Bakı, 5 oktyabr, AZƏRTAC

Suraxanı rayonunda Beynəlxalq Müəllimlər Gününə həsr olunan tədbir keçirilib.

Suraxanı Rayon İcra Hakimiyyətindən AZƏRTAC-a bildirilib ki, tədbir iştirakçıları əvvəlcə ümummilli lider Heydər Əliyevin adını daşıyan parkda Ulu Öndərin abidəsi önünə güllər düzüblər.

Sonra iştirakçılar Suraxanı rayonundakı Heydər Əliyev Mərkəzinin elektron lektoriya zalında təhsil sahəsində qazanılan uğurları əks etdirən sərgi ilə tanış olublar.

Tədbirdə Suraxanı Rayon İcra Hakimiyyətinin başçısı İlqar Abbasov bildirib ki, müstəqil dövlətimizin qurucusu, ümummilli lider Heydər Əliyevin “Gənclərimiz mükəmməl təhsil almalı, həyatı dərindən öyrənməli, dünyada gedən prosesləri bilməlidir” kəlamı bu gün də xüsusi əhəmiyyət daşıyır. Hazırda Prezident İlham Əliyev Ulu Öndərin siyasi kursunu uğurla həyata keçirir, onun elm və təhsil haqqındakı tezis və kəlamlarını əsas tutaraq gələcək nəsillərin işıqlı və müasir tələblərə cavab verən məktəblərdə təhsil almaları üçün əlindən gələni edir. Son illərdə respublikamızda 3 minədək yeni məktəb binası tikilib, yüzlərlə məktəb binası əsaslı təmir olunub. Azərbaycan təhsilinin dünya təhsil sisteminə inteqrasiyası, məktəblərin maddi-texniki təchizatının müasir tələblər səviyyəsində qurulması və təhsil işçilərinin maddi-rifah halının yaxşılaşdırlması üçün çoxlu sayda dövlət proqramları, fərman və sərəncamlar imzalanıb.

Azərbaycanın birinci xanımı, Heydər Əliyev Fondunun prezidenti, UNESCO-nun və ISESCO-nun xoşməramlı səfiri, Milli Məclisin deputatı Mehriban Əliyevanın bilavasitə rəhbərliyi ilə respublikamızda həyata keçirilən “Yeniləşən Azərbaycana yeni məktəb” proqramı gənc nəslə və müəllimlərə olan qayğının əyani təzahürüdür. Bu proqram çərçivəsində ölkəmizin hər bir yerində yeni məktəb binalarının tikintisi və əsaslı təmiri ilə bağlı illər ərzində yığılıb qalmış problemlərin həlli istiqamətində ciddi işlər görülür.

İ.Abbasov vurğulayıb ki, hazırda ölkəmizdə 300 minədək, rayonumuzda isə 3.145 müəllim çalışır. Müəllimlərin maddi-rifah halının yaxşılaşdırılması məqsədilə mütəmadi olaraq tədbirlər görülür, onlar fəxri adlarla və müxtəlif dövlət mükafatları ilə təltif edilirlər.

Milli Məclisin deputatları Ağacan Abiyev, Sevinc Fətəliyeva, Fərəc Quliyev və digər çıxış edənlər müəllimlərin cəmiyyətimizdə yüksək yer tutduğunu, onların həmişə ölkə rəhbərliyinin diqqətində olduğunu vurğulayıblar.

Təhsil sahəsində fərqlənən müəllimlər və ali məktəblərə qəbul imtahanlarında yüksək nəticə göstərən məzunlar rayon icra hakimiyyəti başçısının fəxri fərmanı ilə təltif ediliblər.