İQTİSADİYYAT


Mərkəzi Bank: Fiziki şəxslərin əmanətlərinin dollarlaşması 73,4 faizə enib

Bakı, 5 avqust, AZƏRTAC

Yanvar-iyun aylarında inflyasiya amillərini nəzərə alaraq pul bazasının artım kanalları idarəetməyə götürülüb, pul bazası pul siyasətinin başlıca əməliyyat lövbəri olub.

AZƏRTAC Mərkəzi Bankın 2017-ci ilin yanvar-iyun ayları üzrə Pul Siyasəti İcmalına istinadən xəbər verir ki, hesabat dövründə bank özünün likvidlik əməliyyatlarının aparılması zamanı, məhz pul bazası üzrə hədəfə əsaslanıb. Əsas məqsəd pul təklifi kanallarını tənzimləmək və bu yolla inflyasiyanın yüksəlməsinin qarşısını almaq olub.

Monetar şərait ikinci rübdə nisbətən yumşalsa da, ümumilikdə dövr ərzində neytral olub. İqtisadiyyatın, o cümlədən fiskal sektorun pula olan tələbinə adekvat olaraq pul siyasətinin başlıca əməliyyat hədəfini təşkil edən pul bazası 2017-ci ilin ötən dövründə 5,3 faiz artıb və birinci yarımilliyin sonuna 8274.5 milyon manat təşkil edib. Bu, ödəniş sisteminin sabitliyini təmin etməklə bərabər iqtisadiyyatın kreditləşdirilməsi imkanlarını genişləndirən amildir.

Dövr ərzində dövriyyədə olan nağd pul kütləsi (bank sistemindən kənar nağd pul və bankların kassalarındakı nağd pul) 5,6 faiz, manatla müxbir hesablar isə 1,6 faiz artıb. Dövrün sonuna manatla pul multiplikatoru 1,38 təşkil edib. Birinci yarımillikdə manatla geniş pul kütləsi (M2) 1 faiz azalaraq dövrün sonuna 11435.9 milyon manat təşkil edib.

Manatla pul kütləsinin (M2) strukturunda nağd pul kütləsi, fiziki şəxslərin əmanətləri və hüquqi şəxslərin depozitləri fərqli dinamika nümayiş etdiriblər. Belə ki, dövr ərzində nağd pul kütləsi 6,2 faiz, fiziki şəxslərin manat əmanətləri 21,2 faiz artıb, hüquqi şəxslərin manat depozitləri isə 21,9 faiz azalıb. Manatla müddətli depozitlər dövr ərzində 16 faiz, tələb olunanadək depozitlər isə 3,7 faiz azalıb.

Hesabat dövrü ərzində geniş pul kütləsi (M3) 0,4 faiz artıb və dövrün sonuna 20973 milyon manat təşkil edib. Cari ildə bank depozitlərinin dollarlaşması səviyyəsində əhəmiyyətli dəyişiklik baş verməyib. Belə ki, xarici valyutada əmanət və depozitlərin M3 pul aqreqatında xüsusi çəkisi ilin əvvəli ilə müqayisədə 0,9 faiz bəndi artaraq birinci yarımilliyin sonuna 45,6 faiz təşkil edib. Xarici valyutada depozitlərin cəmi əmanət və depozitlərdə xüsusi çəkisi isə ilin əvvəlində 64,4 faiz təşkil etdiyi halda yarımilliyin sonuna 67,2 faiz təşkil edib.

Hesabat dövründə fiziki şəxslərin manatla əmanətləri 21,2 faiz artıb, xarici valyutada əmanətləri isə 19,5 faiz azalıb. Nəticədə, fiziki şəxslərin əmanətlərinin dollarlaşması səviyyəsi ilin əvvəlindəki 79,6 faizdən 73,4 faizə enib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.