Naxçıvan, 18 noyabr, Rauf Əliyev, AZƏRTAC

Naxçıvanda keçirilən “Mərkəzi Araz hövzəsi tarix və mədəniyyət fonunda” adlı beynəlxalq elmi simpozium başa çatıb.

AZƏRTAC xəbər verir ki, Azərbaycan Milli Elmlər Akademiyasının Tarix İnstitutu, Naxçıvan Dövlət Universiteti, Türkiyə Respublikası Nazirlər Kabinetinin Atatürk Kültür, Dil və Tarix Yüksək Qurumu, Atatürk Araşdırma Mərkəzi və İqdır Universitetinin birgə təşkilatçılığı ilə keçirilən elmi tədbirin bağlanış mərasimində çıxış edən Atatürk Araşdırma Mərkəzinin rəhbəri Mehmet Ali Beyhan mötəbər beynəlxalq elmi simpoziumun yüksək səviyyədə təşkil olunduğunu vurğulayıb.

Mehmet Ali Beyhan bildirib ki, ümumilikdə, simpoziuma 100-ə yaxın elmi məruzə təqdim olunub, lakin onlar arasından 58-i seçilib. Bu mövzular Mərkəzi Araz hövzəsinin tarixi, mədəniyyəti, hərbi-siyasi, iqtisadi inkişafı və digər əhəmiyyətli sahələri əhatə edib.

Qeyd olunub ki, Mərkəzi Araz hövzəsi zəngin mədəniyyətə, qədim tarixə malik olduğu üçün bu mövzularda məruzələr maraqla qarşılanıb, ciddi müzakirələr aparılıb, yekun nəticələr əldə olunub. İstər Türkiyədən, istərsə də Azərbaycandan olan alimlər həmin müzakirələrdə fəal iştirak edib, təkliflər səsləndiriblər. Naxçıvan Dövlət Universitetinin tələbələri də məruzələri və aparılan müzakirələri maraqla izləyiblər.

Atatürk Araşdırma Mərkəzinin rəhbəri deyib: “Biz bir daha xatırladıq ki, Mərkəzi Araz hövzəsi coğrafiyasında bəşəriyyət tarixinin böyük bir sivilizasiyanın yaradılması ilə bərabər, burada qanlı hadisələr də baş verib. Xüsusən, ermənilər bölgədə dəfələrlə soyqırımı həyata keçiriblər. Həmin soyqırımı aktları Naxçıvanı və Şərqi Anadolunu əhatə edib. Bu, tarixi faktlarla da öz təsdiqini tapıb”.

Mehmet Ali Beyhan beynəlxalq elmi simpoziumun yüksək səviyyədə təşkilinə görə minnətdarlığını bildirib.

“Mərkəzi Araz hövzəsi tarix və mədəniyyət fonunda” adlı beynəlxalq elmi simpoziumun məqsədinə nail olduğunu qeyd edən Azərbaycan Milli Elmlər Akademiyası Tarix İnstitutunun direktoru, AMEA-nın müxbir üzvü Yaqub Mahmudov deyib ki, Türkiyə və Azərbaycan alimlərinin bir sıra sahələr üzrə birgə elmi tədbirlər keçirmələri və qarşılıqlı elmi əməkdaşlıq şəraitində fəaliyyət göstərmələri hər iki ölkə üçün faydalıdır. Belə mühüm bir tədbirin Naxçıvanda keçirilməsi isə böyük əhəmiyyət kəsb edir. Çünki qədim diyar dünya mədəniyyətinin yarandığı önəmli məkanlardan biridir. Naxçıvan təkcə Azərbaycanın deyil, bütövlükdə türk dünyasının tarixində özünəməxsus yer tutur. Burada böyük türk mədəniyyəti formalaşıb. Qədim dövrlərdən bəri türk diyarı kimi dünyada şöhrət qazanmış Naxçıvan sivilizasiyanın beşiyi olub.

Yaqub Mahmudov Naxçıvanın tarixən türk dünyasında birləşdirici rol oynadığını, Azərbaycan dövlətçilik ənənələrinin yaşadıldığı məkan olduğunu vurğulayaraq qeyd edib ki, hazırda qüdrətli Türkiyənin türk dünyası ilə yeganə quru sərhədi Naxçıvanladır. Alim xatırladıb ki, 2009-cu il oktyabrın 3-də Türkdilli Ölkələrin Dövlət Başçılarının IX Zirvə Toplantısı Naxçıvanda keçirilib və bu, təsadüfi deyil. IX Zirvə Toplantısında qəbul edilən qərarlar üzv ölkələr arasında əməkdaşlığın güclənməsində mühüm rol oynayıb. Məhz həmin tarixi toplantı zamanı imzalanmış “Türkdilli Dövlətlərin Əməkdaşlıq Şurasının yaradılması haqqında” Naxçıvan Sazişi bu təşkilatın yaradılmasının əsasını qoyub. Yəni, Naxçıvan türk dünyasının həmrəyliyinin, birliyinin təcəssümü olan bir sazişin imzalandığı məkan kimi tarixə düşüb. Bu beynəlxalq elmi simpoziumu isə iki qardaş dövlətin elminin zirvə toplantısı kimi qiymətləndirmək olar.

Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov bildirib ki, beynəlxalq elmi simpoziumda tarixi məsələlərlə yanaşı, ədəbiyyat və memarlıq əsərləri barədə dəyərli elmi araşdırmalar əsasında hazırlanmış məruzələrin dinlənilməsi mötəbər elmi tədbirin əhəmiyyətini daha da artırır. Naxçıvan Dövlət Universitetində müvafiq ixtisaslar üzrə təhsil alan tələbələrin simpoziumda fəal iştirakı isə müasir gəncliyimizin tariximizə, mədəniyyətimizə böyük maraq göstərdiyini bir daha sübut edir.

“Beynəlxalq elmi simpoziumda mühüm elmi nəticələr əldə olunub. Simpoziumun yüksək səviyyədə təşkil edilməsi Naxçıvan Muxtar Respublikasının nüfuzlu beynəlxalq tədbirlərin keçirilməsində zəngin təcrübəyə malik olduğunu bir daha göstərdi”, – deyən Saleh Məhərrəmov vurğulayıb ki, bu gün muxtar respublikada elmin, təhsilin inkişafı, milli-mənəvi dəyərlərin qorunması, gələcək nəsillərə ötürülməsi istiqamətində həyata keçirilən tədbirlər davamlı xarakter alıb.

Sonda beynəlxalq elmi simpoziumunun iştirakçılarına sertifikatlar verilib.