Bakı, 8 sentyabr, AZƏRTAC 

Azərbaycan Dövlət Musiqili Teatrı 107-ci mövsümün ilk dörd ayı üçün repertuar planını açıqlayıb.

Qurumun mətbuat xidmətindən AZƏRTAC-a bildirilib ki, bədii şuranın geniş və açıq iclasında 2016-cı ilin sonuna qədər olan müddət üçün Musiqili Teatrın repertuar və iş planı təsdiqlənib. Şuranın iclasını açıq elan edən Dövlət Musiqili Teatrının direktoru, Əməkdar İncəsənət Xadimi Əliqismət Lalayev ötən mövsümdə görülən işləri xatırlatmaqla yanaşı, yeni mövsümdə qarşıda duran vəzifələrdən danışıb. Ə.Lalayev çıxışı zamanı bildirib ki, arxada qalan 106-cı mövsüm Dövlət Musiqili Teatrı üçün uğurlu və əlamətdar hadisələrlə zəngin olub. Bir sıra tamaşaların premyerası keçirilib, teatrın aktyorları yerli və beynəlxalq müsabiqələrdə yüksək səviyyədə iştirak ediblər, müxtəlif rəsmi və yaradıcı təşkilatların mükafatlarını qazanıblar. Mövsüm boyu Musiqili Teatrda bir çox beynəlxalq və respublika əhəmiyyətli tədbirlər keçirilib.

Sonra 2017-ci ilə qədər olan dövr - sentyabr, oktyabr, noyabr və dekabr ayları üçün repertuar və iş planı müzakirə edilərək təsdiq olunub. Nəzərdə tutulan müddət ərzində teatrın repertuarında olan 25-ə yaxın tamaşa təqribən 70 dəfə nümayiş etdiriləcək. Qarşıdakı dörd ay ərzində “O olmasın, bu olsun”, “Ər və arvad”, "Baladadaşın toy hamamı”, “Amerikalı kürəkən”, “999-cu gecə”, “Toya bir gün qalmış”, “Qızıl toy”, “www-ferzeli-kef.com”, “Kimdir müqəssir?”, “Mən dəyərəm min cavana”, “Talelər qovuşanda” və başqa tamaşalar nümayiş olunacaq. Habelə “Qafqazlı qardaşqızı”, “Fransız sayağı qarnir”, “Skapenin kələkləri”, “Düyməcik”, “Yağış göbələyinin macərası”, “Qızıl cücə”, “Dəcəl çəpişlər”, “Qırmızıpapaq” və başqa səhnə əsərləri rus dilli və balaca tamaşaçılar üçün təqdim olunacaq. Bu müddət ərzində Musiqili Teatrın sevimli tamaşaçıları gülüş ustalarının ifalarını izləyə biləcəklər.

Cari ilin sonuna qədər bir neçə premyeranın keçirilməsi də nəzərdə tutulur. Sentyabr ayında II Şəki Beynəlxalq Teatr Festivalı çərçivəsində İstanbul Bələdiyyə Teatrının “Şekspir” (Elçin) tamaşası da Musiqili Teatrda nümayiş olunacaq. İlin sonunadək Musiqili Teatrda Prezident İlham Əliyevin 17 mart 2016-cı il tarixli Sərəncamına əsasən Azərbaycan teatr və kino sənətinin görkəmli nümayəndəsi, böyük gülüş ustası, Dövlət mükafatı laureatı, Xalq Artisti Nəsibə Zeynalovanın anadan olmasının 100 illik yubileyi keçiriləcək. Noyabr ayında isə Dövlət Musiqili Teatrının “Multikulturalizm və teatr” mövzusunda IV Beynəlxalq Teatr Konfransına ev sahibliyi etməsi nəzərdə tutulur.