CƏMİYYƏT
Milli Ekoloji Monitorinq Sisteminin təkmilləşdirilməsinə dair tvinninq layihəsinin təqdimatı keçirilib
Bakı, 15 fevral, AZƏRTAC
Fevralın 15-də Ekologiya və Təbii Sərvətlər Nazirliyində (ETSN) “Avropa İttifaqının nümunəvi təcrübələri əsasında Azərbaycanda Milli Ekoloji Monitorinq Sisteminin (MEMS) təkmilləşdirilməsi” adlı tvinninq layihəsinin təqdimatı keçirilib.
ETSN-dən AZƏRTAC-a verilən məlumata görə, layihə Avropa təcrübəsinin öyrənilməsi sahəsində nəzəri xarakter daşıyır və Azərbaycanda ekoloji fəaliyyətin, xüsusilə hava monitorinqlərinin keyfiyyətinin nəzəri cəhətdən təkmilləşdirilməsinə xidmət edəcək. Layihə Avropa Qonşuluq Siyasətinin Azərbaycan üçün Fəaliyyət Planında qeyd olunmuş prioritet tədbirlərin həyata keçirilməsinə öz töhfəsini verəcək.
Layihənin məqsədi strateji ekoloji siyasətin planlaşdırılması və uyğunluğa nəzarəti dəstəkləyən yüksəkkeyfiyyətli məlumatların təmin edilməsi və ekoloji monitorinq sisteminin gücləndirilməsi ilə Azərbaycanda ekoloji fəaliyyətin təkmilləşdirilməsindən ibarətdir.
Layihə çərçivəsində ölkəmizdə ətraf mühitin monitorinqi sahəsində həyata keçirilən tədbirlər, yanaşma metodları təhlil ediləcək, müsbət dəyərlər saxlanılmaqla Avropa İttifaqının bu sahədəki qabaqcıl təcrübəsinin tətbiqi araşdırılacaq və ölkəmizdə ətraf mühitin monitorinqinin və qiymətləndirmə metodologiyalarının müasirləşdirilməsinin imkanları öyrəniləcək. Həmçinin sözügedən layihə ekoloji məlumatların toplanması, təhlili və əlaqələndirilməsi üzrə qərar qəbulu üçün yüksəkkeyfiyyətli və etibarlı məlumat təmin edən informasiya sisteminin işlənib hazırlanmasında ETSN-ə dəstək olacaq.
Tvinninq layihəsi 4 komponent üzrə həyata keçiriləcək -institusional çərçivə, ekoloji monitorinq sistemləri, potensialın artırılması və təlim, praktiki və pilot təcrübələr.
Avropa İttifaqı tərəfindən maliyyələşdirilən tvinninq layihəsinin icra müddəti 27 aydır və birliyə üzv olan dövlətlərin, o cümlədən Latviyanın Ətraf Mühit, Geologiya və Meteorologiya İnstitutu, Avstriyanın Ətraf Mühit Agentliyi tərəfindən dəstəklənir və Finlandiyanın Ətraf Mühit İnstitutu ilə əməkdaşlıq çərçivəsində Finlandiya Meteorologiya İnstitutu konsorsiumu tərəfindən həyata keçiriləcək.
Təqdimat mərasimində ekologiya və təbii sərvətlər naziri Hüseyn Bağırov, Avropa İttifaqının Azərbaycandakı nümayəndəliyinin beynəlxalq əməkdaşlıq bölməsinin rəhbəri Yeroen Villems, Finlandiya, Avstriya və Latviya Respublikalarının ölkəmizdəki səfirliyinin nümayəndələri, Finlandiyadan üzv dövlət üzrə layihə rəhbəri Harri Pietarila, həmçinin aidiyyəti dövlət qurumlarının, digər tvinninq layihələrinin nümayəndələri iştirak edib.