Bakı, 21 aprel, AZƏRTAC

Milli Məclisin elm və təhsil komitəsinin üzvləri Avropa İttifaqının beynəlxalq ekspertləri ilə görüşüblər.

Peşə təhsili üzrə Azərbaycan Respublikasının Qanun layihəsi üzrə işçi qrupunun üzvlərinin, aidiyyəti dövlət qurumlarının nümayəndələrinin, beynəlxalq əlaqələr üzrə mütəxəssislərin, təhsil ekspertlərinin iştirak etdikləri tədbirdə Milli Məclisin elm və təhsil komitəsinin sədri, akademik İsa Həbibbəyli görülmüş işlərdən, qarşıda duran vəzifələrdən danışıb.

AZƏRTAC xəbər verir ki, Azərbaycan Milli Elmlər Akademiyasının (AMEA) Ədəbiyyat İnstitutunda keçirilən görüşdə akademik İ.Həbibbəyli son illərdə Azərbaycanda elm və təhsil sahələrinin inkişafından, dövlət rəhbərliyi tərəfindən qarşıya qoyulmuş prioritet istiqamətlərdən danışıb, bu gün ölkəmizdə peşə təhsilinə də xüsusi əhəmiyyət verildiyini diqqətə çatdırıb. Bu məqsədlə ölkə rəhbərliyi tərəfindən həyata keçirilən məqsədyönlü tədbirlərin əhəmiyyətindən danışan akademik peşə təhsili üzrə Azərbaycan Respublikası Qanun layihəsinin hazırlıq mərhələsində olduğunu, bu məqsədlə işçi qrupunun üzərinə düşən vəzifələrin xüsusi önəm daşıdığını bildirib.

Akademik İ.Həbibbəyli qeyd olunan qanun layihəsinin hazırlanmasında müasir dünya və Avropa təcrübəsinin öyrənildiyini, eləcə də Şərq ölkələrinin mövcud modellərinin nəzərdən keçirildiyini və Azərbaycan reallıqlarının əsas kimi qəbul edildiyini nəzərə çatdırıb.

Təhsil Nazirliyi yanında Peşə Təhsili üzrə Dövlət Agentliyinin direktoru Famil Mustafayev ölkəmizdə peşə təhsilinə dövlət dəstəyindən və qarşıya qoyulmuş vəzifələrdən söz açıb.

Avropa İttifaqının eksperti, Azərbaycanda peşə təhsilinə və təliminə Avropa İttifaqının dəstəyi layihəsinin qrup rəhbəri Herman Sonneveld çıxış edərək peşə təhsili üzrə Avropa modelindən danışıb, müasir dünya standartları haqqında məlumat verib.

Sonra Avropa İttifaqının Hüquqi çərçivə üzrə baş eksperti Roger Hessel Avropa İttifaqı tərəfindən maliyyələşdirilən Azərbaycanda peşə təhsili və təliminə dəstək layihəsini təqdim edib. Dahi Nizami Gəncəvinin “Mahir bir palançı olsa da insan, Yaxşıdır yarımçıq papaqçılıqdan” məşhur misralarını xatırladan avropalı qonaq mükəmməl peşə təhsilinin hər bir ölkənin qarşısına duran prioritet istiqamətlərdən biri olduğunu diqqətə çatdırıb.

Avropa peşə təhsilinə dərindən bələd olan, hüquqi məsələlər üzrə uzunmüddətli mütəxəssis Firdovsi Mütəllimov və tərcüməçi, layihə köməkçisi İlkin Cəlilov görüş iştirakçılarını maraqlandıran sualları cavablandırıblar.

Müzakirələrdə Milli Məclisin deputatları, elm və təhsil komitəsi sədrinin müavini, AMEA-nın müxbir üzvü Bəxtiyar Əliyev, Asim Mollazadə, Ülviyyə Ağayeva və Rəşad Həsənov mövzu üzrə fikir və mülahizələrini bildiriblər. Milli Məclisin elm və təhsil komitəsində peşə təhsili üzrə işçi qrupun üzvləri, Peşə təhsili üzrə Dövlət Agentliyinin işəgötürənlərlə əlaqələr və peşəyönümü şöbəsinin müdiri Eldar Salahov, peşə təhsili müəssisələrinin idarəedilməsi, keyfiyyətin təminatı və monitorinq şöbəsinin müdiri Amil Əlili, həmin şöbənin baş məsləhətçisi Məcid Bayramlı, təhsil standartları və təhsil proqramı üzrə baş məsləhətçi İlqar Nadirov, Azərbaycan Respublikası Təhsil İnstitutunun peşə-ixtisas təhsili şöbəsinin müdiri Rəsul Əsgərov ölkəmizdəki peşə məktəbləri, onların hazırkı durumu, müxtəlif səpkili statistik göstəriciləri barədə məlumat verib, qanun layihəsi üzrə təkliflərini səsləndiriblər.

Görüşdə Azərbaycanda Peşə təhsili üzrə Strateji Yol Xəritəsindən irəli gələn məsələlərin hazırlanacaq Qanun layihəsində əksini tapması zərurəti xüsusi vurğulanıb.

Sonda akademik İ.Həbibbəyli yaxın günlərdə bir neçə aidiyyəti dövlət qurumlarının sahə mütəxəssislərini cəlb etməklə işçi qrupu tərəfindən təhlillər aparılacağını və eləcə də ölkəmizdə fəaliyyət göstərən sahibkarlıq subyektlərinin yaxından iştirakını təmin etməklə mövcud əlaqələrin daha da genişləndiriləcəyini, peşə təhsili üzrə birgə fikir mübadiləsi və diskussiyalar aparılacağını diqqətə çatdırıb. Avropalı ekspertlərlə keçirilən görüşü və dialoqu yüksək dəyərləndirən komitə sədri belə səmərəli müzakirələrin bundan sonrakı mərhələlərdə də uğurla davam etdiriləcəyinə əminliyini bildirib.