ELM VƏ TƏHSİL
Milli Dirçəliş Günü xalqımızın milli birlik və həmrəylik günüdür
Bakı, 17 noyabr, AZƏRTAC
Azərbaycan Dövlət Pedaqoji Universitetində (ADPU) 17 noyabr-Milli Dirçəliş Gününə həsr edilmiş “Vətəndən pay umma!” mövzusunda tədbir keçirilib.
ADPU-dan AZƏRTAC-a bildirilib ki, bu ali məktəbin rektoru, professor Cəfər Cəfərov universitetin kollektivini Milli Dirçəliş Günü münasibətilə təbrik edib, uğurlar arzulayıb.
Rektor qeyd edib ki, xalqımız həmin gün Azadlıq Meydanına axışaraq Azərbaycanı uzun müddət müstəmləkə əsarətində saxlayan Sovet imperiyasına qarşı ilk etiraz səsini qaldırıb, milli birlik və vətəndaş həmrəyliyi nümayiş etdirib.
Məlumat verilib ki, həmin dövrdə Ermənistanda və Qarabağın dağlıq hissəsində Azərbaycana qarşı yönəldilmiş soyqırımı sovet ordusu tərəfindən dəstəklənirdi. Silahlanmış erməni quldurları əliyalın, dinc əhalini müdhiş bir amansızlıqla qətlə yetirirdilər. Mərkəzi hakimiyyət qarşısında acizlik göstərən o zamankı kommunist rəhbərliyi xalqın və Vətənin həqiqi mənafeyi keşiyində dura bilmirdi. Həmin günlərdə sovet müstəmləkə rejimi şəraitində repressiyalara məruz qalmış milli şüur yenidən oyandı və Azərbaycan yenidən öz müstəqilliyinə qovuşdu. Öz dövlət müstəqilliyini bərpa edən Azərbaycan sonradan bir daha parçalanmaq və milli müstəqilliyini itirmək təhlükəsi ilə qarşılaşdı. Yalnız ulu öndər Heydər Əliyevin xalqın təkidli tələbi ilə yenidən hakimiyyətə gəlməsi bu təhlükəni aradan qaldırdı, ölkədəki xaos və qarşıdurmaya son qoyuldu. Müdrik siyasi xadim Heydər Əliyev müstəqil, hüquqi, demokratik, dünyəvi Azərbaycan dövlətini qurdu, gücləndirdi və onu beynəlxalq aləmdə nüfuzlu bir dövlətə çevirdi. Bu gün ölkəmiz Prezident İlham Əliyevin rəhbərliyi ilə həyatımızın bütün sahələrində uğurla inkişaf edir, müasirləşir, daha da qüdrətli olur, onun beynəlxalq siyasi nüfuzu durmadan yüksəlir.
Sonra mövzu ilə bağlı videoçarx nümayiş olunub.
Tədbir bədii hissə ilə davam etdirilib.