CƏMİYYƏT


“Məzun evi”ndə gənclərin məşğulluğu üçün xalça və tikiş sexləri açılıb

Bakı, 13 iyul, AZƏRTAC

Əmək və əhalinin sosial müdafiəsi naziri Səlim Müslümov Beynəlxalq Miqrasiya Təşkilatının nümayəndələri ilə birlikdə Dövlət Sosial Müdafiə Fondunun Abşeron rayonundakı Masazır qəsəbəsindəki “Məzun evi” sosial müəssisəsində mənzillə təmin edilmiş valideyn himayəsindən məhrum gənclərin məşğulluğunun artırılması məqsədilə yaradılmış xalça və tikiş sexləri ilə tanış olub.

Nazirlikdən AZƏRTAC-a verilən məlumata görə, dövlət uşaq müəssisələrinin məzunu olan, hər iki valideynini itirmiş və valideyn himayəsindən məhrum gənclər üçün yaradılan “Məzun evi” Prezident İlham Əliyevin onlara xüsusi qayğısının və Azərbaycanın Birinci vitse-prezidenti Mehriban Əliyevanın humanist təşəbbüsünün nəticəsidir. Sosial müəssisənin sakinləri üçün müasir tələblərə uyğun yaşayış şəraiti yaradılıb, bütün məişət avadanlığı ilə təmin olunmuş mənzillər təqdim edilib. Hazırda 120 mənzilli daha bir “Məzun evi” yaşayış binasının tikintisi aparılır.

Yeni binaya köçən gənclərin bir çoxu ailə həyatı qurub. Sakinlərdən 51-i ailəlidir. Həmin ailələrdə 50-yə yaxın uşaq böyüyür. Hazırda tikilən növbəti yaşayış binasında onlar üçün uşaq bağçası, binanın ətrafında isə məzunlar üçün idman kompleksi və məktəb binasının inşası da nəzərdə tutulub.

Bu barədə beynəlxalq təşkilatın nümayəndələrinə məlumat verən nazir qeyd edib ki, “Məzun evi”ndə gənclərin yaşayışı daim diqqət mərkəzində saxlanılır, onların üzləşdikləri problemlərin həlli, cəmiyyətə fəal inteqrasiya olunmaları sahəsində konkret tədbirlər görülür: “Onların fəal məşğulluq tədbirlərinə cəlb edilməsi və məşğulluqlarının təminatı diqqət mərkəzindədir. Müəssisədəki ştat vahidlərində və ictimai-iaşə xidməti sahələrində 20 gənc işlə təmin olunub. Burada yaşayan gənclərdən 30-u yaşıllaşdırma müəssisəsində, 25-i “Məzun evi” üçün tikilən növbəti binanın, 10-u binanın yaxınlığında yerləşən məcburi köçkünlər üçün yaşayış kompleksinin inşasında, 6-sı karton fabrikində işləyir. Digər məzunlar da yaxın ərazilərdə yerləşən müxtəlif müəssisələrdə münasib işlə təmin olunublar. Gənclərin bir qismi ali məktəblərdə təhsil alır. Ali təhsil alandan sonra ixtisaslı mütəxəssislərın də işlə təmin olunması üçün zəruri tədbirlər görüləcək.

Xalça və tikiş sexlərinin yaradılması da “Məzun evi”nin sakinlərinin məşğulluq təminatının həlli məqsədinə xidmət edir. Nazir xalça sexinin Beynəlxalq Miqrasiya Təşkilatının ölkəmizdəki nümayəndəliyinin yardımı ilə yaradıldığını qeyd edərək söyləyib: “Xalça sexində 18, tikiş sexində isə 10 məzun işləyəcək. Burada çalışan gənclərin xalçaçılıq və tikişçilik peşələri üzrə hazırlıq kurslarına cəlb edərək peşə sirlərini öyrənməsi qayğısına qalmışıq.”

Nazir yaxın vaxtlarda “Məzun evi”ndə bir sıra peşələr üzrə hazırlıq kurslarının təşkil olunmasının nəzərdə tutulduğunu da qeyd edib.

Digər çıxış edənlər ölkəmizdə hər iki valideynini itirmiş və valideyn himayəsindən məhrum gənclərin mənzillə təminatı, onlara göstərilə qayğını ölkəmizdə həyata keçirilən kompleks tədbirlərin bir hissəsi olduğunu vurğulayıblar.

Daha sonra tədbir iştirakçıları “Məzun evi”ndə yaradılmış xalça və tikiş sexləri ilə tanış olublar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.