Qahirə, 5 may, AZƏRTAC

Azərbaycanın Misirdəki səfiri Şahin Abdullayevin bu ölkənin geniş oxucu kütləsinə malik “Əl-Masr Əl-Yaum” qəzetində “Torpaqlarımız işğal olunub... Onu qaytarmağa bizim haqqımız var” sərlövhəli müsahibəsi dərc edilib.

Müsahibədə Ş.Abdullayev son illərdə ölkəmizin böyük iqtisadi nailiyyətlər əldə etməsindən danışıb. Diplomat Azərbaycan iqtisadiyyatının neft və qaz sektorunun gəlirləri hesabına sürətlə inkişaf etdiyini vurğulayaraq Davos İqtisadi Forumunun 2014-2015-ci illərdə dünya iqtisadiyyatlarının rəqabətə davamlılıq reytinqində Azərbaycanın 144 ölkə arasında 38-ci yerdə qərarlaşdığını söyləyib.

Azərbaycanın cari ilin iyununda ilk Avropa Oyunlarına ev sahibliyi edəcəyini vurğulayan səfir 2020-ci ildə futbol üzrə Avropa çempionatının final mərhələsinin dörd oyununun da ölkəmizdə keçiriləcəyini bildirib.

1991-ci ildə Sovet İttifaqının dağılması ilə Azərbaycanın müstəqilliyini bərpa etdiyini, lakin həmin dövrdə ölkəmizin bir çox çətin sınaqlarla üzləşdiyini, xüsusilə Dağlıq Qarabağ və ətraf rayonların Ermənistan silahlı qüvvələri tərəfindən işğal edildiyini, torpaqlarımızın 20 faizinin hələ də düşmən tapdağı altında olduğunu bildirən Ş.Abdullayev erməni işğalı nəticəsində aralarında qadın, uşaq, yaşlı da olan minlərlə soydaşımızın qətlə yetirildiyini, Azərbaycana aid tarixi, mədəni və dini abidələrin məhv edildiyini xatırladıb.

Müsahibədə, həmçinin 1993-cü ildə BMT Təhlükəsizlik Şurasının Ermənistan silahlı qüvvələrinin işğal etdiyi Azərbaycan torpaqlarından qeyd-şərtsiz çıxarılmasını və bir milyondan çox qaçqın və məcburi köçkünün doğma torpaqlarına qaytarılmasını tələb edən dörd qətnaməsinin indiyədək Ermənistan tərəfindən yerinə yetirilmədiyi vurğulanıb.

Səfir, eyni zamanda, beynəlxalq təşkilatların qəbul etdiyi qətnamələrin bəzən bir ölkəyə münasibətdə dərhal tətbiq olunmasının, digər ölkəyə qarşı isə tətbiq edilməməsinin narahatlıq doğurduğunu və bunun ikili standartlara gətirib çıxardığını bildirib.

Ermənistanın işğalçılıq siyasətinin arxasında duran məqamlara aydınlıq gətirən Ş.Abdullayev ermənilərin “Böyük Ermənistan” yaratmaq xülyasında olduqlarını vurğulayaraq belə bir iddianın tarixi reallığa söykənmədiyini oxucuların diqqətinə çatdırıb.

Təmas xəttində gərginliyin artması hallarının baş verməsi barədə suala cavab verən Ş.Abdullayev Ermənistan silahlı qüvvələri tərəfindən cəbhəboyu zonada tez-tez atəşkəsin pozulmasının müşahidə edildiyini, lakin düşmənin Azərbaycan Silahlı Qüvvələrinin cavab atəşi ilə susdurulduğunu qeyd edib. Səfir işğal altındakı torpaqlarımızı qaytarmağın Azərbaycanın haqqı olduğunu, eyni zamanda, həmin torpaqların Azərbaycanın əzəli ərazisi olduğunu bildirib.

Ermənistan-Azərbaycan, Dağlıq Qarabağ münaqişəsinin həlli məsələsinə münasibət bildirən səfir Azərbaycanın bu problemin ATƏT-in Minsk qrupu vasitəsilə sülh yolu ilə həllinə üstünlük verdiyini qeyd edib. Diplomat ölkəmizin hərbi qüdrətinin artdığını, müdafiə xərclərinin 4,6 milyard ABŞ dolları təşkil edərək Ermənistanın ümumi büdcəsindən iki dəfə çox olduğunu vurğulayıb.

Ş.Abdullayev Azərbaycanın 1990-cı illərdə çox ağır vəziyyətdə olduğuna toxunaraq, bir tərəfdən Ermənistanın Azərbaycana qarşı düşmənçilik və işğalçı mövqeyi, torpaqlarının 20 faizinin Ermənistan silahlı qüvvələri tərəfindən zəbt olunması, bir tərəfdən bir milyondan çox qaçqın və məcburi köçkünün tarixi torpaqlarından çıxarılması, digər tərəfdən isə Sovet İttifaqının dağılmasından sonra ölkənin iqtisadi böhrana düçar olması və xarici dövlətlərin təzyiqlərinə məruz qalması barədə məlumat verib. Diqqətə çatdırılıb ki, 1993-cü ildə Azərbaycanı bu böhrandan çıxarmaq üçün xalqın tələbi ilə hakimiyyətə qayıdan Heydər Əliyevin müdrik siyasəti nəticəsində ölkə dinamik inkişaf yoluna qədəm qoyub, qısa zamanda dövlətçiliyin əsasları gücləndirilib, atəşkəslə bağlı razılaşma əldə olunub.

Səfir Azərbaycanın iqtisadi inkişafında ulu öndər Heydər Əliyev tərəfindən müəyyənləşdirilən milli neft strategiyasının önəmini xüsusi vurğulayıb. Qeyd olunub ki, ulu öndər Heydər Əliyevin rəhbərliyi ilə 1994-cü ildə dünyanın nüfuzlu şirkətləri ilə “Əsrin müqaviləsi” imzalanıb. Səfir, həmçinin son illər ərzində ölkədə işsizliyin və yoxsulluğun səviyyəsinin xeyli dərəcədə aşağı düşdüyünü, əmin-amanlığın və siyasi sabitliyin təmin olunduğunu, Azərbaycanın investisiya yatırılan ölkədən sərmayə qoyan ölkəyə çevrildiyini bildirib.

Dünyada baş verən terror hadisələrinə münasibət bildirən səfir Azərbaycanın da bu bəladan əziyyət çəkən ölkə olduğunu qeyd edib. O, 1990-cı illərin əvvəllərində ermənilər tərəfindən törədilən 33 terror aktı nəticəsində iki min azərbaycanlının, o cümlədən 1994-cü ildə Bakı metrosunda törədilmiş terror hadisəsi nəticəsində 309 şəxsin həlak olduğunu vurğulayıb. Diplomat, həmçinin ölkəmizin terrorla mübarizədə beynəlxalq ictimaiyyətlə yaxından əməkdaşlıq etdiyini diqqətə çatdırıb.

Məqalənin tam mətni ilə aşağıdakı link vasitəsilə tanış olmaq mümkündür: http://today.almasryalyoum.com/printerfriendly.aspx?ArticleID=463106

Asya Hacızadə

AZƏRTAC-ın xüsusi müxbiri

Qahirə