ELM VƏ TƏHSİL
“Məktəblinin dostu” pilot layihəsi üzrə imtahanlar keçirilib
Bakı, 3 oktyabr, AZƏRTAC
“Məktəblinin dostu” pilot layihəsi üzrə imtahanların test mərhələsi keçirilib.
Təhsil Nazirliyindən AZƏRTAC-a bildiriblər ki, Azərbaycan Memarlıq və İnşaat Universitetində keçirilən imtahanlarda 810-dək namizəd iştirak edib. Bir saat yarım davam edən imtahanda namizədlərə ümumi və psixoloji olmaqla 50 sual təqdim edilib. Namizədlərin əsasən Azərbaycan tarixi, coğrafiyası, mədəniyyəti, məntiqi düşünmə qabiliyyəti sahələri üzrə bilikləri yoxlanılıb.
Seçilmiş namizədlər müsahibə mərhələsinə buraxılacaqlar. Müsahibə mərhələsində ictimai fəaliyyətdə fəal iştirak edən, könüllü kimi müxtəlif proqramlarda çalışan, xarici dil biliklərinə yiyələnən namizədlərə üstünlük veriləcək. Müsahibədən uğurla keçən namizədlər təlimlərə cəlb olunacaqlar. Təlimin sonunda qiymətləndirmə nəticələrinə əsasən seçilmiş namizədlər “Məktəblinin dostu” təyin ediləcəklər.
“Məktəblinin dostu”nun əsas vəzifələri müəllim və şagirdlər üçün təhlükəsiz mühit yaratmaq, ilk tibbi və psixoloji yardım göstərmək, mütəmadi olaraq şagird, valideyn, müəllim, təlim-tərbiyə müəssisələrinin kollektivi və rəhbərliyi ilə maarifləndirmə və diaqnostik işlərin aparılması olacaq. Bununla yanaşı, “Məktəblinin dostu” seçilən şəxslər hər bir yaş mərhələsində uşaqların hərtərəfli şəxsi keyfiyyətlərinin və intellektual inkişafının təmin edilməsi, onlarda özünütərbiyə və özünüinkişaf bacarığının formalaşdırılmasında iştirak etməlidirlər.
“Məktəblinin dostu” layihəsi Təhsil Nazirliyi və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə təşkilatçılığı ilə həyata keçirilir. Layihə ilk mərhələdə Bakı şəhərindəki 30 ümumi təhsil müəssisəsində reallaşdırılacaq.
Gələcəkdə layihənin əhatə dairəsinin genişləndirilməsi nəzərdə tutulur.