Moskva, 8 fevral, AZƏRTAC

M.İ.Rudomino adına Ümumrusiya Dövlət Xarici Ədəbiyyat Kitabxanasında “Natalya Bajanovanın nurlu dünyası” adlı ikicildliyin təqdimat mərasimi keçirilib. Bu nəşr keçmiş bakılı, görkəmli şərqşünas alim, publisist, pedaqoq, Rusiya Federasiyası Xarici İşlər Nazirliyinin Diplomatik Akademiyasının fəxri doktoru Natalya Bajanovanın xatirəsinə həsr edilib.

Atası uzaq səfərlər kapitanı və həkim olmuş Natalya Bajanovanın həyatının ilk illəri Bakıda, babasının və nənəsinin yanında keçib. Bakıda orta məktəbi bitirəndən sonra Moskvaya, valideynlərinin yanına köçən Natalya Bajanova Moskva Dövlət Beynəlxalq Münasibətlər İnstitutunu (MDBMİ) bitirib, şərqşünaslıq ixtisası alıb. Bir neçə xarici dili, o cümlədən Koreya dilini mükəmməl bilirdi, tanınmış koreyaşünas idi.

Natalya Bajanovanın həyat yoldaşı, Rusiya Federasiyası Xarici İşlər Nazirliyinin Diplomatik Akademiyasının rektoru Yevgeni Bajanov Natalya Bajanovanın həyat və fəaliyyəti barədə söhbət açıb, SSRİ ilə Şimali Koreya və Koreya Respublikası arasında münasibətlərin nizamlanmasında onun xidmətlərini xüsusi qeyd edib. Y.Bajanov deyib: “Bu kitab Natalya Yevgenyevna Bajanovanın xatirəsinə ehtiram əlamətidir. O, ideal ömür-gün yoldaşı, həyatsevər və humanist insan, görkəmli alim, publisist, pedaqoq və maarifçi idi. Biz 46 il birgə ömür sürmüşük. Birlikdə işləyir, kitab və məqalələr yazır, istirahət edir, xarici ölkələrə ezamiyyətə birlikdə gedirdik. Bizi həmişə qoşa görməyə o qədər adət etmişdilər ki, hər hansı tədbirə birimizi yox, hər ikimizi dəvət edirdilər. İndi isə o yoxdur... Yalnız onun nurlu xatirəsi qalıb”.

Təqdimat mərasimində rəsmi qonaqlar, Bajanovların həmkarları və ailəvi dostları çıxış ediblər.

Qeyd edək ki, bu ikicildlik rusiyalı məşhur diplomatlara və beynəlxalq hüquq mütəxəssislərinə həsr edilən “Rusiyalı beynəlxalq hüquqşünas-alimlər” adlı yeni kitablar seriyasının ilk buraxılışıdır.

Rusiya Federasiyası Xarici İşlər Nazirliyinin Diplomatik Akademiyasının rektoru Yevgeni Bajanov AZƏRTAC-ın müxbirinə müsahibəsində Rusiya-Azərbaycan münasibətlərinə də toxunub. O qeyd edib ki, Rusiya Federasiyası Cənubi Qafqaz ölkələri ilə sıx əməkdaşlıq edir, xüsusən Azərbaycanla ən müxtəlif sahələrdə səmərəli qarşılıqlı fəaliyyət tənzimlənib. Diplomat vurğulayıb: “Hesab edirəm ki, Azərbaycanla münasibətlərimiz yaxşıdır. Biz siyasi dialoq aparırıq, iqtisadi sahədə əməkdaşlıq inkişaf edib, humanitar əlaqələr nizamlanıb. Azərbaycanın çoxsaylı nümayəndələri bizim ölkədə yaşayır və müxtəlif sahələrdə, o cümlədən elm sahəsində uğurla çalışır”.

Fəridə Abdullayeva

AZƏRTAC-ın xüsusi müxbiri

Moskva