REGİONLAR
Möhtəşəm su festivalı Mingəçevir sakinlərində yüksək əhvali-ruhiyyə yaradıb VİDEO
Mingəçevir, 23 aprel, Şahnəzər Bəşirov, AZƏRTAC
“Bakı-2017” IV İslam Həmrəyliyi Oyunlarının Xəzərdən başlayan su səyahəti aprelin 23-də Mingəçevir şəhərində davam edib.
AZƏRTAC xəbər verir ki, həmin gün axşam saatlarında Heydər Əliyev parkında möhtəşəm su festivalı keçirilib. Əvvəlcə tədbirin aparıcısı bu il mayın 12-dən 22-dək Bakı şəhərində keçiriləcək IV İslam Həmrəyliyi Oyunları barədə məlumat verib. Festivalda, həmçinin “Bakı-2017” IV İslam Həmrəyliyi Oyunlarının su səyahətinin başlanması, aprelin 5-də Prezident İlham Əliyevin su mərasiminin başlanğıcında Xəzər dənizinin suyu ilə dolu olan su səhəngini mingəçevirli uşağa təhvil verməsi görüntüləri təqdim edilib. Xəzər dənizindən götürülmüş suyun Mingəçevir şəhərinədək keçdiyi səyahət yoluna, o cümlədən Mingəçevir mərhələsinə nəzər salınıb.
Məlumat verilib ki, Xəzərdən başlayan səyahət çərçivəsində təşkil edilən su festivallarının keçirilməsində əsas məqsəd xalqımıza idman bayramı əhvali-ruhiyyəsi ilə yanaşı, eyni zamanda, həmrəylik və sevinc hissini bəxş etməkdir.
Sonra “Bakı-2017”nin misdən hazırlanmış səhəngini Kür çayından su ilə dolduraraq Heydər Əliyev parkına gətirən sambo üzrə dünya çempionatının gümüş medalçısı Ayaz Ümidəliyev, yunan-Roma güləşi üzrə yeniyetmələr arasında respublika çempionu Cavanşir Qasımov, üzgüçülük həvəskarı İsfəndiyar Kərimov alqış sədaları altında səhnəyə dəvət olunub.
Heydər Əliyev parkında keçirilən festival əsl bayrama çevrilib. “Bakı-2017” IV İslam Həmrəyliyi Oyunlarının idmançı səfiri Rəsul Çunayev çıxış edərək, ölkəmizi bu mötəbər yarışda təmsil edəcək idmançılara uğurlar arzulayıb. “Mirvari” rəqs qrupunun, Mingəçevir musiqi qrupunun üzvlərinin və yerli ifaçı Elsevər Məmmədovun çıxışı şəhər sakinlərində yüksək əhvali-ruhiyyə yaradıb. Festival möhtəşəm su effekti və atəşfəşanlıqla başa çatıb.
Su səhəngini daşıyan festival iştirakçısı, sambo üzrə dünya çempionatının gümüş medalçısı Ayaz Ümidəliyev möhtəşəm su festivallarının “Bakı-2017” IV İslam Həmrəyliyi Oyunlarına xüsusi rəng qatdığını deyib: “Bizim burada iştirakçı kimi məqsədimiz həmrəylik və sülh dəyərlərinin mahiyyətini ön plana çəkməkdir. Vəzifəmizin öhdəsindən layiqincə gəlməyə çalışırıq”.
YAP Mingəçevir şəhər Gənclər Birliyinin sədri, Heydər Əliyev Mərkəzinin direktoru Bəxtiyar Mustafayev AZƏRTAC-a müsahibəsində “Bakı-2017” IV İslam Həmrəyliyi Oyunlarının əhəmiyyətini yüksək qiymətləndirərək deyib: “Əminəm ki, Azərbaycanın dünyada artan nüfuzunun göstəricisi olan bu oyunlar dostluq, həmrəylik və birlik bayramına çevriləcək. Biz 2015-ci ildə Mingəçevirdə keçirilən Birinci Avropa Oyunlarının avarçəkmə yarışlarının şahidi olduq. Şəhərimiz həmin mötəbər tədbirə ev sahibliyi etməklə ölkəmizin paytaxtı ilə yanaşı, bölgələrinin də inkişaf etdiyini nümayiş etdirdi. İnanıram ki, Azərbaycan gələn ay IV İslam Həmrəyliyi Oyunlarını keçirməklə müsəlman ölkələri arasında əməkdaşlığa və dostluğa öz töhfəsini verəcək”.
Xəzərdən başlayan su səyahətinin növbəti dayanacağı aprelin 25-də Qax rayonu olacaq.
Xatırladaq ki, “Bakı-2017” IV İslam Həmrəyliyi Oyunlarının Xəzərdən başlayan su səyahətinin Mingəçevir şəhərindəki mərhələsinə Kür çayından su götürülməklə start verilib. Kür çayında hərəkət edən motorlu qayıqda olan sambo üzrə dünya çempionatının gümüş medalçısı Ayaz Ümidəliyev, yunan-Roma güləşi üzrə yeniyetmələr arasında respublika çempionu Cavanşir Qasımov, üzgüçülük həvəskarı İsfəndiyar Kərimov “Bakı-2017”nin misdən hazırlanmış səhəngini Kür çayının suyu ilə dolduraraq şəhərdəki Heydər Əliyev parkında keçiriləcək su festivalına yola düşüblər. Bu su qabı mayın 12-də “Bakı-2017”nin açılış mərasimində nümayiş etdiriləcək.
Sonra “Kür” Olimpiya Tədris-İdman Mərkəzində “Bakı-2017” IV İslam Həmrəyliyi Oyunlarına daxil edilmiş “Domestic Grassroots” proqramı çərçivəsində regional idman tədbiri keçirilib. Tədbirdə çıxış edən şəhər icra hakimiyyəti başçısının birinci müavini İlham İsmayılov, layihə rəhbəri Ülviyyə Əkbərova, “Bakı-2017” IV İslam Həmrəyliyi Oyunlarının idmançı səfiri Rəsul Çunayev gələn ay Bakıda keçiriləcək mötəbər yarışların əhəmiyyətindən danışıb, məktəblilərə bu idman tədbirində uğurlar arzulayıblar.
“Bakı-2017” IV İslam Həmrəyliyi Oyunlarının təbliği və gənclərin idmana cəlb olunması məqsədilə məktəblilər arasında təşkil olunan müxtəlif idman yarışlarında 5 məktəbdən 50-si qız, 50-si oğlan olmaqla, 100 şagird iştirak edib. Musiqili-əyləncəli idman tədbiri iştirakçılara xoş anlar yaşadıb. Yarışda komanda hesabında Mingəçevir şəhər 3 və 10 nömrəli orta məktəblərin və Texniki Humanitar Liseyin şagirdləri müvafiq olaraq I-III yerləri tutublar.
Qaliblərə Əməliyyat Komitəsi tərəfindən hazırlanmış kubok, sertifikat, məlumat kitabçaları, qalib komandanın üzvlərinə isə “Bakı-2017” IV İslam Həmrəyliyi Oyunlarının bağlanış mərasiminə biletlər təqdim olunub.
Mingəçevir şəhər 3 nömrəli orta məktəbinin şagirdi, yarışların iştirakçısı Ağalar Fətəliyev AZƏRTAC-a müsahibəsində idman tədbiri barədə təəssüratlarını belə bölüşüb: “Bakı-2017” IV İslam Həmrəyliyi Oyunları münasibətilə Mingəçevirdə məktəblilər arasında təşkil olunan belə gözəl idman yarışında iştirak etdiyim üçün çox sevinirəm. Bizim komanda bu yarışda qalib gəldiyi üçün mənə də Oyunların bağlanış mərasiminə bilet təqdim edildi. Səbirsizliklə həmin günü gözləyirəm”.
Qeyd edək ki, 37 gün ərzində ölkəmizin 15 bölgəsində reallaşdırılacaq “Xəzərdən başlayan səyahət” proqramı 3 min kilometr məsafəni qət etməklə mayın 12-də Bakıda IV İslam Həmrəyliyi Oyunlarının açılış mərasimi ilə başa çatacaq. Ölkəmizin müxtəlif şəhər və rayonlarından olan uşaqlar və idmançılar göl, çay, şəlalə və bulaqlardan topladıqları Azərbaycanın saf suları ilə gələn ay Bakıya toplaşacaq İslam dünyasının 50-dən artıq dövlətinin nümayəndə heyətlərini salamlayacaqlar.