REGİONLAR
Muxtar respublikada 23 min 100 hektardan çox sahədə taxıl biçini aparılıb
Naxçıvan, 18 iyul, AZƏRTAC
Naxçıvan Muxtar Respublikasında iyulun 15-nə olan məlumata görə, 23 min 108 hektar taxıl sahəsində biçin aparılıb. Məhsuldarlıq 29,8 sentner təşkil edib.
Muxtar respublikanın ən böyük bölgələrindən biri olan Babək rayonunda da taxıl tədarükü kampaniyası sürətlə davam etdirilir. Bu il babəklilər 9167 hektar sahədən məhsul götürəcəklər. Bu günədək 7 min 271 hektar sahədə taxıl yığımı başa çatıb. Məhsuldarlıq 30,1 sentner təşkil edib. Sahələrə 28 kombayn çıxarılıb.
Rayonda taxılçılığın inkişafına böyük önəm verilir. Bölgənin torpaqları bu sahə üçün əlverişlidir və rayonun torpaq mülkiyyətçiləri, sahibkarlar taxılçılıqda zəngin təcrübəyə malikdirlər.
Dövlət tərəfindən göstərilən qayğı da dinamik xarakter alıb. İlbəil rayonda meliorasiya-irriqasiya tədbirlərinin həcmi genişləndirilir, çörəkbişirmə sahələri yaradılır, mövcud dəyirmanların fəaliyyəti gücləndirilir, məhsuldar toxum sortları ilə təchizat diqqət mərkəzində saxlanılır, müasir kənd təsərrüfatı texnikalarının alınmasına böyük önəm verilir. Təbii ki, bütün bunlar yüksək məhsul istehsalı üçün başlıca amillərdir və problemlərin həlli torpaq sahiblərinin taxılçılığa marağını artırır.
Rayonun Nehrəm, Cəhri, Zeynəddin, Şıxmahmud, Sirab, Yarımca, Güznüt, Çeşməbasar və digər kəndlərinin taxıl zəmilərində çəkilən zəhmətin bəhrəsi toplanılır. Bölgədə taxılçılıqla məşğul olan Sənan Novruzov 70, Nicat Qurbanov 42, Cəmşid Həsənov 40, Asəf Məmmədov 25 hektar sahədə məhsul yetişdiriblər. Onlar taxılçılıqla yanaşı, kartof, bostan-tərəvəz məhsulları da əkib-becərirlər.
Taxıl yığımı ilə əlaqədar yazı hazırlamaq üçün bir neçə yaşayış məntəqəsində olduq. Belə qənaətə gəldik ki, əvvəldən həyata keçirilən hazırlıq tədbirləri öz bəhrələrini verib.
Yarımca bələdiyyəsinin sədri, uzun illər kəndin ictimai təsərrüfatına rəhbərlik etmiş Arif Səfərov taxılçılıqda zəngin təcrübəyə malikdir. Ötən ilin payızında o, 50 hektar sahədə taxıl əkib. Bu gün onun da sevincinin həddi-hüdudu yoxdur. Sahələrdə bol məhsul yetişib. Arif Səfərov dedi: “Hələ uşaqlıq illərindən yaxşı xatırlayıram ki, kənddə taxıl biçininə başlanması əsl el bayramına çevrilərdi. Torpaqlar ictimai təsərrüfatlara məxsus olsa da, kənd ağsaqqalları biçiləcək zəminin kənarına toplaşar, bir-birilərinə gözaydınlığı verərdilər. Sahənin kənarına mexanizatorlar, sürücülər üçün cürbəcür yeməklər gətirilərdi, samovar salınardı. Çünki tədarük olunan taxıl sabahın çörəyi demək idi. Çörək isə min illərdir ki, hamımız üçün ən müqəddəs nemətdir. Bu nemətin bolluğu həmişə insanları düşündürüb. Yaşlı adamlardan dəfələrlə bu sözləri eşitmişik: “Ulu Tanrı heç vaxt öz bəndəsini çörəklə imtahana çəkməsin”. Ancaq nə edəsən ki, xalqımızın belə imtahanla üz-üzə qaldığı vaxtlar da olub. Saatlarla mağazaların qarşısında çörək növbələri yaranıb. Çox şükür ki, bu gün süfrələrimizdə çörək sarıdan heç bir nigarançılığımız yoxdur. Dövlətimizin bu istiqamətdə həyata keçirdiyi tədbirlər öz bəhrələrini verməkdədir”.
Arif Səfərov bildirdi ki, bu təsərrüfat ilinin daha uğurlu olduğunu yazın ilk günlərindən müşahidə edib. Digər əkinçilik məhsullarının tədarükündə bunu gördük. Taxıl tədarükünün ilk günləri isə bu sahədə də yüksək məhsuldarlığa nail olunacağından xəbər verir.
Nehrəm kənd tam orta məktəbinin müəllimi Adil Mirzəyev həm də taxılçılıqla məşğul olur. O deyir ki, bu il taxıl bolluğu ilidir. Belə bolluğa isə asanlıqla nail olunmayıb. Bunun təməlində ümummilli lider Heydər Əliyevin müəyyənləşdirdiyi uzaqgörən aqrar siyasət dayanıb. Bu siyasətin muxtar diyarımızda uğurla davam etdirilməsi nəticəsində böyük nailiyyətlər əldə olunub.
Ölkə başçısının 2007-ci il yanvarın 23-də imzaladığı “Kənd təsərrüfatı məhsulları istehsalçılarına dövlət dəstəyi haqqında” Sərəncama əsasən, kənd təsərrüfatı məhsulları istehsalçılarına sərf etdikləri yanacaq və motor yağlarına görə dövlət tərəfindən hər hektar sahə üçün 40 manat, bundan başqa, buğda istehsalçılarının maddi marağının artırılması məqsədilə səpilən hər hektar buğda sahəsi üçün əlavə olaraq 40 manat vəsaitin verilməsi təmin olunub, həm kreditlərdən, həm də həmin yardımlardan təyinatı üzrə istifadə edilməsi diqqət mərkəzində saxlanılıb.
AZƏRTAC-ın Naxçıvan Muxtar Respublikasındakı bürosu