Bakı, 19 dekabr, Kifayət Əliyeva, AZƏRTAC

Dekabrın 19-da Azərbaycan Müəllimlər İnstitutunda (AMİ) “Müasir tərbiyə sisteminin vəziyyəti: axtarışlar, problemlər, təkliflər” mövzusunda respublika konfransı keçirilib.

AZƏRTAC xəbər verir ki, əvvəlcə tədbir iştirakçıları institutun nəzdində fəaliyyət göstərən Heydər Əliyev Mərkəzini ziyarət edib, Ulu Öndərin büstü önünə əklil qoyublar.

Konfransın plenar iclasında AMİ-nin tədris işləri üzrə prorektoru Razim Məmmədov müasir tərbiyə sisteminin vəziyyətindən, gənc nəslin tərbiyəsində yeni üsul və yanaşmalardan danışıb. Bildirilib ki, ölkəmizdə böyük uğurla həyata keçirilən sosial-iqtisadi siyasət, genişmiqyaslı islahatlar və infrastruktur layihələri təhsil sisteminin müasirləşdirilməsi və davamlı inkişafı üçün münbit zəmin yaradıb. Təhsili millətin gələcəyi adlandıran, müəllim peşəsini dünyada ən şərəfli sənət sayan ulu öndər Heydər Əliyevin yaratdığı təməl üzərində modernləşən respublikamızda təhsil cəmiyyətin inkişafının prioritet istiqamətlərindən birinə çevrilib. Heydər Əliyev Fondunun “Yeniləşən Azərbaycana yeni məktəb!” layihəsi ölkəmizdə böyük uğurla reallaşdırılır.

Prezident İlham Əliyevin 2013-cü il 24 oktyabr tarixli Sərəncamı ilə təsdiq edilmiş “Azərbaycan Respublikasında təhsilin inkişafı üzrə Dövlət Strategiyası”nda vurğulanır ki, iqtisadiyyatın qlobal sistemə uğurlu inteqrasiyası prosesində ən mühüm şərtlərdən olan insan kapitalının inkişafı ölkənin təhsil sisteminin başlıca vəzifəsini təşkil edir.

R.Məmmədov Azərbaycan Müəllimlər İnstitutunda son illərdə ali təhsildə Bolonya Bəyannaməsindən irəli gələn başlıca prinsiplərin tətbiqi, təhsilin keyfiyyətinin yaxşılaşdırılması və digər istiqamətlərdə görülmüş işlərin əhəmiyyətindən danışıb.

Tədbirdə Təhsil Nazirliyinin elm və ali təhsil şöbəsinin sektor müdiri Sülhəddin Gözəlovun “Gənclərin milli ruhda tərbiyəsində təhsilin rolunun yüksəldilməsi” mövzusunda məruzəsi dinlənilib. Qeyd olunub ki, müasir dünyada gedən qloballaşma prosesi cəmiyyətin inkişafında, o cümlədən insan resurslarının idarə olunmasında önəmli problem kimi diqqəti cəlb edir.

İnstitutun psixologiya kafedrasının müdiri, dosent Nurəngiz Rzayeva “Tələbələrin dəyərlər sisteminin formalaşması tərbiyə prosesinin başlıca funksiyası kimi” mövzusunda məruzəsində tərbiyə anlayışının mahiyyətindən, müzakirə olunan mövzunun əhəmiyyətindən söz açıb.

Azərbaycan Dövlət Pedaqoji Universitetinin tərbiyə işləri üzrə prorektoru Rafiq Baxşəliyev, Azərbaycan Təhsil Şurasının sədri Əjdər Ağayev, AMİ-nin ibtidai və məktəbəqədər təhsilin metodikası kafedrasının müdiri Mircəfər Həsənov müasir şəraitdə tərbiyə işinin başlıca məqsədlərindən, müəllimlərin bilik, bacarıq və peşəkarlıq qabiliyyətlərinin, səriştəlilik səviyyəsinin yeni tələblərə uyğunlaşdırılmasının vacibliyindən danışıblar.

Daha sonra konfrans işini “Təlim-tərbiyə prosesinin elmi-nəzəri və praktik məsələləri”, “Tərbiyənin psixoloji problemləri və onun şəxsiyyətin formalaşmasına təsiri” və “Müasir dövrdə mənəvi-əxlaqi tərbiyənin ümumi problemləri” bölmələrində davam etdirib. İclaslarda 160-dək məruzə dinlənilərək müzakirə olunub.