Qəbələ, 17 mart, Şahnəzər Bəşirov, AZƏRTAC

Respublikamızın şəhər və rayonlarının IX-XI sinif şagirdləri üçün “Ölkəmizi tanıyaq” devizi ilə keçirilən maarifləndirici tur-aksiyalar davam edir.

AZƏRTAC xəbər verir ki, İsmayıllı-Qəbələ-Şəki marşrutu üzrə tur-aksiyada iştirak edən Bərdə, Ağcabədi və Mingəçevirdən olan məktəblilər martın 17-də Qəbələnin tarixi abidələri, turizm obyektləri, mənzərəli yerləri, adət-ənənələri, eləcə də son illər inşa edilən istehsal müəssisələri və sosial obyektləri ilə tanış olublar.

Qəbələyə səfər edən şagirdlərin üz tutduqları ilk məkan Heydər Əliyev Mərkəzi olub. Mərkəzi ziyarət edən məktəblilər burada ulu öndər Heydər Əliyevin həyatını və siyasi fəaliyyətini əks etdirən fotoşəkillərə və sənədlərə baxıblar. Şagirdlər muzeyin qarşısında kollektiv xatirə şəkli çəkdiriblər.

Tur-aksiya iştirakçıları sonra “Tufandağ” Qış-Yay Turizm İstirahət Kompleksində, Heydər Əliyev adına Konqres Mərkəzində, Tarix-Diyarşünaslıq Muzeyində, “Beltmann” piano fabrikində, Qəbələ konserv zavodunda olublar.

Nic qəsəbəsinə gələn məktəblilərə buradakı “Cotari” Alban-Udin kilsəsi barədə məlumat verilib. Bildirilib ki, kilsə tarixi baxımdan qədim və əhəmiyyətli abidələrdən biridir. Nic qəsəbəsi tolerantlığın kiçik bir modeli hesab edilir. Qəsəbədə üç kilsə və iki məscid var. Altı min əhalisi olan qəsəbədə 3700 udin yaşayır. Ümumilikdə isə ölkəmizdə 4000 udin yaşayır ki, onların 300-ü Oğuz və Bakıda qeydiyyatdadır. Dünyada yaşayan udinlərin sayı isə 10 minə yaxındır. Nic qəsəbəsində udinlər öz dilini, dinini, adət-ənənələrini 2500 ildir ki, qoruyub saxlayırlar. Nicdəki məktəblərin ibtidai siniflərində udin dili tədris olunur.

Həmçinin şagirdlər Çuxur Qəbələ kəndinə gəlib, qədim Qəbələ şəhərinin xarabalıqları və ərazidə aparılan arxeoloji qazıntılarla da maraqlanıblar.

Məktəblilər Qəbələyə səfərlərinin sonunda beşulduzlu “Qafqaz Riverside”, “Qafqaz Resort”, “Qafqaz Yeddi Gözəl”, “Qafqaz Karvansaray” otelləri, “Qəbələnd” İstirahət və Əyləncə Mərkəzi, rayonda yaradılan müasir turizm infrastrukturu, bölgənin füsunkar təbiəti ilə də tanış olublar.

Şagirdlər xoş təəssüratlarla Şəki şəhərinə yola düşüblər.