Mingəçevir, 21 aprel (AZƏRTAC). Mingəçevirdəki “Kür” Olimpiya Təlim-Tədris Mərkəzində akademik avarçəkmə, kayak və kanoe üzrə Beynəlxalq “Prezident Kuboku-2014” reqatası başa çatmışdır.

AZƏRTAC xəbər verir ki, yarışda Azərbaycan, Türkiyə və Gürcüstanın müxtəlif yaş qrupları üzrə 150-dən çox idmançısı mübarizə aparmışdır.

Akademik avarçəkənlərin mübarizəsində 2014-cü il Yeniyetmələrin II Yay Olimpiya Oyunlarında Azərbaycanı təmsil edəcək Boris Yotov 1 nəfərlik qayıqla 2000 metr məsafəni 7 dəqiqə 53 saniyəyə qət etmişdir. O, bu göstəricisi ilə 23 yaşadək avarçəkənlər arasında dünya çempionu və 2012-ci il London Yay Olimpiya Oyunlarında 5-ci yeri tutmuş Aleksandr Aleksandrovu 7 saniyə, eləcə də bir çox beynəlxalq reqatanın qalibi Cavid Əfəndiyevi 21 saniyə, Gürcüstan təmsilçisi Arçil Bayaşvilini isə 42 saniyə qabaqlayaraq birinci yeri tutmuşdur.

Kanoeçilərin mübarizəsində London Olimpiadasının finalçısı Sergey Bezuqlıy 1 nəfərlik qayıqla 200 metr məsafəyə yürüşdə finişə 41,22 saniyəyə çataraq qalib olmuşdur. O, ən yaxın izləyicisi Aleksey Kupini 0,50 saniyə qabaqlamışdır. Nikolay Matviyçuk isə finişə 42,4 saniyəyə çataraq üçüncü yeri tutmuşdur. Təcrübəli kanoeçimiz daha bir medalı 500 metr məsafəyə yürüşdə əldə etmişdir. O, həmin məsafəni 2 dəqiqə 7 saniyəyə qət edərək üçüncü yeri tutmuşdur. Aleksey Kupin 2 dəqiqə 5 saniyə nəticə ilə birinci, Nikolay Matviyçuk 2 dəqiqə 6 saniyə göstərici ilə ikinci olmuşdur. Sergey Bezuqlıy 1000 metr məsafəyə yürüşdə finişə 4 dəqiqə 37 saniyəyə çataraq 4-cü yeri tutmuşdur. Qalib adını 4 dəqiqə 15,33 saniyə nəticə ilə Tarak Matviyçuk qazanmışdır. Onun qardaşı Nikolay Matviyçuk cəmi 0,55 saniyə geri qalaraq ikinci yeri tutmuşdur. Üçüncü yerə isə 4 dəqiqə 24 saniyə göstərici ilə Aleksey Kupin layiq görülmüşdür.

Kayakçıların mübarizəsində 1 nəfərlik qayıqla 500 metr məsafəyə yürüşdə Aleksandr Piçugin 1 dəqiqə 54 saniyə nəticə ilə qalib olmuşdur. Türkiyəli Safa Köşe 1 dəqiqə 57.57 saniyə nəticə ilə ikinci, Tamerlan Mustafayev 1 dəqiqə 57.98 saniyə nəticə ilə üçüncü nəticə göstərmişlər. T.Mustafayev 200 metr məsafəyə yürüşdə isə finişə 38 saniyəyə çataraq qalib adını qazanmışdır. Amil Hüseynli 39.34 saniyə nəticə ilə ikinci, gürcüstanlı Badri Kavelaşvili 39.67 saniyə nəticə ilə üçüncü olmuşlar.

Qalib idmançılara diplom, medallar və kubok təqdim edilmişdir.