İQTİSADİYYAT
Moskvada nəqliyyat sahəsində əməkdaşlıq üzrə Avrasiya Şurasının yaradılması məsələsi müzakirə edilib
Moskva, 8 dekabr, AZƏRTAC
Moskvada BMT-nin Asiya və Sakit okean ölkələri üzrə İqtisadi və Sosial Komissiyasının (UNESCAP) 3-cü Nazirlər konfransı keçirilib. Tədbirdə Azərbaycanı nəqliyyat naziri Ziya Məmmədovun rəhbərlik etdiyi nümayəndə heyəti təmsil edib.
Konfransda 40-dan çox ölkənin, 28 beynəlxalq təşkilatın təmsilçiləri iştirak edib. Tədbirin gündəliyində beynəlxalq yükdaşımalarının normativ-hüquqi bazasının təkmilləşdirilməsi, yeni material və texnologiyaların tətbiq edilməsi, nəqliyyat şəbəkələrinin genişləndirilməsi, başqa regionların infrastrukturu ilə birləşdirilməsi və digər aktual məsələlər müzakirə olunub.
Rusiya Prezidenti Vladimir Putinin konfrans iştirakçılarına məktubunda bildirilib ki, Asiya-Sakit okean ölkələri üzrə tərəfdaşlarla əməkdaşlıq Rusiyanın nəqliyyat strategiyasının prioritetlərindəndir. Regionun unikal coğrafi, iqtisadi, demoqrafik və tranzit potensialı planetin bu hissəsində effektiv nəqliyyat sisteminin yaradılmasını şərtləndirir. Rusiya Prezidenti vurğulayıb ki, Asiya və Avropada nəqliyyat problemlərinin həllinə cavabdeh beynəlxalq strukturların fəaliyyətini əlaqələndirəcək Avrasiya Əməkdaşlıq Şurasının yaradılması olduqca vacib və vaxtında qəbul edilmiş qərardır.
Azərbaycanın nəqliyyat naziri Ziya Məmmədov konfransda çıxış edərək ölkəmizin tranzit siyasətinin inkişaf etmiş infrastrukturun yaradılması, nəqliyyat yollarının diversifikasiyası, nəqliyyat layihələrinə dövlət dəstəyi, sərhədlərin keçilməsi prosedurlarının yüngülləşdirilməsi, malların daşınmasını asanlaşdıran logistika sistemlərinin tətbiqi və digər məsələlərin həllinə yönəldiyini bildirib. Azərbaycanın Qafqaz ərazisindən keçən Avrasiya nəqliyyat yollarının inkişafı layihələrinin fəal iştirakçısı olduğunu deyən nazir vurğulayıb ki, Gürcüstan və Türkiyə ilə birgə həyata keçirilən Bakı-Tbilisi-Qars dəmir yolu layihəsi TRASEKA dəhlizinin inkişafına, Avropa və Asiyanın dəmir yolu şəbəkələrinin birbaşa birləşdirilməsinə xidmət edir. Bundan əlavə, ilin sonunadək İran İslam Respublikası ilə sərhəddə dəmir yolu sahəsinin və körpünün tikintisinin başa çatdırılacağını qeyd edən Z.Məmmədov bu layihənin Rusiya və İran dəmir yolu şəbəkələrinin Azərbaycan ərazisi vasitəsilə Şimal-Cənub dəhlizi layihəsi çərçivəsində birləşdirilməsində mühüm addım olduğunu diqqətə çatdırıb. Nazir bildirib ki, ətraf mühitin mühafizəsi, ekoloji cəhətdən təmiz nəqliyyatın yaradılması Azərbaycan dövlətinin qarşıya qoyduğu prioritet məsələlərdən biridir. Azərbaycanın nəqliyyat naziri UNESCAP-ın yeni Regional Fəaliyyət Proqramından danışaraq qeyd edib ki, nəqliyyatın əlyetərliliyi və təhlükəsizliyi, nəqliyyat əməliyyatlarında müasir informasiya-kommunikasiya texnologiyalarının tətbiqi yeni sənədin əsas istiqamətlərindən olmalıdır.
Qeyd edək ki, UNESCAP nəqliyyat nazirləri konfransı hər beş ildən bir keçirilir və Asiya-Sakit okean regionunda (ASR) nəqliyyat sahəsində əməkdaşlığın perspektivlərini müəyyənləşdirir. Builki konfransın iştirakçıları ASR-də nəqliyyat sahəsində dayanıqlı inkişaf üzrə Bəyannamə, 2021-ci ilədək olan müddəti əhatə edəcək nəqliyyatın inkişafına dair Regional Fəaliyyət Proqramını təsdiq edib, nəqliyyat sahəsində əməkdaşlıq üzrə Avrasiya Şurasının yaradılması məsələsini müzakirə ediblər.
Asiya və Sakit okean ölkələri üzrə İqtisadi və Sosial Komissiya BMT İqtisadi və Sosial Şurasının beş regional komissiyasından biridir. UNESCAP-ın əsas məqsədi iqtisadi inkişaf, ticarət, ekologiya, iştirakçı ölkələrin iqtisadi əməkdaşlığının stimullaşdırılması sahələrində qloballaşma proseslərinin idarə olunmasıdır. Komissiyanın 53 üzvü, o cümlədən 9 assosiativ üzvü var. Region ölkələrindən başqa komissiyaya Fransa, Niderland, Böyük Britaniya və ABŞ da daxildir. UNESCAP əhatə etdiyi sahəyə və regionun əhalisinin sayına görə BMT-nin ən böyük komissiyası sayılır.
Fəridə Abdullayeva
AZƏRTAC-ın xüsusi müxbiri
Moskva