İQTİSADİYYAT


Milli Məclisin aqrar siyasət, hüquq siyasəti və dövlət quruculuğu komitələrinin birgə iclası keçirilib VİDEO

A+ A

Bakı, 27 oktyabr, AZƏRTAC

Oktyabrın 27-də Milli Məclisin aqrar siyasət və hüquq siyasəti və dövlət quruculuğu komitələrinin birgə iclası keçirilib.

Aqrar siyasət komitəsinin sədri Eldar İbrahimov bildirib ki, iclasın gündəliyinə Meşə, Cinayət, İnzibati Xətalar, Şəhərsalma və Tikinti məcəllələrində, “Ətraf mühitin mühafizəsi haqqında” və “Ətraf mühitə dair informasiya almaq haqqında” qanunlarda dəyişikliklər edilməsi barədə qanun layihələri daxil edilib. Bu dəyişikliklər “Yaşıllıqların mühafizəsi haqqında” Qanunun tətbiqi ilə əlaqədardır.

Meşə Məcəlləsinə, “Ətraf mühitin mühafizəsi haqqında” və “Ətraf mühitə dair informasiya almaq haqqında” qanunlara təklif olunan dəyişikliklər barədə məlumat verən Milli Məclisin iqtisadi qanunvericilik şöbəsinin müdir müavini Vilayət Əlizadə bildirib ki, sözügedən qanunlarda “ağac-kol bitkiləri” ifadəsi “yaşıllıqlar” sözü ilə əvəz edilir. Bundan başqa, bəzi maddələr yeni redaksiyada verilir, bəzi maddələrdə isə redaktə xarakterli dəyişikliklər aparılır ki, bu da ölkəmizdə ətraf mühitin mühafizəsinin gücləndirilməsinə xidmət edir.

Sonra çıxış edən ekologiya və təbii sərvətlər nazirinin müavini Firdovsi Əliyev deyib ki, ətraf mühitin mühafizəsi daim ölkə rəhbərliyinin diqqət mərkəzindədir. Bu sahədə görülən işlərin nəticəsidir ki, Azərbaycan 2016-cı ildə ətraf mühitin mühafizəsinə görə 180 ölkə arasında 31-ci yerdədir. Hazırda Azərbaycanda 9 milli park fəaliyyət göstərir ki, bu da qürurverici faktdır.

Sonra hüquq siyasəti və dövlət quruculuğu komitəsinin sədri Əli Hüseynli Cinayət, İnzibati Xətalar, Şəhərsalma və Tikinti məcəllələrinə təklif olunan dəyişikliklər barədə məlumat verib. Bildirib ki, bu dəyişikliklər də ətraf mühitin mühafizəsi ilə bağlıdır. Belə ki, Cinayət Məcəlləsinə təklif olunan yeni dəyişikliyə görə, yaşıllıqların kəsilməsi ilə bağlı qanun pozuntularına xüsusi mülkiyyətdə olan həyətyanı və bağ sahələrindəki yaşıllıqların, habelə kənd təsərrüfatı məhsulları istehsalı üçün istifadə edilən bitkilərdən ibarət yaşıllıqların (əkinlərin) kəsilməsi (götürülməsi) halları şamil edilmir.

Bundan başqa, Cinayət və İnzibati Xətalar məcəllələrində ətraf mühitə vurulan zərərə görə nəzərdə tutulan cərimələrin məbləği bir neçə dəfə artırılır.

Şəhərsalma və Tikinti Məcəlləsinə əlavə edilən yeni maddədə deyilir ki, tikintinin layihə sənədlərində layihədən əvvəlki və sonrakı dövrlərdə ərazidəki yaşıllıqların vəziyyətini göstərən məlumatlar tam və dürüst əks edilməli, yaşıllıqların salınması mütləq həmin yaşayış məntəqəsinin yaşıllıqla təmin edilməsi normasına uyğun olmalıdır.

Deputatlar Eldar Quliyev, Novruz Aslan, Cavanşir Paşazadə, Rövşən Rzayev, Tahir Kərimli, Məlahət İbrahimqızı, Fəzail Ağamalı, Rafael Cəbrayılov və Vüsal Hüseynov çıxışlarında bildiriblər ki, təklif olunan dəyişikliklər ölkəmizdə ətraf mühitin daha yaxşı qorunmasına və özəl sektorun inkişafına kömək edəcək.

Müzakirələrdən sonra gündəlikdəki 6 məsələnin hamısı Milli Məclisin iclasında müzakirəyə tövsiyə edilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.