REGİONLAR
Multikulturalizm sahəsində ən uğurlu model kimi Azərbaycan nümunəsi öyrənilir
Siyəzən, 26 may, Elxan Yusifli, AZƏRTAC
Mayın 26-da Siyəzən şəhərində Yeni Azərbaycan Partiyası (YAP) Qadınlar Şurasının təşkilatçılığı ilə “Multikultural dəyərlər və azərbaycançılıq” mövzusunda konfrans keçirilib.
AZƏRTAC xəbər verir ki, Siyəzən Şəhər Mədəniyyət Sarayında keçirilən tədbirdə YAP Quba, Qusar, Xaçmaz, Şabran, Siyəzən və Xızı rayonlarının Qadınlar Şurasının sədrləri və ictimaiyyətin nümayəndələri iştirak ediblər.
YAP Siyasi Şurasının üzvü, Milli Məclisin deputatı Məlahət İbrahimqızı bildirib ki, multikultural dəyərlərin Azərbaycan modelinin təbliği istiqamətində ölkəmizdə bir sıra tədbirlər həyata keçirilir. YAP ölkənin ən nüfuzlu və qüdrətli siyasi qüvvəsidir. Bu baxımdan YAP Qadınlar Şurasının bu istiqamətdə gördüyü işlər təqdirəlayiqdir. Paytaxtla yanaşı, regionlarda da bu cür tədbirin keçirilməsi, multikulturalizmin Azərbaycan modelinin təbliğ olunması əlamətdar hadisədir.
Azərbaycanda multikulturalizmin dövlət siyasətinin tərkib hissəsini təşkil etdiyini vurğulayan natiq multikultural nəzəriyyənin əsasında ulu öndər Heydər Əliyevin müəllifi olduğu azərbaycançılıq ideologiyasının dayandığını qeyd edib. Bildirilib ki, bu dəyərlər dünyada ölkəmizin nüfuzunu daha da artırır. Ölkəmizdəki tolerant və multikultural dəyərlər etnik mənsubiyyətindən asılı olmayaraq bütün insanların birləşməsinə səbəb olub. Tolerantlıq və multikulturalizmin Azərbaycan modeli bütün dünyada böyük rəğbətlə qarşılanır. Multikulturalizm sahəsində ən uğurlu model kimi Azərbaycan nümunəsi öyrənilir.
Konfransda YAP Qadınlar Şurasının İdarə heyətinin üzvü Zərifə Quliyeva və partiyanın rayon təşkilatları qadınlar şuralarının nümayəndələri çıxış edərək azərbaycançılıq ideologiyası və multikulturalizmin bir-birini tamamlayan dəyərlərə çevrildiyini vurğulayıblar.
Tədbirdə multikultural dəyərlərlə yanaşı, qadın hüquqları, qadınların ölkəmizin inkişafındakı rolu və başqa mövzular ətrafında fikir mübadiləsi aparılıb.