REGİONLAR
Mingəçevirdə ötən altı ayda görülən işlər müzakirə olunub
Mingəçevir, 27 iyul, Şahnəzər Bəşirov, AZƏRTAC
Bu ilin ilk altı ayı Mingəçevir şəhəri üçün uğurlu olub. Regionların sosial-iqtisadi inkişafı ilə bağlı Dövlət Proqramının Mingəçevirə aid olan bəndləri uğurla yerinə yetirilib. Ötən dövrdə 1080 yeni iş yeri açılıb, “ASAN Həyat” və sənaye parkının tikintisində işlər davam etdirilib.
AZƏRTAC xəbər verir ki, bu faktlar ötən 6 ay ərzində Mingəçevir şəhərinin sosial-iqtisadi inkişafı istiqamətində görülən işlərə dair hesabat yığıncağında səsləndirilib.
Tədbirdə çıxış edənlər bildiriblər ki, hesabat dövründə şəhərin məhəllədaxili yollarına, yol və səkilərə 30 min kvadratmetr asfalt, park və xiyabanlara 6,2 min kvadratmetr tamet döşənib.
Qeyd edilib ki, ötən altı ayda 646 ailəyə ünvanlı sosial yardım verilib. 1633 nəfər iş axtaran kimi şəhər məşğulluq mərkəzində qeydə alınıb və 593 nəfər ixtisasına uyğun işlə təmin olunub, 133 nəfərə işsizlik statusu verilib.
Mingəçevir Sənaye Parkının icraçı direktoru Arif Mahmudov parkın qurulması, istehsal müəssisələri üçün binaların inşası və kadr potensialı sahəsində aparılan işlər, Mingəçevir şəhər Mərkəzi Xəstəxanasının publik hüquqi şəxsin direktoru Könül Ələkbərov icbari tibbi sığortanın tətbiqi ilə bağlı yeniliklər barədə danışıb.
Yığıncaqda idarə və təşkilat rəhbərlərinin hesabat məruzəsi dinlənilib, bir çox sahələrdə mövcud vəziyyət ətraflı müzakirə olunub, qarşıda duran vəzifələr müəyyənləşdirilib.