Bakı, 25 yanvar, Nihad Budaqov, AZƏRTAC

Kanadanın “Zenith Energy Ltd.” şirkətinin törəməsi “Zenith Aran Oil Company Limited” tərəfindən Azərbaycanın quruda yerləşən “Muradxanlı”, “Cəfərli” və “Zərdab” neft yataqlarının daxil olduğu blokdakı 10 quyuda əsaslı təmir işləri aparılacaq.

AZƏRTAC xəbər verir ki, bu barədə şirkətin məlumatında deyilir. Bildirilir ki, “Zenith Energy Ltd.” şirkətinin Azərbaycandakı strategiyasının əsas elementi yaxın perspektivdə gündəlik hasilatın miqdarını müntəzəm artırmaq üçün fəaliyyətinin miqyasını genişləndirməkdir. Bu məqsədə nail olmaq üçün aşağı hasilatı olan 65 quyudan ilk 10 quyunun əsaslı təmiri işləri proqramına başlanılıb. Qazma qurğusu artıq yoldadır və yanvarın 31-də əməliyyata başlanması gözlənilir.

Deyilir ki, blokdan stabil olaraq təxminən gündəlik 295 barrel neft hasil olunur. “Zenith” şirkəti “Muradxanlı-Cəfərli-Zərdab” yataqlarından “Urals” markalı neftin çatdırılmasından SOCAR tərəfindən müntəzəm olaraq ödəniş almağa davam edir. Beynəlxalq boru kəmərləri şəbəkəsinə çıxarılan xam neftin miqdarına görə dəqiq, hətta nəzərdə tutulan vaxtdan öncə ödəniş olunub.

“Zenith Energy Ltd.” şirkətinin icraçı direktoru Andrea Kattaneo əsaslı təmir proqramının başlanmasından məmnun olduqlarını bildirib. Qeyd edib ki, hazırda “Urals” markalı xam neftin bir barrelinin qiyməti 51 dollara çatıb. Bu isə yataqlarda əməliyyata başlayan vaxt mövcud olan qiymətdən bahadır. Şirkətin hasilatın artırılması üçün işlərin sürətləndirilməsi strategiyasına başlaması indiki vaxtda çox sərfəlidir.

Xatırladaq ki, keçən ilin avqustunda “Muradxanlı”, “Cəfərli” və “Zərdab” neft yataqlarının daxil olduğu blokdan hasilatın pay bölgüsü sazişi çərçivəsində ilk neft hasil olunub.

Qeyd edək ki, 2016-cı il martın 16-da SOCAR və “Zenith Aran Oil Company Limited” şirkətləri arasında “Muradxanlı”, “Cəfərli” və “Zərdab” neft yataqlarının daxil olduğu blokun bərpası, kəşfiyyatı, işlənməsi və hasilatın pay bölgüsü haqqında saziş imzalanıb. Sazişi SOCAR-ın prezidenti Rövnəq Abdullayev və “Zenith Aran Oil Company Limited” şirkətinin baş icraçı direktoru Andrea Kattaneo imzalayıblar.

Sazişdə “Zenith” şirkəti 80 faizlik, bütünlükdə SOCAR-a məxsus Ortaq Neft Şirkəti isə 20 faizlik iştirak payına malikdirlər. Saziş 25 il müddətində qüvvədə olacaq. “Muradxanlı”, “Cəfərli” və “Zərdab” yataqları ümumilikdə 642,4 kvadratkilometr ərazini əhatə edir.

“Zenith Aran Oil Company Limited” bütövlükdə “Zenith Energy Ltd.” şirkətinə məxsus olan ortaq şirkətdir.