş olunan tarixi eksponatlar, xüsusilə vaxtilə almanlar tərəfindən istifadə edilən məişət əşyaları, geyim nümunələri və tarixi fotolar şagirdlərdə böyük maraq yaradıb.

Azərbaycan Dövlətinin Rəmzləri Muzeyi ilə tanışlıq da tur-aksiya iştirakçıları üçün yaddaqalan olub. Məktəblilər muzeydə Azərbaycanın dövlətçilik tarixinin ayrı-ayrı dövrlərini əks etdirən eksponatlara baxıblar. Məlumat verilib ki, muzeydə Azərbaycanın tarixi torpaqlarında mövcud olmuş ayrı-ayrı dövlətlərin xəritələri və bayraqları, o cümlədən müxtəlif illərdə qəbul olunmuş konstitusiyalar nümayiş etdirilir.

İştirakçıların Göygöl rayonu ilə tanışlığı çərçivəsinə səfər etdikləri sonuncu məkan füsunkar təbiət möcüzəsi - Göygöl olub. Azərbaycan təbiətinin incisi ilə tanışlıq şagirdlərə xoş təsir bağışlayıb. Dağların qoynu ilə ensiz dolama yollardan, sıx meşələrdən keçdikdən sonra dəniz səviyyəsindən 1556 metr yüksəklikdə insanın gözləri qarşısında açılan ecazkar təbiət mənzərəsi məktəblilərdə bu yerlərə böyük maraq yaradıb.

Göygöllə tanışlıqlarını başa vuran tur-aksiya iştirakçıları daha sonra Şəmkir rayonuna səfər ediblər.

Məktəblilərin rayonla tanışlığı orta əsr Şəmkir qalasından başlayıb. Qalanın qalıqları ilə tanış olan şagirdlərə məlumat verilib ki, böyük İpək Yolu üzərində yerləşən bu qədim şəhər AMEA-nın Arxeologiya və Etnoqrafiya İnstitutunun əməkdaşları tərəfindən aşkarlanıb. Əvvəllər kiçik ərazidə aparılan arxeoloji qazıntı işləri sonradan 28 hektar ərazidə davam etdirilib. Az müddətdə ərazidən böyük şəhər mədəniyyətinin qalıqları ilə bərabər xeyli sayda maddi mədəniyyət nümunələri də üzə çıxarılıb. Hazırda qədim şəhər ərazisində arxeoloji qazıntı işləri beynəlxalq arxeoloqlarla birlikdə davam etdirilir.

Sonra Şəmkir şəhərinin mərkəzinə gələn məktəbliləri Heydər Əliyev Mərkəzinin qarşısında rayon rəhbərliyi qarşılayıb. Şagirdlər Heydər Əliyev Mərkəzində Ulu Öndərin zəngin irsini əks etdirən fotoşəkillərə, Ümummilli Liderə həsr olunan kitablara baxıblar. Məlumat verilib ki, mərkəzdə ümummilli lider Heydər Əliyevin müxtəlif vəzifələrdə olduğu dövrlərdə işlədiyi kabinetlərin və iş otaqlarının bənzərləri yaradılıb. Bayraq meydanında tarixən Azərbaycanda mövcud olan dövlətlərin bayraqlarının və nişanlarının əks olunduğu guşələr də tur-aksiya iştirakçılarında böyük maraq yaradıb.

Məktəblilər Şəmkirdə vaxtilə alman koloniyaçıları tərəfindən inşa olunan lüteran kilsəsi ilə də tanış olublar. Burada şagirdlərə Şəmkirin əsasını qoyan alman koloniyaçıları haqqında geniş məlumat verilib.

Sonda tur-aksiya iştirakçıları IDEA İctimai Birliyinin təşəbbüsü ilə “Hərəmiz bir ağac əkək” devizi ilə keçirilən aksiyaya qoşularaq Şəmkir şəhər parkında 500-ə yaxın şam ağacı əkiblər.

“Ölkəmizi tanıyaq” maarifləndirici tur-aksiyasının iştirakçısı, Astaradan olan qrupun rəhbəri Emin Fətəliyev məktəblilərin Şəmkir rayonundan zəngin təəssüratlarla ayrıldıqlarını bildirib.

Astara rayon Təngərüd kənd tam orta məktəbinin XI sinif şagirdi Bəxtiyar Səmədov isə deyib ki, bu layihə onların ölkəmiz haqqında biliklərinin artırılmasında mühüm rol oynayır. “Həmyaşıdlarım adından tur-aksiyanın təşkilatçılarına minnətdarlığımı bildirirəm. Həqiqətən də ölkəmizin hər bir guşəsi gözəldir. Doğma Vətənimizi qarış-qarış gəzir, tarixi abidələrlə tanış oluruq. Bu abidələr haqqında kitablardan çox oxumuşuq. İndi isə əyani şəkildə görür, biliklərimizi daha da zənginləşdiririk”, - deyə məktəbli vurğulayıb.

Göygöl və Şəmkir rayonlarından zəngin təəssüratlarla ayrılan tur-aksiya iştirakçıları noyabrın 15-də Gəncədən öz rayonlarına yola düşəcəklər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.