Tokio, 5 dekabr, AZƏRTAC

Müasir dünyada baş verən proseslər fonunda Bakı Beynəlxalq Humanitar Forumu böyük əhəmiyyətə malikdir.

IV Bakı Beynəlxalq Humanitar Forumunun iştirakçısı, Yaponiyanın Beynəlxalq Dostluq Mübadiləsi Şurasının prezidenti Ken Matsuzava AZƏRTAC-ın xüsusi müxbirinə müsahibəsində bu barədə danışıb.

K.Matsuzava bildirib ki, hazırda sülh problemi, humanizm məsələləri bəşəriyyəti ciddi şəkildə narahat edir və bunlar müxtəlif səviyyələrdə müzakirə olunur. Bu mənada Azərbaycan Prezidenti İlham Əliyevin rəhbərliyi ilə təşkil edilən Bakı Beynəlxalq Humanitar Forumu, burada müzakirə olunan məsələlər yalnız hər hansı bir ölkə üçün deyil, ümumiyyətlə bütün dünya üçün xüsusi əhəmiyyətə malikdir. Belə bir mühüm təşəbbüslə çıxış etdiyinə görə Azərbaycan rəhbərliyinə, xüsusən Prezident İlham Əliyevə minnətdarlığımı bildirmək istəyirəm. Qədim tarixi, zəngin mədəniyyəti və dinamik inkişafı ilə dünyanın diqqətini cəlb edən Azərbaycanın bu təşəbbüsü həqiqətən təqdirəlayiqdir.

Yaponiyada Azərbaycanın uğurlarının diqqətlə izlənildiyini qeyd edən K.Matsuzava bildirib ki, iki qədim xalq arasında əməkdaşlıq əlaqələrinin daha da möhkəmlənməsi bu gün xüsusi əhəmiyyətə malikdir. Bu məqsədlə biz Beynəlxalq Dostluq Mübadiləsi Şurası yanında Yaponiya-Azərbaycan Dostluq Assosiasiyasının yaradılması qərarına gəldik. Təşkilatın məqsədi Yaponiya ilə Azərbaycan arasında mədəni, iqtisadi və digər sahələrdə əlaqələrin daha da möhkəmlənməsidir.

Şuranın prezidenti deyib: “Bakıda olarkən diqqətimi ən çox təmizlik və səliqə-sahman cəlb etdi. Özü də bu təmizlik yalnız küçələrdə deyil, həm də insanların qəlbində, ruhunda idi. İlk dəfə səfər etdiyim Azərbaycan öz əzəməti, möhtəşəmliyi, burada yaşayan insanlar isə səmimiliyi ilə məni heyran etdi. Buna görə də biz qərara gəldik ki, belə bir təşkilatın yaranması və fəaliyyəti zəngin tarixə və qədim mədəniyyətə malik iki xalqı daha da yaxınlaşdırar”.

Azərbaycanın Yaponiyadakı səfirliyinin bu istiqamətdə apardığı işi yüksək qiymətləndirən K.Matsuzava bildirib ki, bu amil də təşkilatın gələcək fəaliyyətinin uğurlu olacağını deməyə əsas verir.

Humanitar Forumda mədəniyyətlərarası əlaqələrin geniş müzakirə mövzusu olduğunu xatırladan K.Matsuzava məhz bu baxımdan Yaponiya-Azərbaycan Dostluq Assosiasiyasının yaradılmasının günün tələbi olduğunu vurğulayıb.

Hər il azı dünyanın 20-dək ölkəsinə səfər etdiyini bildirən Şuranın prezidenti Azərbaycanın sürətli inkişafı, müasirliyi ilə yanaşı, burada tarixi abidələrə, ətraf mühitə yetirilən diqqətin onu heyrətə gətirdiyini bildirib. Qeyd edib ki, Azərbaycan rəhbərliyinin yalnız infrastruktur layihələrinə deyil, eyni zamanda, humanitar məsələlərə, mədəniyyətə, təhsilə göstərdiyi qayğı onda böyük təəssürat doğurub. Bakını Tokio ilə müqayisə edən K.Matsuzava müasir inkişafla yanaşı, klassik stilin saxlanmasının bu iki möhtəşəm şəhəri bir-birinə çox bənzətdiyini vurğulayıb. O, ölkəmizin gələcəkdə daha böyük uğurlara imza atacağına əmin olduğunu bildirib.

Vüqar Ağayev

AZƏRTAC-ın xüsusi müxbiri

Tokio