CƏMİYYƏT


Milli Qurtuluş Günü tarixi yaddaşımızın ən şanlı səhifələrindən biridir

Bakı, 14 iyun, AZƏRTAC

15 İyun - Milli Qurtuluş Günü Azərbaycan dövlətçilik tarixində mühüm hadisədir. Həmin günün müəllifi Azərbaycanın böyük dövlət xadimi ulu öndər Heydər Əliyevdir. Məhz iyunun 15-də ümummilli lider Heydər Əliyev hakimiyyətə yenidən gəldikdən sonra Azərbaycan dövlətçiliyi dağılmaqdan xilas oldu. Biz həmin günü tarixi yaddaşımızın ən şanlı səhifələrindən biri kimi xatırlayırıq. Milli Qurtuluş Günü Azərbaycan dövlətçiliyinin yenidən doğuluşu günüdür. Gənclər həmin günü unutmamalı, o dövrdəki hadisələri dərindən öyrənməlidirlər.

AZƏRTAC xəbər verir ki, bu fikirlər 15 İyun - Milli Qurtuluş Günü münasibətilə Nərimanov Rayon İcra Hakimiyyətinin və Yeni Azərbaycan Partiyası (YAP) Nərimanov rayon təşkilatının təşəbbüsü ilə Azərbaycan Respublikası Müharibə, Əmək və Silahlı Qüvvələr Veteranlar Təşkilatında keçirilən tədbirdə səsləndirilib.

Tədbirdə rayon rəhbərliyi, Milli Məclisin deputatları, rayonun idarə, müəssisə və təşkilatlarının, ictimaiyyətin nümayəndələri, elm və mədəniyyət xadimləri, veteranlar, gənclər iştirak ediblər.

“Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu Milli Qurtuluş Gününün tarixi əhəmiyyətindən, müasir müstəqil Azərbaycanın inkişafında ümummilli lider Heydər Əliyevin misilsiz xidmətlərindən danışıb. Bildirilib ki, 1993-cü ilin iyununda ölkədə böhran ən acınacaqlı həddə çatmışdı və belə bir anda xalqı vətəndaş qarşıdurmasından, səfalətdən, ölkəni parçalanmaq təhlükəsindən xilas etmək gücündə olan yalnız şəxs - Heydər Əliyev xalqına və dövlətinə sahib çıxdı. Həmin dövrdə qədirbilən xalqımız birləşərək ölkəni bürümüş acınacaqlı vəziyyətə qarşı iradəli gücünü ortaya qoydu, təkidlə bu dahi şəxsiyyətin hakimiyyətə qayıdışını tələb etdi. Bugünkü əmin-amanlıq, sabitlik, iqtisadi inkişaf üçün böyük fədakarlıqlar göstərən ulu öndər Heydər Əliyev xalqımızın təkidli tələbi ilə hakimiyyətə qayıdaraq uzaqgörən və müdrik siyasəti ilə Azərbaycanı ağır bəlalardan xilas etdi.

Milli Məclisin deputatı Adil Əliyev ümummilli lider Heydər Əliyevin hakimiyyətə qayıdışının xalqımızda ruh yüksəkliyi yaratdığını vurğulayıb. O, həmin dövrün Azərbaycanın ən şərəfli tarixi kimi yaddaşlarda əbədi olaraq qalacağına, ulu öndər Heydər Əliyevin xatirəsinin xalqımızın qəlbində daim yaşayacağına əminliyini ifadə edib.

A.Əliyev Ulu Öndərin siyasi hakimiyyətə qayıdışı ilə Azərbaycanda müasir müstəqil dövlət quruculuğunun, iqtisadi islahatların, neft strategiyasının təməlinin qoyulduğu, Ümummilli Liderin yorulmaz fəaliyyəti, yürütdüyü müdrik siyasət nəticəsində müstəqilliyimizin dönməz xarakter aldığı, hüquqi, demokratik və dünyəvi dövlət quruculuğu, milli ordunun formalaşdırılması, beynəlxalq aləmdə Azərbaycanın demokratik imicinin artması sahəsində böyük işlərin görüldüyünü diqqətə çatdırıb. Qeyd edilib ki, məhz Heydər Əliyevin uzaqgörən siyasətinin nəticəsində Azərbaycanın iqtisadi qüdrəti artır, ölkəmizdə ictimai-siyasi sabitlik, onun beynəlxalq aləmdəki mövqeləri möhkəmlənir, xalqımızın sosial vəziyyəti günbəgün yaxşılaşır.

Digər çıxış edənlər Ulu Öndərin Azərbaycan xalqının tarixində əvəzsiz xidmətlərindən bəhs ediblər. Əsası ümummilli lider Heydər Əliyev tərəfindən qoyulmuş müdrik siyasətin respublikamızda bütün sahələri əhatə edən inkişafın, beynəlxalq arenada qazanılan yüksək nailiyyətlərin hazırda Ulu Öndərin siyasi kursunun ən layiqli davamçısı Prezident İlham Əliyev tərəfindən uğurla davam etdirildiyi bildirilib.

Natiqlər Ulu Öndərin fəaliyyəti sayəsində hüquqi, demokratik, dünyəvi dövlət quruculuğu yolunda irəliləyən müstəqil respublikamızda vətəndaş cəmiyyətinin formalaşması, insanların azad yaşaması, qanunun aliliyinin təmin edilməsi üçün yüksək tələblərə cavab verən normativ hüquqi bazanın yaradıldığını diqqətə çatdırıblar.

Tədbirdə xalqını sonsuz məhəbbətlə sevən ümummilli lider Heydər Əliyevin bütün həyatını, zəngin dövlətçilik təcrübəsini Azərbaycanın inkişaf etmiş sivil dövlətlər səviyyəsinə yüksəlməsinə həsr etdiyi vurğulanıb. Bu gün dövlətimizin başçısı İlham Əliyevin rəhbərliyi ilə müstəqil Azərbaycanın daha da inkişaf edərək dünyanın ən qüdrətli ölkələri sırasına çıxaraq xalqımızın firavan gələcəyə və tezliklə böyük zəfərlərə doğru qürurla irəliləyəcəyinə inam ifadə olunub.

Sonda YAP-ın sıralarına yeni qəbul olunan şəxslərə üzvlük vəsiqələri, rayonun fəal gənclərinə fəxri fərman və hədiyyələr təqdim edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.