Azərbaycanın Moskvadakı səfirliyində Ulu Öndərin anadan olmasının 94-cü ildönümü münasibətilə tədbir keçirilib

Moskva, 11 may, AZƏRTAC

Böyük və kiçik millət yoxdur, öz millətinin və ölkəsinin adını ucaldan böyük şəxsiyyətlər var. Fəaliyyəti ilə Azərbaycanın hüdudlarından uzaqlarda şəksiz nüfuz sahibi olan ümummilli lider Heydər Əliyev belə tarixi şəxsiyyətlərin pleyadasında xüsusi yer tutur. Bu sözlər Azərbaycanın Moskvadakı səfirliyində Ulu Öndərin anadan olmasının 94-cü ildönümünə həsr edilmiş tədbirdə səslənib. Rusiya ictimaiyyətinin görkəmli nümayəndələri bu böyük şəxsiyyətlə görüşlərinin məhrəm xatirələrini və təəssüratlarını bölüşmək üçün səfirliyin salonuna toplaşıblar.

Heydər Əliyevin nurlu xatirəsinə həsr olunmuş xatirə gecəsində səslənən çıxışların bəzilərindən parçaları oxucuların diqqətinə çatdırırıq.

Azərbaycanın Rusiyadakı səfiri Polad Bülbüloğlu:

-Heydər Əliyev bütün həyatını xalqına və Vətəninə xidmətə həsr edib. Heydər Əliyev Sovet İttifaqı dağılan zaman, - o, bu hadisəni qabaqcadan görən az sayda insanlardan biri idi və başa düşürdü ki, hər şey özünün məntiqi sonluğuna çatmaq üzrədir, - kiçik vətəninə - Naxçıvana qayıdır və Azərbaycan xalqı üçün ən ağır məqamda ölkəsinin rəhbəri olur. Azərbaycan yalnız Heydər Əliyevin bacarığı və nüfuzu sayəsində indiki ölkəyə çevrilib. Buna görə də onu müasir Azərbaycanın memarı adlandırırıq. O, ölkəyə çox çətin şəraitdə başçılıq edib. Hər şey gözümüzün önündə baş verib. Bura Heydər Əliyevi tanıyan və onunla işləyən insanlar toplaşıblar. Bu dünyada hər şey gəldi-gedərdir, amma elə adamlar var ki, onlar bütöv bir dövrü təcəssüm etdirirlər. Heydər Əliyevlə şəxsi münasibətləri olan böyük rəssam Tahir Salahov belə şəxsiyyətlərdəndir. Heydər Əliyev ona dərin hörmət bəsləyib və bir rəssam kimi təşəkkülü üçün çox işlər görüb. Burada böyük heykəltəraş və rəssam Zurab Sereteli, unikal insan, zəmanəsinin rəmzi sayılan, bu gün də Rusiya incəsənətinin bayraqdarı olan müğənni İosif Kobzon əyləşiblər. Burada Heydər Əliyevin Moskvada SSRİ Nazirlər Soveti sədrinin birinci müavini olanda birlikdə işlədiyi silahdaşları əyləşiblər. Mən Azərbaycanda onun rəhbərliyi altında işləmişəm, onun dövründə mədəniyyət naziri olmuşam. Heydər Əliyevlə işləmək böyük məktəbdir. İndinin özündə də ən çətin anlarımda Heydər Əliyevin bizə öyrətdiklərini xatırlayıram.

Deyilənə görə, uğur qazanmış hər bir kişinin arxasında böyük qadın dayanır. Heydər Əliyevin həyatında belə bir qadın olub: çox sevdiyi və hörmət etdiyi Zərifə Əliyeva. Mənə Zərifə xanımla tanış olmaq səadəti nəsib olub. Zərifə xanım gənclərə həmişə çox diqqətlə yanaşır, onları hər cür dəstəkləyirdi. Zərifə Əliyeva görkəmli oftalmoloq alim kimi, Azərbaycanda göz xəstəliklərinin aradan qaldırılması üçün çox işlər görüb və iki gözəl övlad tərbiyə edib.

Rusiya Federal Məclisi Federasiya Şurası sədrinin müavini İlyas Umaxanov:

-Sovet İttifaqının çox böyük nailiyyətləri Heydər Əliyevin adı ilə bağlıdır. Heydər Əliyev Siyasi Büronun üzvü olanda ən mürəkkəb layihələr məhz ona tapşırılırdı və o da 1985-ci ildə Gənclər İlinin keçirilməsi kimi humanitar məsələlərdən tutmuş körpü, keçid, Baykal-Amur Magistralının tikintisinədək istənilən vəzifənin öhdəsindən məharətlə gəlirdi. Harada işləyirsə-işləsin, onunla hətta azacıq təmasda olan adamlar belə etiraf edirdilər ki, o, böyük şəxsiyyətdir. Xalq onu müstəqil Azərbaycanda hakimiyyətə gətirəndə, o, daha böyük oldu və bu hadisə də respublika üçün ən lazımlı məqamda baş verdi. Demək olar, onda xalq Heydər Əliyevlə yenidən birləşdi. Mən Azərbaycan xalqını, Heydər Əliyevin fəaliyyətinə və həyatına birbaşa aidiyyəti olan insanların hamısını və ilk növbədə, əlbəttə, öz atasının işini layiqincə davam etdirən İlham Əliyevi təbrik edirəm.

Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy:

-Heydər Əliyev Azərbaycan KP MK-nın birinci katibi və müstəqil Azərbaycanın Prezidenti olanda mədəniyyət xadimlərinə - yazıçılara, kinematoqrafçılara, teatr xadimlərinə həmişə çox həssas münasibət bəsləyib. Azərbaycanda unikal yaradıcılıq azadlığı hökm sürüb. O, qayğıkeş bir ata kimi, insanları müxtəlif xoşagəlməz hadisələrdən qoruyub. Yaradıcı insanlar da bunu çox qiymətləndiriblər. Polad Bülbüloğlunun 50 yaşı tamam olanda Moskvadan çox böyük heyət gəlmişdi. Bakıda komendant saatı ləğv edildi. İndi bu barədə danışmaq asandır. Bu, çox çətin, gərgin və yoxsul bir dövrdə Bakıda bayram təşkil edildi. Heydər Əliyev bütün bunları nəyin naminə və nəyə görə etdiyini gözəl başa düşürdü. O, çox yaxşı başa düşürdü ki, millət mədəniyyət və incəsənət olmadan yaşaya bilməz. Heydər Əliyev çox müdrik və dərin insan idi. Azərbaycan Heydər Əliyev və İlham Əliyev sayəsində təkcə regionun deyil, həm də dünyanın çiçəklənən ölkələrindən birinə çevrilib. Mən İlham Əliyevə və Mehriban xanıma xoşbəxtlik və firavanlıq arzu edirəm. Onlar müdrik valideynlərinin layiqli övladlarıdır.

Ordu generalı, Rusiya Xarici Kəşfiyyat Xidmətinin keçmiş direktoru, MDB-nin icraçı katibi Sergey Lebedev:

-Heydər Əliyev dövlət təhlükəsizliyi orqanlarına 1941-ci ildə gəlib və 26 il sonra Azərbaycan Dövlət Təhlükəsizliyi Komitəsinin sədri olub. O, Azərbaycan SSR KP MK-nın birinci katibi kimi, Azərbaycanın inkişafına və tərəqqisinə misilsiz töhfə verib. Bu gün artıq keşməkeşli dönüş illəri olan 1990-cı illərdə onun fəaliyyətindən, Azərbaycanı vətəndaş müharibəsindən və sonrakı fəlakətlərdən xilas etməsindən danışdılar. Biz Azərbaycan xalqının Ulu Öndərini nəinki böyük ehtiramla, həm də böyük məhəbbətlə anırıq. Bu günlərdə faşist Almaniyası üzərində Qələbənin növbəti ildönümü qeyd edilib. Bu şanlı tarixə həsr olunmuş tədbirdə Azərbaycanın indiki lideri İlham Əliyevin xanımı ilə birlikdə şəxsən iştirak etməsini vurğulamaya bilmərəm. KİV-lərin çoxu Heydər Əliyevin Böyük Vətən müharibəsi illərində Azərbaycanda daxili təhlükəsizliyin təmin edilməsinə böyük töhfəsindən və müharibə veteranlarına qayğıkeş münasibətindən yazır. Azərbaycanın 700 mindən çox vətəndaşı faşizm əleyhinə döyüşlərdə iştirak edib və 100-dən çox Azərbaycan oğlu Sovet İttifaqı Qəhrəmanı adına layiq görülüb.

Rusiyanın Xalq Artisti İosif Kobzon:

-Heydər Əliyev Rusiya-Azərbaycan münasibətlərinin inkişafında əsas rol oynayıb. Müdrik rəhbər Heydər Əliyev başıpozuqluğun baş alıb getdiyi, hakimiyyətin dəyişdiyi, hamının təlatümlərdən, vətəndaş müharibəsindən qorxduğu çox çətin bir məqamda hakimiyyətə gəlib. O, mənim konsertlərimə gəlirdi, çay süfrəsi arxasında söhbət edirdik. Düzünə qalsa, mən mədəniyyəti və incəsənəti başa düşən, vətənpərvərliyi qoruyan belə müdrik rəhbərə sahib olduqları üçün həmkarlarıma - Müslüm Maqomayevə və başqalarına qibtə edirdim. Heydər Əliyev bütün bunları ləyaqətli oğluna – xalqına və ölkəsinə atasının vəsiyyət etdiyi kimi rəhbərlik etməyə davam edən İlham Əliyevə təhvil verdi. Hər dəfə Azərbaycana gələndə onun yeni-yeni təşəbbüslərinin şahidi oluram. Mən çox şadam və fəxr edirəm ki, Azərbaycan kimi bir ölkə sürətlə inkişaf edir.

RF Federasiya Şurasının Beynəlxalq işlər komitəsinin sədri Konstantin Kosaçov:

-Hər bir şəxsiyyətin böyüklüyü zaman keçdikcə aydın görünür. Heydər Əliyevin qeyri-adiliyi bundadır ki, onun şəxsiyyətinin miqyası yalnız artır. Onun müxtəlif dövrlərdə həyatını bütünlüklə həsr etdiyi işlər müxtəlif vəziyyətlərdə, müxtəlif təzahür və keyfiyyətlərdə müasir Azərbaycanda yaşayır, varisi, ölkənin indiki Prezidenti tərəfindən davam etdirilir. Ölkə yüksələn xətt üzrə son dərəcə sabit inkişaf edir. Bu, indiki mürəkkəb geosiyasi durumda çox çətindir. Təəssüf ki, Rusiya kimi, Azərbaycanın da xarici aləmdə çoxlu bədxahları var. Mən bu barədə AŞPA-da, ATƏT PA-da, bunlar kimi digər strukturlarda vaxtaşırı Azərbaycan ətrafında yaranan diskussiyalardan çıxış edərək mühakimə yürüdürəm. Müasir Azərbaycan öz ləyaqətini qoruyub saxlayır, suverenliyinə toxunmağa qoymur, yəni əsası Heydər Əliyev tərəfindən qoyulmuş və hazırda adekvatlığını və milli maraqlara uyğunluğunu sübuta yetirən xətti davam etdirir.

Fəridə Abdullayeva

AZƏRTAC-ın xüsusi müxbiri

Moskva