ELM VƏ TEXNOLOGİYA


Milli iqtisadiyyat və iqtisadiyyatın əsas sektorları üzrə strateji yol xəritəsi müzakirə olunub VİDEO

A+ A

Bakı, 22 sentyabr, AZƏRTAC

Sentyabrın 22-də Azərbaycan Milli Elmlər Akademiyası (AMEA) rəyasət heyətinin “Milli iqtisadiyyat və iqtisadiyyatın əsas sektorları üzrə strateji yol xəritəsi”nin müzakirəsinə həsr olunan iclası keçirilib. Tədbirdə Azərbaycan Respublikası Prezidentinin iqtisadi islahatlar üzrə köməkçisi Natiq Əmirov, həmçinin İqtisadi İslahatların Təhlili və Kommunikasiya Mərkəzinin rəhbərliyi iştirak edib.

AZƏRTAC xəbər verir ki, iclasda AMEA-nın prezidenti, akademik Akif Əlizadə ölkəmizdə müstəqilliyin bərpasının 25 illiyinin təntənəli qeyd olunduğunu söyləyib, bu müddətdə Azərbaycanda böyük yol qət edildiyini, bütün sahələrdə, o cümlədən iqtisadiyyatda mühüm nailiyyətlər qazanıldığını bildirib.

AMEA-nın rəhbəri hazırda Azərbaycanın növbəti inkişaf mərhələsinin başlanğıcında olduğunu söyləyib. Qeyd edilib ki, ölkəmiz post-neft dövrünə daxil olur. Bu dövrün özünəməxsus qanunauyğunluqları, iqtisadi siyasət çağırışları var. İqtisadiyyatımızın beynəlxalq rəqabət qabiliyyətini yüksəltmək, idxaldan asılılığı azaltmaq, qeyri-neft məhsullarının ixracını əsaslı şəkildə artırmaq yeni mərhələnin əsas prioritetləri olacaq. Bu səbəbdən, dövlətimizin başçısı yaxın illər üçün, eləcə də perspektiv üçün yeni iqtisadi islahatların yol xəritəsinin hazırlanması tapşırığı verib, bununla bağlı xüsusi sərəncam imzalayıb.

Akademik A.Əlizadə iqtisadi islahatların yol xəritəsində ayrı-ayrılıqda araşdırılan sektorların hər birinin qabaqcıl elmi nailiyyətlərdən faydalanmaqla inkişaf edə biləcəyini söyləyib. Bildirilib ki, həm bu sektorların, həm də yol xəritəsinə daxil edilmiş infrastruktur sahələrinin inkişafı elmi nailiyyətlərin sürətlə və səmərəli tətbiqini tələb edir. Strateji yol xəritəsi 2017-2020-ci illər üçün iqtisadi inkişaf strategiyası və tədbirlər planı ilə yanaşı, 2025-ci il və ondan sonrakı dövr üçün ümumi hədəfləri də müəyyənləşdirəcək.

Azərbaycan Respublikası Prezidentinin iqtisadi islahatlar üzrə köməkçisi Natiq Əmirov bildirib ki, Prezident İlham Əliyev ümummilli lider Heydər Əliyevin müəllifi olduğu inkişaf strategiyasına əsaslanaraq ölkəmizdə iqtisadi islahatların yeni mərhələsini uğurla davam etdirir. Məruzəçi Strateji yol xəritəsinin hazırlanmasında dövlət orqanları ilə yanaşı, yerli və xarici akademik dairələr, təhsil müəssisələri, özəl sektor və vətəndaş cəmiyyətinin nümayəndələrinin yaxından iştirak etdiyini deyib, sənədin inklüziv və əhatəli olması üçün bütün imkanlardan istifadə edildiyini bildirib.

N.Əmirov Strateji yol xəritəsi çərçivəsində bir il üçün təfsilatlı yol xəritəsi, 2016-2020-ci illər üçün iqtisadi inkişaf strategiyası və tədbirlər planı, 2025-ci il üçün uzunmüddətli baxış və 2025-ci ildən sonrakı hədəf baxışı kimi sənədlərin hazırlandığını diqqətə çatdırıb. Məruzəçi altı əsas istehsal və xidmət sektorunu, iki sosial sektoru və üç infrastruktur sektorunu əhatə edən strateji yol xəritəsinin növbəti onillikdə ölkənin əsas iqtisadi strategiya sənədi olacağını vurğulayıb.

AMEA-nın Strateji yol xəritəsinin hazırlanmasında yaxından iştirakını qeyd edən N.Əmirov bildirib ki, son illər ali elmi qurum kimi, akademiya Azərbaycan elminin innovativ yeniliklərinin milli iqtisadiyyatın ayrı-ayrı sektorlarına tətbiq edilməsi və əlavə iqtisadi dəyər yaratması məqsədilə islahatlarda fəal rol oynayır.

İclasda İqtisadi İslahatların Təhlili və Kommunikasiya Mərkəzinin İcraçı direktoru Vüsal Qasımlı “Azərbaycan iqtisadiyyatı: qlobal çağırışlar və milli strategiya” mövzusunda təqdimatla çıxış edib. Qeyd olunub ki, Azərbaycanda rəqabətqabiliyyətli və inklüziv iqtisadiyyat quruculuğu, həmçinin dayanıqlı iqtisadi inkişaf xətti davam edəcək.

V.Qasımlı vurğulayıb ki, Azərbaycan iqtisadi artımın uzunmüddətli (potensial) səviyyəsini yüksəltməklə məcmu buraxılış kəsirini yaxşılaşdıracaq. Bunun üçün qısamüddətli dövrdə fiskal və monetar siyasətlərdən istifadə olunacaq, orta və uzunmüddətli dönəmdə isə məcmu təklifi dəstəkləyən investisiya mühiti və infrastruktur daha da yaxşılaşdırılacaq, bazarlara çıxış imkanları genişləndiriləcək, qlobal dəyər zəncirində mövqelər gücləndiriləcək.

Tədbirdə Milli Məclisin iqtisadi siyasət, sənaye və sahibkarlıq komitəsinin sədri, akademik Ziyad Səmədzadə “Milli iqtisadiyyatda islahatlar və gələcək perspektivlər” mövzunda məruzə ilə çıxış edib. Bildirilib ki, yol xəritəsi Azərbaycanın gələcəyinə xidmət edən sənəddir. Hazırlanan 12 kitabın müasir dünyada özünü doğruldan təcrübələrə əsaslandığını deyən akademik qeyd edib ki, bu nəşrlər ölkəmizdə gələcəkdə aparılacaq iqtisadi islahatların və iqtisadi inkişaf strategiyasının həlli məsələlərinə müsbət təsir göstərə bilər.

Z.Səmədzadə bəzi ölkələrdən fərqli olaraq Azərbaycanın özünün inkişaf modelini seçdiyini söyləyib. Vurğulanıb ki, 1993-cü ildə müstəqilliyimizi itirmək təhlükəsi ilə üzləşdiyimiz vaxtda ümummilli lider Heydər Əliyevin cəsarəti, dövlət neft sektorunu və təbii sərvətləri özəlləşdirməməsi ölkəmizin bugünkü parametrlərə sahib olmasına imkan yaradıb.

AMEA-nın İqtisadiyyat İnstitutunun direktoru, iqtisad elmləri doktoru Nazim İmanov “Yol xəritəsi sənədi yeni iqtisadi konteksdə” mövzusunda məruzə ilə çıxış edib. Bildirilib ki, yol xəritəsi əvvəlki inkişaf strategiyasından əhatə etdiyi dövr, konkretlik və hazırlanma texnologiyası etibarilə fərqlənəcək.

N.İmanov islahatlar çərçivəsində dövlət sektoru ilə özəl sektor arasındakı nisbətin ikincinin xeyrinə dəyişəcəyi, müəssisələrin vergi yükünün yüngülləşdiriləcəyi, biznes mühitinin yaxşılaşdırılacağı, xarici investorlar üçün daha əlverişli şərait yaradılacağı və digər bu kimi məsələlərin nəzərdə tutulduğunu diqqətə çatdırıb.

Tədbirdə Milli Məclisinin elm və təhsil komitəsinin sədri, AMEA-nın vitse-prezidenti, akademik İsa Həbibbəylinin “İqtisadi islahatlarda elm və qa­nunvericiliyin rolu” mövzusunda məruzəsi dinlənilib. Bildirilib ki, yol xəritəsi Azərbaycan iqtisadiyyatının gələcəyi haqqında nikbin düşünməyə imkan verir. Nəşrlərlə yaxından tanış olduğunu deyən akademik sənəd hazırlanarkən dünya təcrübəsinin öyrənildiyini, eləcə də müzakirələrdə AMEA-nın mütəxəssislərinin də yaxından iştirak etdiklərini diqqətə çatdırıb.

İ.Həbibbəyli vurğulayıb ki, iclasın əsas məqsədi gerçəkləşdirilməsi nəzərdə tutulan iqtisadi və institusional islahatlarla bağlı son məlumatları dinləmək, AMEA-nın alim və mütəxəssislərinin fikirlərini ölkə ictimaiyyətinə təqdim etmək, eyni zamanda, iqtisadi islahatların elmi təminatı sahəsində akademiyanın vəzifələri haqqında, alimlərimiz qarşısında dayanan gələcək vəzifələr barədə fikir mübadiləsi aparmaqdır.

AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev “İqtisadi inkişafda müasir texnoloji imkanlar və İKT-nin rolu” mövzusunda məruzə ilə çıxış edib. R.Əliquliyev əvvəlcə Azərbaycanda informasiya cəmiyyəti quruculuğu sahəsində həyata keçirilən dövlət siyasətinin məqsədləri və əsas vəzifələri barədə məlumat verib. Bildirilib ki, ölkəmizdə informasiya cəmiyyətinin bərqərar olması üçün zəruri struktur islahatları aparılıb, müvafiq qanunvericilik bazası və texniki infrastruktur formalaşdırılıb, əlverişli investisiya mühiti yaradılıb. Bu istiqamətdə həyata keçirilən ardıcıl və uğurlu tədbirlər nəticəsində ölkəmizdə informasiya-kommunikasiya texnologiyaları (İKT) sektorunda sürətli və dayanıqlı inkişafa nail olunub. Ölkəmizdə informasiya iqtisadiyyatının əsas sektorlarından biri olan biliklər iqtisadiyyatının inkişafı üçün də əlverişli zəmin yaradılıb, bu istiqamətdə müəyyən nailiyyətlər əldə olunub, İKT sektoru milli iqtisadiyyatın aparıcı və dinamik inkişaf edən sektoruna çevrilib.

Vurğulanıb ki, iqtisadiyyatın modernləşdirilməsi və dayanıqlı inkişafını təmin etmək üçün İKT-nin imkanlarından geniş və səmərəli istifadə edilməlidir. R.Əliquliyev İKT-nin tətbiqi ilə ənənəvi iqtisadi sferalarda baş verən ciddi keyfiyyət dəyişikliklərinə dair əyani misallar göstərib, həmçinin İKT və biliklər iqtisadiyyatı sahəsində qabaqcıl ölkələrin təcrübələrindən bəhs edib. Bildirilib ki, postneft dövrünün əsas iqtisadi dayaqlarından və ümid yerlərindən biri məhz İKT və biliklər iqtisadiyyatıdır. R.Əliquliyev çıxışında ən yeni İKT vasitələrinə əsaslanan iqtisadi perspektivlərdən də danışıb, Azərbaycanda İKT və biliklər iqtisadiyyatının inkişaf etdirilməsinə dair təkliflərini səsləndirib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.