REGİONLAR


Mütəxəssislər rayonlarda kümçülərlə görüşür, ipəkqurdunun saxlanılma və yemlənmə şəraiti ilə tanış olurlar

Bakı, 18 may, AZƏRTAC

Azərbaycanda ipəkçiliyin bərpası və sürətli inkişafı ilə bağlı Prezident İlham Əliyevin tapşırıqlarına uyğun olaraq Kənd Təsərrüfatı Nazirliyi tərəfindən beynəlxalq təcrübə nəzərə alınmaqla, respublikamızda ipəkçiliyin müasir infrastrukturunun yaradılması istiqamətində tədbirlərin həyata keçirilməsi davam etdirilir.

Qeyd olunan tədbirlər çərçivəsində Kənd Təsərrüfatı Nazirliyi tərəfindən Çin Xalq Respublikasının “Shandong Guangtong Silkworm Eggs Co” şirkətindən 6000 qutu yüksək keyfiyyətli barama toxumları tədarük edilib, Qax Damazlıq İpəkçilik Stansiyasında inkubasiyaya qoyulub, barama toxumlarından 99-100 faiz səviyyəsində çıxış alınaraq, yüksək keyfiyyətli ipəkqurdları əldə edilib. İpəkqurdları bölgü əsasında Ağcabədi, Ağdam, Bərdə, Yevlax, Zərdab, Ağdaş, Göyçay, Ağsu, Sabirabad, Saatlı, İmişli, Hacıqabul, Kürdəmir, Ucar, Goranboy, Füzuli, Tərtər, Balakən, Zaqatala, Qax, Şəki, Oğuz, Qəbələ, İsmayıllı, Şəmkir, Ağstafa, Tovuz, Qazax, Cəlilabad və Masallı rayonlarının kümçülərinə əvəzi ödənilmədən paylanılıb.

Bu il üçün nəzərdə tutulmuş həcmdə barama istehsalını təmin etmək üçün ümumilikdə respublikanın 31 rayonunun 739 kəndini əhatə edən 3013 kümçü ailəsi tələb olunan miqdarda keyfiyyətli ipəkqurdları ilə təmin edilib, “Şəki İpək” ASC ilə kümçülər arasında yaş barama məhsulunun tədarükü barədə müvafiq müqavilələr bağlanılıb. Həmçinin baramaçılara ipəkqurdunun bəslənməsinə dair tövsiyə xarakterli bukletlər, metodiki vəsaitlər, yaddaş vərəqələri və digər maarifləndirici materiallar paylanılıb. Hazırda bölgələrdə ipəkqurdlarının bəslənilməsi prosesinə başlanılıb.

Müqavilənin şərtlərinə uyğun olaraq, Çin Xalq Respublikasının “Shandong Guangtong Silkworm Eggs Co” şirkətinin əməkdaşı ölkəmizə dəvət edilib və nazirliyin mütəxəssisləri ilə birlikdə bölgələrdə ipəkqurdlarının bəslənilməsi prosesinin gedişi ilə yerində tanış olmaq, ipəkqurdlarının becərilməsində qarşıya çıxan çətinliklərin həllində kümçülərə metodiki və əməli köməklik göstərilməsini təmin etmək məqsədi ilə mayın 12-dən 21-dək Ağcabədi, Ağdam, Füzuli, Tərtər, Bərdə, Yevlax, Goranboy, Zərdab, Ucar, Ağdaş, Göyçay, Ağsu, Kürdəmir, Hacıqabul, Sabirabad, Saatlı, İmişli, Cəlilabad, Masallı, Balakən, Zaqatala, Qax, Şəki, Oğuz, Qəbələ, İsmayıllı, Şəmkir, Ağstafa, Tovuz və Qazax rayonlarında səfərdədirlər.

Mütəxəssislər qeyd edilən rayonlarda yerli icra hakimiyyəti orqanlarının nümayəndələri ilə birlikdə tut ipəkqurdu paylanılmış kümçülərlə görüşlər keçirir, ipəkqurdunun saxlanılma və yemlənmə şəraiti ilə tanış olurlar. Həmçinin kümçülərə ipəkqurdunun bəslənilməsi, zərərverici və xəstəliklərə qarşı mübarizə tədbirləri, yemləmə qaydaları, saxlanma şəraiti və s. ilə bağlı məsləhət və tövsiyələr verilir.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.