ELM VƏ TƏHSİL
Milli-mədəni kimlik məsələsi azərbaycançılıq ideyasının əsasını təşkil edir
Bakı, 17 aprel, X. Cəfərova, AZƏRTAC
Azərbaycanın müstəqillik dövründə mənəvi dəyərləri bərpa etmək, milli-mədəni kimlik sahəsində mövcud problemləri aradan qaldırmaq istiqamətində ciddi işlər görülüb.
AZƏRTAC xəbər verir ki, bu fikir aprelin 17-də Bakı Slavyan Universitetində (BSU) keçirilən "Post-sovet Azərbaycanında milli-mədəni kimlik” mövzusunda konfransda deyilib.
BSU-nun rektoru, professor Nurlana Əliyeva Azərbaycan Respublikasının qurucusu ümummilli lider Heydər Əliyevin dövlətçilik siyasətinin əsasında məhz milli-mənəvi dəyərlərin dayandığını, azərbaycançılıq ideyasının əsas götürüldüyünü qeyd edib. O, Prezident İlham Əliyevin həmin ənənələri daha da inkişaf etdirdiyini, məhz dövlət başçısının müvafiq sərəncamları ilə milli-mədəni kimlik məsələsinin dövlətçilik siyasətinin tərkib hissəsinə çevrildiyini qeyd edib.
BSU-nun professoru Rəhilə Quliyeva konfransın xüsusi layihə üzrə baş tutduğunu və onun növbəti mərhələlərinin də olacağını bildirib. O, konfransda tədqiq olunan mövzuların rəngarəng olduğunu , burada dini dəyərlərdən tutmuş musiqiyədək bir çox mövzuların araşdırıldığını bildirib.
AMEA-nın Humanitar Elmlər Bölməsinin rəhbəri, Məhəmməd Füzuli adına Əlyazmalar İnstitutunun direktoru, akademik Teymur Kərimli konfransın əhəmiyyətli mövzuya həsr olunduğunu vurğulayıb. O, milli-mədəni kimlik məsələsinin müstəqillik dövründə formalaşmış azərbaycançılıq ideyasının əsasını təşkil etdiyini bildirib.
Xəzər Universitetinin təsisçisi, direktorlar və qəyyumlar şurasının sədri, professor Hamlet İsaxanlı Azərbaycanda milli-mədəni kimlik məsələsinin tarixindən danışaraq , onun zaman-zaman dəyişildiyini qeyd edib. O, ümummilli lider Heydər Əliyevin müəyyən etdiyi azərbaycançılıq ideologiyasında milli-mədəni kimliyin xüsusi önəmi barədə məlumat verib.
Daha sonra Berlin-Humboldt Universitetinin Azərbaycan tarixi kafedrasının müdiri Yeva-Maria Aux və Kembric Universitetinin professoru Çarlz Melvil mövzu ilə bağlı çıxış ediblər.
Konfrans öz işini bölmələr üzrə davam etdirib.
Professor Hamlet İsaxanlının rəhbərliyi ilə keçirilən birinci bölmənin iclasında “Milli kimliklərin dəyişməsi dövrü”, Kembric Universitetinin professoru Çarlaz Melvilin sədrliyi ilə keçən ikinci bölmənin iclasında isə “Yeni milli-mədəni kimliklərin formalaşması dövrü” mövzuları müzakirə olunub.
Konfransın ikinci günü “Post-sovet Azərbaycanında tarixi normativlər və mədəniyyət quruculuğu” məsələsi ətrafında diskussiyalar aparılacaq.