REGİONLAR
Mingəçevirdə “Jurnalistika dəyərləri və demokratik cəmiyyət quruculuğu” mövzusunda tədbir təşkil edilib
Mingəçevir, 27 may, Şahnəzər Bəşirov, AZƏRTAC
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Zərdabi Mətbuat Mərkəzi” İctimai Birliyi tərəfindən həyata keçirilən “Jurnalistikanın təbliği istiqamətində maarifləndirici tədbirlərin keçirilməsi” layihəsi çərçivəsində Mingəçevir Dövlət Universitetində (MDU) tələbələrlə görüş təşkil olunub.
AZƏRTAC xəbər verir ki, “Jurnalistika dəyərləri və demokratik cəmiyyət quruculuğu” mövzusunda təşkil olunan tədbirdə Mingəçevir Dövlət Universitetinin təlim-tərbiyə işləri üzrə prorektoru Rövşən Əliyev çıxış edərək, medianın ictimai həyatdakı rolundan danışıb. Bildirib ki, MDU ictimaiyyətlə, o cümlədən kütləvi informasiya vasitələri ilə əlaqələrin qurulmasına böyük önəm verir.
Şəhər icra hakimiyyəti başçısının müavini Hikmət Kərimov Mingəçevirdə medianın missiyasına həssaslıqla yanaşıldığını vurğulayıb. Hikmət Kərimov şəhərdə qəzet və jurnalların, televiziya kanallarının sərbəst fəaliyyətinə hər cür şəraitin yaradıldığını diqqətə çatdırıb. Qeyd edib ki, ali məktəbin tələbələri də daim axtarışda olmaq keyfiyyətləri ilə müəyyən mənada jurnalistlik missiyası yerinə yetirirlər.
“Zərdabi Mətbuat Mərkəzi” İB-nin sədri Rəhim Hüseynzadə rəhbəri olduğu layihənin məqsəd və vəzifələri barədə məlumat verib. Bildirib ki, 2014-cü ildən başlayaraq ali məktəblərin jurnalistika fakültələrinə qəbulda qabiliyyət testi tətbiq olunur. Bu, jurnalistikanın ixtisaslaşmasına dəstək məqsədi daşıyır. Əvvəllər ancaq humanitar sahəni bitirən bakalavrlar magistr pilləsində jurnalistikanı seçə bilirdilərsə, hazırda bu məhdudiyyət aradan qaldırılıb. Mövcud prosedurun prinsipial tərəfi ondan ibarətdir ki, əgər iqtisadiyyat sahəsini bitirən gəncin yazı yazaraq özünü ifadə etmək potensialı varsa, o, bu qabiliyyətini media müstəvisinə daşıya bilsin. “Məsələn, bakalavr pilləsini iqtisadiyyat, yaxud kənd təsərrüfatı sahəsi üzrə bitirən gənc öz sahəsinin mütəxəssisidir. Jurnalistikamıza isə belə gəncin yaradıcılıq məhsulu lazımdır. Layihəmiz sizlər arasında bu məqamı təbliğ etməyə yönəlib. Buna görə mətbuatımızın keçdiyi yola, onun ictimai missiyasına, müasir mediamızdakı tendensiyalara diqqət yetirəcəyik. Mövzu ilə bağlı suallarınızı da cavablandırmağa hazırıq. Bir daha bildirim ki, layihəmiz sizləri, yəni tələbə-gəncləri jurnalistikaya stimullaşdırmaq məqsədi daşıyır. Əlbəttə, seçim sizindir. Ancaq istərdik ki, siz gələcəkdə magistr təhsili almaq istəyərkən jurnalistikanı da seçmək barədə düşünəsiniz”, - deyən Rəhim Hüseynzadə bunun üçün nəzərdə tutulan qabiliyyət imtahanının xüsusiyyətləri barədə də ətraflı məlumat verib.
Layihənin eksperti, “Mingəçevir işıqları” qəzetinin baş redaktoru Fərman Nəbiyev Azərbaycan mətbuatının tarixindən, müasir dövrdəki inkişaf xüsusiyyətlərindən, qloballaşma dövründə medianın funksiya və vəzifələrindən, həmçinin ənənəvi mediadan onlayan mediaya keçiddə meydana çıxan xarakterik vəziyyətlərdən danışıb.
“Jurnalist Araşdırmaları Mərkəzi” İctimai Birliyinin sədri, ekspert Seymur Verdizadə çıxışında diqqəti Azərbaycan mediasındakı xarakterik cəhətlərə çəkib. Bildirib ki, internetin sürətlə inkişaf etdiyi hazırkı dövrdə hər kəsin özünü jurnalist kimi göstərməsinə imkan var. Ancaq bu, o demək deyil ki, vəziyyətdən sui-istifadə meylləri yoxdur. “Belə hallar kifayət qədərdir. Əlbəttə, Mətbuat Şurasının fəaliyyəti timsalında mediadan sui-istifadələrə qarşı effektiv ictimai qınaq mexanizmi tətbiq edilir. Lakin, ictimai qınağı bir qurumun fəaliyyəti çərçivəsində aparmaq yetərsizdir. Ümumən cəmiyyət aktiv olmalıdır. Bu gün Azərbaycan dövləti imkan yaradır ki, peşəkarlar jurnalistikaya gəlsinlər. Bu layihə sizləri həmin imkandan yararlanmağa səsləyən təşəbbüsdür”, - deyə Seymur Verdizadə qeyd edib.
Tədbirdə MDU-nun Tələbə-Gənclər Təşkilatının sədri Rəşad Qurbanov, universitetin III kurs tələbəsi Rəşad Məmmədov və başqaları ekspertlərə media fəaliyyətinin müxtəlif istiqamətləri ilə bağlı suallar ünvanlayıblar. MDU-nun müəllimləri Nizami Zeynalov və İlham Səlimov da çıxış edərək mövzu ilə bağlı fikirlərini bildiriblər.