İQTİSADİYYAT
Nanotexnologiyanın tətbiqi zərərli tullantıların havaya atılmasının qarşısını alacaq
Bakı, 19 dekabr, Ramiz Quliyev, AZƏRTAC
Son illər dünyanın inkişaf etmiş ölkələrində nanotexnologiyaların istifadəsi ilə əlaqədar tədqiqatların aparılması geniş vüsət alıb. Alimlər bu sahənin dərindən öyrənilməsi ilə bir çox qlobal problemlərin həllini mümkün sayırlar. Bir faktı demək kifayətdir ki, ABŞ dövləti 2006-cı ildən etibarən hər il nanotexnologiyanın inkişafına 486 milyard dollar vəsait xərcləyib.
Nanotexnologiya yeni qeyri-adi xassələrə malik materiallar alınmasına imkan verir. Belə materiallar elm və texnikanın müxtəlif sahələrində-biotexnologiyada, hərbi işlərdə, tibdə, ətraf mühitin mühafizəsində və s. istifadə edilə bilər. Nanotexnologiya məhsullarının Azərbaycanda da geniş tətbiqi istiqamətində tədbirlər planlaşdırılır.
Azərbaycan Memarlıq və İnşaat Universitetinin kafedra müdiri, professor Fəqan Əliyev AZƏRTAC-ın müxbirinə ətraf mühitin çirklənməsinin qarşısının alınmasında nanotexnologiyaların rolundan danışıb. O bildirib ki, Azərbaycan Memarlıq və İnşaat və Bakı Dövlət universitetləri nanotexnologiya sahəsində elmi tədqiqat işlərini inkişaf etdirmək məqsədilə yaradılmış “Nano araşdırmalar mərkəzi” ilə sıx əməkdaşlıq edir. Hazırda sementin keyfiyyətinin artırılmasına xidmət edən “ekologiya mühəndisliyi” adlı layihə üzərində işləyirik. Layihənin rəhbəri sement və beton sahəsində nanolayihələr üzrə italiyalı mütəxəssis Luka Palmadır.
Biz qabaqcıl texnologiyanı ölkəmizdə iri sement şirkətlərindən sayılan Holcim –Azərbaycan ASC-də tətbiq etməyi düşünürük. Bu texnologiyanın sement istehsalında tətbiqi layihə müəlliflərinin başlıca məqsədidir. Sement istehsalı ətraf mühitə ziyan vurur. Müasir sement zavodlarında separatorlardan – süzgəclərdən istifadə edilsə də, havanın çirlənməsinin qarşısının alınmasında onların rolu azdır. Bu süzgəcləri nanoelementlərdən yığmaq mümkündür. Belə süzgəclər tərkibində radioaktiv maddələr, ağır metallar olan tullantıların havaya atılmasının qarşısını alacaq.
F.Əliyev bildirib ki, gələn ildən beynəlxalq layihə ilə bağı Holcim (Azərbaycan) ASC ilə müqavilə imzalamaq və layihəyə başlamağı planlaşdırırlar.