CƏMİYYƏT
Qəzaya uğrayan “Silk Way” şirkətinə məxsus yük təyyarəsində həlak olanlar var [YENİLƏNİB]
Bakı, 19 may, AZƏRTAC
Mayın 18-də “Silk Way” aviaşirkətinə məxsus yük təyyarəsinin Əfqanıstanda qəzaya uğrayıb. İlkin məlumata görə, təyyarənin 9 ekipaj üzvündən 7-si həlak olub.
AZƏRTAC-a Azərbaycan Dövlət Mülki Aviasiya Administrasiyasından bildirilib ki, təyyarə Bakı vaxtı ilə təxminən saat 18:30 radələrində Dvayer hava limanından uçuş zamanı qəzaya uğrayıb. Beynəlxalq heyət tərəfindən idarə edilən təyyarənin ekipajına 5 Azərbaycan, 3 Ukrayna və 1 Özbəkistan vətəndaşı daxildir.
Hadisənin səbəblərini araşdırmaq üçün komissiya yaradılıb. Komissiya üzvlərinin mayın 19-da hadisə yerinə gedəcəyi gözlənilir.
X X X
Azərbaycan Dövlət Mülki Aviasiya Administrasiyası mayın 18-də “Silk Way” aviaşirkətinə məxsus təyyarənin Əfqanıstanda qəzaya uğraması ilə bağlı məlumat yayıb.
Administrasiyadan AZƏRTAC-a daxil olan məlumatda bildirilib ki, Əfqanistanın Gilmənd əyalətində bu ölkə daxilində yük daşımaları məqsədilə “Silk Way” şirkətindən icarəyə götürülən “An-12” yük təyyarəsində aviasiya hadisəsi baş verib. Hadisənin Bakı vaxtı ilə təxminən saat 18:30 radələrində Dvayer hava limanından uçuş zamanı baş verdiyi qeyd olunub.
İcarəyə götürülən təyyarə beynəlmiləl heyət tərəfindən idarə edilib. Heyətin tərkibinə Özbəkistan (kapitan), üç Ukrayna və beş Azərbaycan vətəndaşı daxildir.
Azərbaycan Dövlət Mülki Aviasiya Administrasiyası tərəfindən hadisənin araşdırılması üzrə komissiya yaradılıb. Hazırda Əfqanıstanın aviasiya qurumları ilə hadisənin səbəblərinin araşdırmaq məqsədilə mayın 19-da komissiyanın nümayəndələrinin hadisə yerinə getməsi üzrə razılaşdırma prosesi gedir.
Komissiya hadisə barədə əlavə məlumatı KİV-in diqqətinə çatdıracaq.