Mingəçevir, Göyçay, Qəbələ və Ağdaşda 20 Yanvar faciəsi qurbanlarının xatirəsi ehtiramla yad olunub
Mingəçevir, 20 yanvar, Şahnəzər Bəşirov, AZƏRTAC
Mingəçevir Turizm Kollecində 20 Yanvar faciəsinin 28-ci ildönümü ilə bağlı silsilə tədbirlər keçirilib.
Əvvəlcə tələbələrin rəsm və əl işlərindən ibarət sərgiyə baxış keçirilib. Sərgidə dövlətçilik ənənələrindən, xalqın mübarizə tarixindən və 20 Yanvar faciəsindən bəhs edən nümunələr üstünlük təşkil edib. Eyni zamanda, monitor vasitəsilə sərgi iştirakçılarına 20 Yanvar hadisələrinə həsr olunmuş videoçarx təqdim olunub.
AZƏRTAC xəbər verir ki, kollecin Heydər Əliyev adına İdeoloji Mərkəzində keçirilən “20 Yanvar faciəsi tariximizin şərəf və qəhrəmanlıq səhifəsidir” adlı elmi nəzəri konfransda təhsil ocağının direktoru, professor Əyyub Əyyubov çıxış edərək 1990-cı il yanvarın 20-də baş verən hadisələrin Azərbaycan xalqının qəhrəmanlıq tarixinin şərəfli səhifəsi olduğunu vurğulayıb. Şəhidlərimizin xatirəsinin daim ehtiramla anıldığını qeyd edən Əyyub Əyyubov ulu öndər Heydər Əliyevin həmin faciəli günlərdə xalqı ilə birgə olduğunu və sovet ordusunun törətdiyi terror hadisələrinə qəti etiraz etdiyini diqqətə çatdırıb. Ümummilli liderimiz Heydər Əliyev xalqın təkidli tələbi ilə hakimiyyətə qayıtdıqdan sonra bu qanlı aksiya öz siyasi-hüquqi qiymətini alıb, hadisənin əsl mahiyyəti dünyaya çatdırılıb. O bildirib ki, hələ uzun illər boyu bu faciə xalqımızın qan yaddaşında milli qürur və şərəf günü kimi yaşayacaq, yeni nəsli qəhrəmanlıq dastanları yazmağa ruhlandıracaq.
Konfransda “Azadlığını canından əziz tutan xalq”, “20 Yanvar xalqımızın qürur və mübarizə tarixidir”, “20 Yanvar həm hüzn, həm də milli qürur günümüzdür”, “20 Yanvar faciəsi tariximizin qəhrəmanlıq səhifəsidir”, “Ulu öndər Heydər Əliyevin qanlı aksiyaya sərt etirazı və xalqımızın haqq səsinin dünyaya yayılması” mövzularında məruzələr dinlənilib.
Sonra kollecin tələbələri tərəfindən hazırlanan ədəbi-bədii kompozisiya nümayiş etdirilib, tələbələrə faciəni əks etdirən kitablar, jurnallar və bukletlər paylanılıb.
Sonda 20 Yanvar hadisələrindən bəhs edən film nümayiş etdirilib.
Qeyd edək ki, kollecin rəhbərliyi tərəfindən hazırlanmış tədbirlər planına uyğun olaraq 20 Yanvar faciəsinin növbəti ildönümü ilə bağlı tələbələr arasında inşa yazı müsabiqəsi keçirilib, divar qəzetləri hazırlanıb, xüsusi dərslər keçirilib, faciənin mahiyyətinin izah edilməsi üçün söhbətlər aparılıb.
X X X
Yanvarın 20-də Göyçay rayonundakı “Şəhidlər” abidə kompleksinin önündə anım mərasimi keçirilib.
AZƏRTAC xəbər verir ki, rayon icra hakimiyyətinin, idarə, müəssisə və təşkilatların rəhbər şəxsləri və kollektivi, müharibə veteranları, gənclər və ictimaiyyət nümayəndələri abidə kompleksinin önünə, eləcə də şəhid məzarları üstünə əklil və gül dəstələri düzüb, ölkəmizin suverenliyi və ərazi bütövlüyü uğrunda canından keçən Vətən övladlarının xatirəsini böyük hörmətlə anıblar. Sonra “Qurani-Kərim” oxunub, şəhidlərin ruhuna dualar edilib.
Saat 12:00-da bütün ölkə ərazisində olduğu kimi Göyçay rayonunda da 20 Yanvar qurbanlarının xatirəsi bir dəqiqəlik sükutla yad edilib.
X X X
Qəbələ rayonunda 20 Yanvar faciəsinin qurbanları ehtiramla yad edilib.
AZƏRTAC xəbər verir ki, yanvarın 20-də Qəbələ Rayon İcra Hakimiyyətinin, idarə, müəssisə və təşkilatların kollektivləri, təhsil və səhiyyə işçiləri, gənclər Şəhidlər xiyabanında faciə qurbanlarının xatirəsini yad ediblər. Abidə kompleksi önünə gül dəstələri düzülüb, şəhidlərin xatirəsi bir dəqiqəlik sükutla yad edilib. Mərasimdə çıxış edənlər 28 il əvvəl sovet ordusu tərəfindən törədilən faciənin dəhşətlərindən danışıb, qanlı hadisəni Azərbaycan xalqının azadlıq mübarizəsinin və qəhrəmanlıq salnaməsinin parlaq səhifəsi adlandırıblar.
Daha sonra Heydər Əliyev Mərkəzində 20 Yanvar faciəsinə həsr edilən ədəbi-bədii kompozisiya nümayiş etdirilib, məscidlərdə dini mərasimlər keçirilib, şəhidlərin ruhuna dualar oxunub.
Qeyd edək ki, faciənin 28-ci ildönümü ərəfəsində rayonun bütün idarə və təşkilatlarında, təhsil və mədəniyyət müəssisələrində “dəyirmi masa”lar, yığıncaqlar təşkil edilib, orta məktəblərdə faciə ilə bağlı xüsusi dərslər keçirilib.
X X X
Ağdaş rayonunda da mədəniyyət və təhsil işçiləri, eləcə də mərkəzi kitabxananın kollektivi, ictimaiyyət nümayəndələri Şəhidlər Xiyabanına toplaşaraq 20 Yanvar faciəsi qurbanlarının xatirəsini ehtiramla yad ediblər. Faciənin 28-ci ildönümü ilə əlaqədar Heydər Əliyev Mərkəzində keçirilən “Qəhrəmanlıq tariximizin 20 Yanvar səhifəsi” adlı tədbirə toplaşanlar əvvəlcə şəhidlərin xatirəsini bir dəqiqəlik sükutla yad ediblər.
Çıxış edənlər bildirib ki, o qanlı şənbə gecəsində xalqımız öz müstəqilliyini və azadlığını hər şeydən uca tutduğunu bir daha sübut edib. Tədbirdə 1990-cı il yanvarın 19-dan 20-nə keçən gecə sovet qoşunlarının Bakıda törətdikləri qanlı cinayətdən danışılıb. Qeyd edilib ki, faciədən bir gün sonra özünün və ailəsinin həyatı üçün təhlükələrə baxmayaraq, ümummilli lider Heydər Əliyev Azərbaycanın Moskvadakı daimi nümayəndəliyinə gələrək doğma xalqının dərdinə şərik çıxıb, faciəni törədənləri cəsarətlə lənətləyib və hadisəyə siyasi-hüquqi qiymət verilməsini tələb edib.
Həmçinin mərasimdə 20 Yanvar şəhidlərindən olan və qədim Ağdaş torpağının yetirməsi Müşfiq İsayevin xatirəsi ehtiramla yad edilərək onun həyat yolu haqqında danışılıb.
Sonra şəhid Müşfiq İsayev adına orta məktəbin, Nizami adına 2 saylı orta məktəbin şagirdlərinin ifasında 20 Yanvar hadisələrinə və ölməz şəhidlərimizə həsr olunan şeirlər söylənilib.
Bölmənin digər xəbərləri
